ISRO | రాస్‌కాస్మోస్‌తో ఇస్రో సెమీ క్రయోజెనిక్ ఇంజిన్ ఒప్పందం ముందడుగు..!

ISRO | భార‌త అంత‌రిక్ష ప‌రిశోధ‌నా సంస్థ ఇస్రో ర‌ష్యాకు చెందిన రాస్‌కాస్మోస్‌తో సెమీ క్ర‌యోజెనిక్ ఇంజిన్ స‌ర‌ఫ‌రాపై మాస్కోలో మాస్కో వేదిక‌గా చ‌ర్చ‌లు జ‌రిపింది. ఇస్రో వార్షిక నివేదిక ప్ర‌కారం ఇందుకు సంబంధించిన ముసాయిదా ఒప్పందం సిద్ధ‌మైంది. ప్ర‌భుత్వ ఆమోద ముద్ర ద‌శ‌లో ఉంది. ఈ ఒప్పందంతో భ‌విష్య‌త్‌లో భారీ లాంచ్ వెహికిల్స్ అభివృద్ధికి సెమీ క్ర‌యోజ‌నిక్ ఇంజిన్ సాంకేతికంగా కీల‌కంగా భావిస్తున్నారు. కిరోసిన్, లిక్విడ్ ఆక్సిజన్ మిశ్రమంతో పనిచేసే ఈ ఇంజిన్ హై థ్ర‌స్ట్‌, మెరుగైన సామ‌ర్థ్యాన్ని అందిస్తుంది. దాంతో భారీ ఉప‌గ్ర‌హాల‌ను సైతం అంత‌ర‌క్షింలోకి పంప‌డంతో పాటు డీప్ స్పేస్ మిష‌న్లు చేప‌ట్టేందుకు సైతం అవ‌కాశం ఉంటుంది.

ఇస్రో ఇప్ప‌టికే స్వ‌దేశీ సెమీ క్ర‌యోజెనిక్ ఇంజిన్ అభివృద్ధిపై ప‌ని చేస్తోంది. అయితే, రాస్‌కాస్మోస్‌తో భాగ‌స్వామ్యం ఈ సాంకేతిక అభివృద్ధిని వేగ‌వంతం చేయ‌డంతో పాటు క్లిష్ట‌మైన సాంకేతిక స‌వాళ్ల‌ను అధిగ‌మించ‌డంలో కీల‌క‌పాత్ర పోషించ‌నుంది. అయితే, ఒప్పందానికి సంబంధించి పూర్తి వివ‌రాలు వెల్ల‌డించ‌క‌పోయినా చ‌ర్చ‌లు ముంద‌డుగు ద‌శ‌లోనే ఉన్న‌ట్లుగా సంకేతాలిచ్చింది. ఇస్రో గ‌తేడాది మార్చి 28న తమిళనాడులోని మహేంద్రగిరిలో ఉన్న ఇస్రో ప్రొపల్షన్ కాంప్లెక్స్‌లో సెమీ-క్రయోజెనిక్ ఇంజిన్ (SE2000) పవర్ హెడ్ టెస్ట్ ఆర్టికల్‌పై హాట్ టెస్ట్‌ని విజ‌య‌వంతంగా నిర్వ‌హించింది. 2వేల కిలోన్యూట‌న్ థ్ర‌స్ట్ సామర్థ్యం కలిగిన ఈ ఇంజిన్, ఎల్‌వీఎం3 రాకెట్‌లోని సెమీ క్ర‌యోజ‌నిక్ బూస్ట‌ర్ స్టేజికి శ‌క్తినందిస్తుంది. ప్రస్తుతం ఉన్న ఎల్‌110 దశను ఇది భర్తీ చేయడం ద్వారా పెలోడ్ సామర్థ్యం 4 టన్నుల నుంచి 5 టన్నులకు పెరగనుంది.

రష్యా స్పేస్ రీసెర్చ్ ఇన్‌స్టిట్యూట్, భారత్ ప్రతిపాదించిన వీనస్ ఆర్బిటర్ మిషన్‌లో పెలోడ్ భాగ‌స్వామిగా కొన‌సాగుతుంది. ఈ మిషన్ ద్వారా శుక్రగ్రహం వాతావరణం, ఉపరితలం, సౌర ప్రభావాలపై అధ్యయనం చేయాలని లక్ష్యం. అంతేకాకుండా మానవ అంతరిక్ష ప్రయాణం, శాటిలైట్ నావిగేషన్, భూమి పరిశీలన రంగాల్లో ఇతర దేశాల స‌హ‌కారంతో ఇస్రో ముందుకు సాగుతోంది.