Ashes 2025-26 | యాషెస్ విజేత ఆసీస్‌.. మూడో టెస్టులోనూ విజ‌యం..

Ashes 2025-26 | అడిలైడ్ వేదికగా జ‌రిగిన యాషెస్ సిరీస్ 2025-26 మూడో టెస్టులోనూ ఇంగ్లండ్‌పై ఆస్ట్రేలియా ఘ‌న విజ‌యం సాధించింది. ఇంగ్లండ్‌పై ఆసీస్ 82 ప‌రుగుల తేడాతో గెలుపొందింది. దీంతో ఆసీస్ జ‌ట్టు యాషెస్ విజేత‌గా నిలిచింది. 5 టెస్టుల సిరీస్‌లో భాగంగా ఆసీస్ ప్ర‌స్తుతం 3-0 ఆధిక్యంలో ఉండ‌డ‌మే కాక సిరీస్‌ను సొంతం చేసుకుంది. ఈ క్ర‌మంలో మిగిలిన రెండు టెస్టుల‌ను నామ‌మాత్రంగా ఆడ‌నున్నారు. కాగా మ్యాచ్‌లో టాస్ గెలిచిన ఆస్ట్రేలియా ముందుగా బ్యాటింగ్ ఎంచుకుంది. తొలి ఇన్నింగ్స్‌లో ఆ జ‌ట్టు 371 ప‌రుగుల‌కు ఆలౌట్ అవ‌గా ఆసీస్ బ్యాట్స్‌మెన్ అలెక్స్ క్యారీ, ఉస్మాన్ ఖ‌వాజా, మిచెల్ స్టార్క్ రాణించారు. 143 బంతులు ఆడిన క్యారీ 8 ఫోర్లు, 1 సిక్స‌ర్‌తో 106 ప‌రుగులు చేయ‌గా, 126 బంతుల్లో ఖ‌వాజా 10 ఫోర్లతో 82 ప‌రుగులు చేశాడు. అలాగే మిచెల్ స్టార్క్ 75 బంతుల్లో 9 ఫోర్ల‌తో 54 ప‌రుగులు చేశాడు.

ఇక ఆసీస్ తొలి ఇన్నింగ్స్‌లో ఇంగ్లండ్ బౌల‌ర్లలో జోఫ్రా ఆర్చ‌ర్ 5 వికెట్లు ప‌డ‌గొట్ట‌గా, బ్రైడాన్ కార్స్‌, విల్ జాక్స్ చెరో 2 వికెట్లు తీశారు. జాష్ టంగ్‌కు 1 వికెట్ ద‌క్కింది. అనంత‌రం తొలి ఇన్నింగ్స్ ఆడిన ఇంగ్లండ్ 286 ప‌రుగుల‌కు ఆలౌట్ అయింది. ఇంగ్లండ్ బ్యాట్స్‌మెన్‌ల‌లో కెప్టెన్‌ బెన్ స్టోక్స్ 198 బంతుల్లో 8 ఫోర్ల‌తో 83 ప‌రుగులు చేయ‌గా, జోఫ్రా ఆర్చ‌ర్ 105 బంతుల్లో 5 ఫోర్లు, 1 సిక్స‌ర్‌తో 51 ప‌రుగులు చేసి జ‌ట్టును ఆదుకునే ప్ర‌య‌త్నం చేశాడు. మిగిలిన ఎవ‌రూ చెప్పుకోద‌గిన ప్ర‌ద‌ర్శ‌న చేయ‌లేదు. ఈ క్ర‌మంలో ఆసీస్ బౌల‌ర్ల‌లో ప్యాట్ క‌మిన్స్‌, స్కాట్ బోలండ్‌లు చెరో 3 వికెట్ల‌ను ప‌డ‌గొట్ట‌గా, నాథ‌న్ ల‌యాన్ 2 వికెట్లు తీశాడు. మిచెల్ స్టార్క్‌, కామెరాన్ గ్రీన్‌ల‌కు చెరొక వికెట్ ద‌క్కింది.

