టెలికాం కంపెనీల ‘నెట్‌’వర్క్ ఆటలకు ట్రాయ్ చెక్!

                                                    నెట్‌వర్క్ కష్టాలకు స్వస్తి.. కస్టమర్‌కి 'ట్రాయ్' తీపి కబురు!

రీఛార్జ్ ధరలు రోజూ ఆకాశాన్ని అంటుతున్నాయి గానీ, నెట్‌వర్క్ నాణ్యత మాత్రం ఎక్కడ వేసిన గొంగళి అక్కడే అన్నట్లుంది. కీలకమైన ఫోన్ సంభాషణ మధ్యలో హఠాత్తుగా కట్ అవ్వడం, ఆన్‌లైన్ పేమెంట్ చేసే సమయానికి ఇంటర్నెట్ 'బఫరింగ్' అని తిరగడం, ఇంట్లో వైఫై ఆగిపోతే కంప్లైంట్ ఇచ్చినా రోజుల తరబడి పట్టించుకోకపోవడం.. ప్రతి సామాన్యుడికి రోజూ ఎదురయ్యే అనుభవాలే ఇవి! అయితే, ఇకపై టెలికామ్ కంపెనీల ఈ 'ఇష్టారాజ్యం' నడవదు. కస్టమర్ల జేబులు ఖాళీ చేస్తున్న కంపెనీలు, దానికి తగ్గ సేవలు అందించి తీరాల్సిందేనంటూ భారత టెలికామ్ నియంత్రణ సంస్థ (TRAI) గట్టిగానే రంగంలోకి దిగింది.

వైర్‌లైన్, వైర్‌లెస్ (మొబైల్), బ్రాడ్‌బ్యాండ్ సేవల నాణ్యతను పెంచేందుకు ‘క్వాలిటీ ఆఫ్ సర్వీస్ (QoS)’ నిబంధనల్లో సవరణలు ప్రతిపాదిస్తూ ముసాయిదా నిబంధనలను (First Amendment, 2026) బుధవారం విడుదల చేసింది. ఈ ముసాయిదా నిబంధనల ప్రకారం సామాన్య వినియోగదారుడికి ఎలాంటి ఊరట లభిస్తుందో ఒకసారి చూద్దాం!

పిన్‌కోడ్ స్థాయిలో 'కాల్ డ్రాప్స్' లెక్కలు!

గతంలో ఏదో ఒక పెద్ద నగరాన్ని లేదా సర్కిల్‌ను ప్రాతిపదికగా తీసుకుని "మా నెట్‌వర్క్ నాణ్యత అద్భుతంగా ఉంది" అని కంపెనీలు చేతులు దులిపేసుకునేవి. కానీ కొత్త సవరణల ప్రకారం.. ఇకపై మీ ఏరియా లేదా పిన్‌కోడ్ పరిధిలో (LSA Level) నెట్‌వర్క్ ఎలా ఉందో లెక్క చెప్పాల్సి ఉంటుంది. దీనివల్ల నగర శివార్లలో, గ్రామీణ ప్రాంతాల్లో సిగ్నల్ రాని చోట్ల కంపెనీలు తప్పనిసరిగా కొత్త టవర్లు వేయక తప్పదు. మాట్లాడేటప్పుడు కాల్స్ కట్ అవ్వడం, గొంతు వినబడకపోవడం వంటి సమస్యలకు దీనితో చెక్ పడనుంది.

పేమెంట్ ఫెయిల్ కాకుండా.. 'మినిమమ్ స్పీడ్' గ్యారెంటీ

వీడియోలు చూస్తున్నప్పుడు తిరిగే బఫరింగ్ చక్రాలు, అత్యవసరంగా గూగుల్ పే లేదా ఫోన్ పే చేసేటప్పుడు నెట్ స్లో అయి ట్రాన్సాక్షన్ ఫెయిల్ అవ్వడం ఇకపై కుదరదు. 4G, 5G మరియు బ్రాడ్‌బ్యాండ్ నెట్‌వర్క్‌లలో కంపెనీలు ‘కనీస ఇంటర్నెట్ వేగం’ (Minimum Guaranteed Speed) తప్పనిసరిగా మెయింటెన్ చేయాలని ట్రాయ్ ముసాయిదాలో స్పష్టం చేస్తోంది.

