Team India | కివీస్‌తో ఓడినా.. భార‌త్‌కు ఈ విష‌యాల్లో మేలే జ‌రిగింది..

Team India | న్యూజిలాండ్‌తో జరిగిన మూడు వన్డేల సిరీస్‌లో భారత్ కొన్ని అనవసరమైన రికార్డులను ఎదుర్కొంది. స్వదేశంలోనే కివీస్ చేతిలో వన్డే సిరీస్‌ను కోల్పోవడం భారత జట్టుకు ఇదే తొలిసారి. ఈ పరాజయం అభిమానులను నిరాశకు గురిచేసినప్పటికీ, దీర్ఘకాలికంగా చూస్తే ఈ సిరీస్ భారత్‌కు కొన్ని కీలకమైన సానుకూల సంకేతాలను కూడా ఇచ్చింది. ముఖ్యంగా 2027 ప్రపంచకప్‌ను దృష్టిలో ఉంచుకుంటే, జట్టుకు ఆశాజనకమైన మూడు ముఖ్యమైన లాభాలు స్పష్టంగా కనిపిస్తున్నాయి. అందులో మొదటిది యువ పేసర్ హర్షిత్ రాణా నుంచి వచ్చిన లోయర్ ఆర్డర్ బ్యాటింగ్ బలం. మూడో వన్డేలో రాణా తన కెరీర్‌లో తొలి అర్ధశతకం నమోదు చేశాడు. ఆ ఇన్నింగ్స్ జట్టును గెలిపించలేకపోయినా, అతడి ఆటతీరు మాత్రం సెలెక్టర్లను, జట్టు మేనేజ్‌మెంట్‌ను ఆకట్టుకుంది. క్లీన్‌ షాట్లు, సరైన టెక్నిక్‌తో బ్యాటింగ్ చేస్తూ, నంబర్ 8 స్థానంలో కూడా నమ్మకమైన పరుగులు చేయగల ఆటగాడిగా అతడు కనిపించాడు.

పేస్ బౌలింగ్ డెప్త్‌..

గత కొన్నేళ్లుగా భారత జట్టు చివరి వరుసలో పరుగులు చేసే బౌలర్ కోసం వెతుకుతోంది. ఆ లోటును భర్తీ చేసే సామర్థ్యం రాణాలో ఉందనే అభిప్రాయం బలపడింది. బంతితో పాటు బ్యాట్‌తోనూ అతడు చూపిస్తున్న ప్రతిభ, రాబోయే ప్రపంచకప్ దిశగా భారత్‌కు ఎంతో ఉపయోగపడే అంశంగా మారింది. రెండవ ముఖ్యమైన లాభం భారత ఫాస్ట్ బౌలింగ్ విభాగం చూపించిన నియంత్రణ, డెప్త్‌. సిరీస్ మొత్తం ఫ్లాట్ పిచ్‌లపై జరిగినప్పటికీ మహ్మద్ సిరాజ్, ప్రసిద్ధ్ కృష్ణ, అర్ష్‌దీప్ సింగ్, హర్షిత్ రాణా నలుగురూ తమతమ స్పెల్‌లలో ప్రభావం చూపించారు. ప్రసిద్ధ్, సిరాజ్ కలిసి లైన్, లెంగ్త్‌పై మంచి నియంత్రణ ప్రదర్శించారు. చివరి వన్డేలో ఆడిన అర్ష్‌దీప్ మూడు వికెట్లు తీసి, పరిమిత ఓవర్ల ఫార్మాట్‌లో తన ప్రాముఖ్యతను మరోసారి నిరూపించాడు. మరోవైపు రాణా కొత్త బంతితో స్వింగ్ సాధిస్తూ, వేరియేషన్లతో బ్యాట్స్‌మెన్‌ను ఇబ్బంది పెట్టాడు. ఇక జస్‌ప్రిత్ బుమ్రా తిరిగి జట్టులోకి వస్తే, ఈ దాడి మరింత భయంకరంగా మారుతుందన్న నమ్మకం వ్యక్తమవుతోంది. ప్రపంచకప్ ముందు భారత్‌కు ఈ పేస్ డెప్త్ గొప్ప బలంగా మార‌నుంది.

కోహ్లి ఫామ్‌..

మూడవది, అత్యంత కీలకమైన అంశం విరాట్ కోహ్లి ఫామ్‌లోకి రావడం. దాదాపు 35 ఏళ్ల వయసులోనూ కోహ్లి తన పాత మెరుపును తిరిగి సంపాదించినట్టు కనిపించాడు. ఈ సిరీస్‌లో అతడు ఒక శతకం, ఒక 90 పరుగుల ఇన్నింగ్స్‌తో మరోసారి తన స్థాయిని చాటాడు. కొంతకాలంగా అతడి ఫామ్‌పై సందేహాలు వ్యక్తమైనప్పటికీ, న్యూజిలాండ్ సిరీస్‌లో అతడి బ్యాటింగ్ చూసిన తర్వాత అవన్నీ దాదాపు తీరిపోయాయి. సౌతాఫ్రికా టూర్‌కు అతడు వెళ్తాడా లేదా అన్న చర్చలు జరిగినా, ప్రస్తుతం భారత జట్టులో అత్యుత్తమ బ్యాట్స్‌మన్ కోహ్లినే అన్న విషయం మరోసారి రుజువైంది. ఇక సిరీస్ ఫలితం భారత్‌కు అనుకూలంగా లేకపోయినా, కోహ్లి ఫామ్‌లో ఉండటం, పేస్ బౌలర్లు పరిపక్వత సాధించడం, లోయర్ ఆర్డర్‌లో హర్షిత్ రాణా వంటి ఆప్షన్ లభించడం.. ఇవన్నీ జట్టు భవిష్యత్‌కు ఎంతో కీలకమైన సూచికలుగా మారాయి. రాబోయే పెద్ద టోర్నమెంట్లకు, ముఖ్యంగా 2027 ప్రపంచకప్‌కు సిద్ధమవుతున్న భారత జట్టుకు ఇవి ఆశాజనకమైన అంశాలుగా క్రీడావర్గాలు విశ్లేషిస్తున్నాయి.