అనంత‌రం రెండో ఇన్నింగ్స్ ఆడిన ఆసీస్ 349 ప‌రుగుల‌కు ఆలౌట్ అయింది. ఆ జ‌ట్టు బ్యాట్స్‌మెన్‌ల‌లో ఓపెన‌ర్ ట్రావిస్ హెడ్ 170 ప‌రుగులతో రాణించాడు. హెడ్ ఇన్నింగ్స్‌లో 16 ఫోర్లు, 2 సిక్స‌ర్లు ఉన్నాయి. అలాగే మ‌రో ప్లేయ‌ర్ అలెక్స్ క్యాల‌రీ 128 బంతుల్లో 6 ఫోర్ల‌తో 72 ప‌రుగులు చేశాడు. మిగిలిన ఎవ‌రూ ఆక‌ట్టుకోలేక‌పోయారు. ఆస్ట్రేలియా రెండో ఇన్నింగ్స్‌లో ఇంగ్లండ్ బౌల‌ర్ల‌లో జాష్ టంగ్ 4 వికెట్లు ప‌డ‌గొట్ట‌గా, బ్రైడాన్ కార్స్ 3 వికెట్లు తీశాడు. జోఫ్రా ఆర్చ‌ర్‌, విల్ జాక్స్‌, బెన్ స్టోక్స్‌ల‌కు త‌లా 1 వికెట్ ద‌క్కింది.

కాగా ఆస్ట్రేలియా రెండో ఇన్నింగ్స్ అనంతరం 435 ప‌రుగుల టార్గెట్‌తో రెండో ఇన్నింగ్స్‌లో బ‌రిలోకి దిగిన ఇంగ్లండ్ జ‌ట్టు 352 ప‌రుగుల‌కు ఆలౌట్ అయింది. ఓ ద‌శ‌లో ల‌క్ష్యాన్ని ఛేదించే విధంగానే ఇంగ్లండ్ జ‌ట్టు క‌నిపించింది. కానీ ఆసీస్ బౌలర్ల ధాటికి ఇంగ్లండ్ ప్లేయర్లు క్రీజులో కొన‌సాగ‌లేక‌పోయారు. దీంతో ఇంగ్లండ్‌పై ఆస్ట్రేలియా 82 ప‌రుగుల తేడాతో విజ‌యం సాధించింది. ఇక ఇంగ్లండ్ రెండో ఇన్నింగ్స్‌లో ఆ జ‌ట్టు బ్యాట్స్‌మెన్‌ల‌లో ఓపెన‌ర్ జాక్ క్రాలీ 151 బంతుల్లో 8 ఫోర్ల‌తో 85 ప‌రుగులు చేసి ఆక‌ట్టుకోగా, మ‌రో ప్లేయ‌ర్ జేమీ స్మిత్ 83 బంతుల్లో 7 ఫోర్లు, 2 సిక్స‌ర్ల‌తో 60 ప‌రుగులు చేసి జ‌ట్టును ర‌క్షించే ప్ర‌య‌త్నం చేశాడు. అలాగే చివ‌ర్లో వ‌చ్చిన విల్ జాక్స్ (47), బ్రైడాన్ కార్స్ (39) కూడా స్కోరును ఛేజ్ చేసేందుకు య‌త్నించారు. కానీ వీలు కాలేదు. మ‌రో వైపు నుంచి ఆసీస్ బౌల‌ర్లు వికెట్ల‌ను తీస్తూ వ‌చ్చారు. దీంతో ఆసీస్ సునాయాసంగా విజ‌యం సాధించింది.

ఇక ఈ గెలుపుతో యాషెస్ సిరీస్‌ను సొంతం చేసుకున్న ఆస్ట్రేలియా ప్ర‌స్తుతం 3-0 ఆధిక్యంలో కొన‌సాగుతుండ‌గా, ఈ రెండు జ‌ట్ల మ‌ధ్య నాలుగో టెస్టు డిసెంబ‌ర్ 26వ తేదీన మెల్‌బోర్న్‌లో జ‌ర‌గ‌నుంది. చివ‌రిదైన ఐదో టెస్టును జ‌న‌వ‌రి 4 నుంచి సిడ్నీలో నిర్వ‌హిస్తారు.