T20 World Cup | నేపాల్‌పై ఇట‌లీ జ‌య‌కేతనం

వికెట్ న‌ష్ట‌పోకుండా 124 ప‌రుగుల ల‌క్ష్యాన్ని ఛేదన‌

T20 World Cup | త్రినేత్ర.న్యూస్: టీ20 ప్ర‌పంచ‌క‌ప్ లో భాగంగా నేపాల్‌తో పోటీ ప‌డిన ఇట‌లీ సునాయ‌సంగా ల‌క్ష్యాన్ని సాధించింది. ఈ మ్యాచ్‌లో గెలిచిన ఇట‌లీ సూప‌ర్ 8 అవ‌కాశాల‌ను స‌జీవంగా ఉంచుకోగా, రెండూ ఓడిన నేపాల్ త‌న అవ‌కాశాల‌ను క్లిష్ట‌త‌రం చేసుకుంది.

టాస్ గెలిచిన ఇట‌లీ నేపాల్‌ను బ్యాటింగ్‌కు ఆహ్వానించ‌గా, నేపాల్ ఎనిమిది ప‌రుగుల‌కే మొద‌టి వికెట్ కోల్పోయింది. ఆ త‌రువాత ఏ ద‌శలోనూ స‌రైన భాగ‌స్వామ్యం నెల‌కొన‌క‌పోవ‌డంతో 19.3 ఓవ‌ర్ల‌కు 123 ప‌రుగులు చేసి ఆలౌటైంది. నేపాల్ బ్యాట‌ర్ల‌లో అత్య‌ధికంగా ఆరిఫ్ షేక్ 27 ప‌రుగులు(24 బంతుల్లో) చేశారు. ఇట‌లీ బౌల‌ర్ల‌లో క్రిష‌న్ క‌లుమ‌లాగే మూడు వికెట్లు ప‌డ‌గొట్ట‌గా, బెన్ మనెంటి రెండు వికెట్లు, అలీ హ‌స‌న్‌, స్మ‌ట్స్‌, జ‌స్‌ప్రీత్‌సింగ్ త‌లా ఒక వికెట్ చొప్పున తీశారు.

అనంత‌రం బ్యాటింగ్‌కు దిగిన ఇట‌లీ ఓపెన‌ర్లు ఇద్ద‌రూ విజృంభించ‌డంతో 12.4 ఓవ‌ర్ల‌లోనే వికెట్ న‌ష్ట‌పోకుండా ల‌క్ష్యాన్ని ఛేదించింది. ఓపెన‌ర్లు జ‌స్టిన్ మొస్కా 60 ప‌రుగులు (44 బంతుల్లో అయిదు ఫోర్లు, మూడు సిక్స‌ర్ల‌తో), ఆంథోనీ మొస్కా 62 ప‌రుగులు (32 బంతుల్లో మూడు ఫోర్లు, ఆరు సిక్స‌ర్ల‌తో) చెల‌రేగారు. నేపాల్ బౌల‌ర్లు ఎవ‌రూ ప్ర‌భావం చూప‌లేక‌పోయారు.