IND Vs NZ | ఇషాన్ కిష‌న్ ఇన్నింగ్స్‌కు సూర్య‌కుమార్ ఫిదా.. ఔట్ అయ్యాక ఆలింగ‌నం..

IND Vs NZ | న్యూజిలాండ్‌తో రాయ్‌పూర్‌లో జరిగిన రెండో టీ20 మ్యాచ్‌లో 209 పరుగుల లక్ష్య చేధనలో భారత్ ఆరంభంలోనే తీవ్ర ఒత్తిడిని ఎదుర్కొంది. ఓపెనర్లు సంజూ శాంసన్ (6), అభిషేక్ శర్మ (0) త్వరగా పెవిలియన్ చేరడంతో అభిమానుల్లో ఆందోళన నెలకొంది. అలాంటి కీలక సమయంలో నంబర్ 3 స్థానంలో క్రీజులోకి వచ్చిన ఇషాన్ కిషన్ పూర్తి బాధ్యత తీసుకుని ధైర్యంగా బ్యాటింగ్ చేశాడు. న్యూజిలాండ్ బౌలర్లపై ఎదురుదాడికి దిగిన కిషన్ కేవలం 32 బంతుల్లో 76 పరుగులు సాధించి మ్యాచ్ గమనాన్ని పూర్తిగా మార్చేశాడు. 11 ఫోర్లు, 4 సిక్సులతో 237.50 స్ట్రైక్‌రేట్ నమోదు చేసిన అతడి ఇన్నింగ్స్ భారత్ విజ‌యానికి బాట‌లు వేసింది.

మరో ఎండ్‌లో కెప్టెన్ సూర్యకుమార్ యాదవ్ మొదట కాస్త నెమ్మదిగా ఆడుతూ తర్వాత గేర్ మార్చి పరుగుల వరద పారించాడు. వీరిద్దరూ కలిసి కేవలం 48 బంతుల్లో 122 పరుగుల మెరుపు భాగస్వామ్యం నెలకొల్పి మ్యాచ్‌ను భారత్ వైపుకు తిప్పేశారు. ఇషాన్ కిషన్‌ను ఇష్ సోధీ ఔట్ చేసిన తర్వాత అతడు పెవిలియన్‌కు వెళ్తుండగా సూర్యకుమార్ ముందుకు వచ్చి అతడిని ఆత్మీయంగా ఆలింగనం చేసుకోవడం స్టేడియంలో ప్రత్యేక ఆకర్షణగా నిలిచింది. ఆ కౌగిలింతే కిషన్ ఇన్నింగ్స్‌కు లభించిన గౌరవం, జట్టు విశ్వాసానికి ప్రతీకగా మారింది.

అంతకుముందు బ్యాటింగ్ చేసిన న్యూజిలాండ్ 20 ఓవర్లలో 6 వికెట్ల నష్టానికి 208 పరుగులు చేసింది. డెవాన్ కాన్వే, టిమ్ సీఫర్ట్ శుభారంభం ఇవ్వగా, మధ్య ఓవర్లలో కుల్దీప్ యాదవ్ రెండు కీలక వికెట్లు తీసి భారత్‌కు ఊరటనిచ్చాడు. ర‌చిన్ రవీంద్ర, కెప్టెన్ మిచెల్ సాంట్నర్ (అజేయంగా 47) జట్టును 200 పరుగుల మార్క్ దాటించారు. అయితే చివరకు ఈ మ్యాచ్‌ను గుర్తుండిపోయేలా చేసింది మాత్రం చేజ్‌లో ఇషాన్ కిషన్ ఆడిన మెరుపు ఇన్నింగ్స్, సూర్య‌కుమార్ యాద‌వ్ అత‌నికి ఇచ్చిన ఆ ఒక్క కౌగిలింతే అని చెప్ప‌వ‌చ్చు. ఇక ఈ మ్యాచ్‌తో సూర్య‌కుమార్ యాద‌వ్ ఫామ్‌లోకి వ‌చ్చిన‌ట్లే అని ఫ్యాన్స్ సంతోషం వ్య‌క్తం చేస్తున్నారు.