నెట్ ఆగిపోతే.. బిల్లులో కోత తప్పదు!

ఇంటి బ్రాడ్‌బ్యాండ్ లేదా ఫైబర్ కనెక్షన్ నిలిచిపోతే కంప్లైంట్ చేసి రోజుల తరబడి వేచి చూడాల్సిన ఇబ్బంది కలగకుండా ట్రాయ్ నిబంధనలు కఠినతరం చేస్తోంది. నిర్దేశిత సమయంలోగా సమస్యను పరిష్కరించి నెట్‌వర్క్ పునరుద్ధరించకపోతే, సదరు ఆపరేటర్ సంబంధిత వినియోగదారునికి బిల్లులో మినహాయింపు లేదా పరిహారం చెల్లించేలా నిబంధనలను మారుస్తున్నారు.

దాగుడుమూతల ప్లాన్లకు చెక్!

రీఛార్జ్ ప్లాన్లలో దాగి ఉండే రకరకాల షరతులు (Hidden Conditions), నెట్ లిమిట్ అయిపోయాక చెప్పాపెట్టకుండా స్పీడ్ తగ్గించడం వంటి విధానాలకు స్వస్తి పలకనున్నారు. కస్టమర్ డేటా వాడకం, నెట్‌వర్క్ సమస్యల గురించి ఎప్పటికప్పుడు స్పష్టమైన సమాచారాన్ని ఆపరేటర్లు వినియోగదారులకు అందించాల్సి ఉంటుంది.

ఇవి అమల్లోకి రావడం సాధ్యమేనా?

ట్రాయ్ ప్రతిపాదించిన ఈ మార్పులన్నీ వినడానికి కస్టమర్లకు ఎంతో ఊరట కలిగిస్తున్నప్పటికీ, ఇవి తక్షణమే అమల్లోకి వచ్చే చట్టాలు కావు. ఇందులో కొన్ని కీలకమైన అంశాలను మనం గమనించాల్సి ఉంది:

ఇది కేవలం 'ముసాయిదా' మాత్రమే. ప్రస్తుతం విడుదల చేసింది సంప్రదింపుల పత్రం (Consultation Paper) మాత్రమే. అంటే ప్రతిపాదిత నియమాలు ఇంకా తుది రూపం దాల్చలేదు. అయితే, పిన్‌కోడ్ ఆధారిత నాణ్యత గుర్తింపు, సేవల అంతరాయానికి పరిహారం చెల్లించడం వంటి నిబంధనలపై ఆపరేటర్లు (Jio, Airtel, Vi మొదలైనవి) తీవ్ర అభ్యంతరాలు తెలిపే అవకాశం ఉంది.

మీ అభిప్రాయాలు కూడా పంపవచ్చు

ఈ సవరణలపై ఆగస్టు 26 నాటికి అభిప్రాయాలు (Comments), సెప్టెంబర్ 07 నాటికి కౌంటర్ కామెంట్లు adv-qos1@trai.gov.in కు పంపాలని ట్రాయ్ కోరింది. ఈ గడువు ముగిసిన తర్వాత, టెలికామ్ సంస్థలు మరియు నిపుణుల అభిప్రాయాలను పరిశీలించి ట్రాయ్ తుది నిబంధనలను (Final Gazette Notification) విడుదల చేస్తుంది. కార్పొరేట్ కంపెనీల ఒత్తిళ్లకు లొంగకుండా ట్రాయ్ ఈ ప్రతిపాదనలను యథాతథంగా నోటిఫై చేసినప్పుడే సామాన్య కస్టమర్‌కు పూర్తిస్థాయి న్యాయం జరుగుతుంది! అయితే ఇది జరిగే పనేనా అంటే మరి కొంత కాలం వేచి చూడాల్సిందే.