Tamannaah | హీరోతో గొడ‌వ‌లు – సినిమా నుంచి త‌ప్పుకున్న ద‌ర్శ‌కుడు – చిక్కుల్లో త‌మ‌న్నా బాలీవుడ్ మూవీ?

Tamannaah |  రిలీజ్ ముంగిట మిల్కీ బ్యూటీ త‌మ‌న్నా బాలీవుడ్ మూవీ చిక్కుల్లో ప‌డింది. హీరోతో పాటు ప్రొడ్యూస‌ర్‌తో ఏర్ప‌డిన క్రియేటివ్ డిఫ‌రెన్సెస్ కార‌ణంగా ద‌ర్శ‌కుడు ఈ సినిమా నుంచి త‌ప్పుకున్న‌ట్లు బాలీవుడ్ వ‌ర్గాల్లో ప్ర‌చారం జ‌రుగుతోంది. సిద్ధార్థ్ మ‌ల్హోత్రా, త‌మ‌న్నా హీరోహీరోయిన్లుగా బాలీవుడ్‌లో ది వాన్ పేరుతో ఓ మైథ‌లాజిక‌ల్ థ్రిల్ల‌ర్ మూవీ తెర‌కెక్కుతోంది. ఈ సినిమాకు దీప‌క్ కుమార్ మిశ్రా ద‌ర్శ‌క‌త్వం వ‌హిస్తున్నారు. టీవీఎఫ్ బ్యాన‌ర్‌తో క‌లిసి ఎక్తా క‌పూర్ ఈ సినిమాను నిర్మిస్తోంది.

సెప్టెంబ‌ర్‌లో రిలీజ్‌...

సెప్టెంబ‌ర్ 25న ఈ సినిమాను ప్రేక్ష‌కుల ముందుకు తీసుకురాబోతున్న‌ట్లు మేక‌ర్స్ ఇటీవ‌ల ప్ర‌క‌టించారు. రిలీజ్‌కు నెల రోజులు ఉంద‌న‌గా ఈ సినిమా నుంచి డైరెక్ట‌ర్‌ త‌ప్పుకున్న‌ట్లు పుకార్లు వినిపిస్తున్నాయి. దీప‌క్ కుమార్ ఈ సినిమాను తెర‌కెక్కించిన తీరు ప‌ట్ల హీరో సిద్ధార్థ్ మ‌ల్హోత్రాతో పాటు ప్రొడ్యూస‌ర్ ఎక్తా క‌పూర్ అసంతృప్తిగా ఉన్నార‌ని అంటున్నారు. మేకింగ్ విష‌యంలో అభిప్రాయ‌భేదాలు త‌లెత్త‌డంతో దీప‌క్ ఈ సినిమా నుంచి వైదొలిగిన‌ట్లు తెలిసింది. మేక‌ర్స్‌పై లీగ‌ల్ ఫైట్‌కు సిద్ధ‌మైన‌ట్లు తెలిసింది.

హీరోనే డైరెక్ట‌ర్‌....

వాన్ మూవీని రీ షూట్ చేయాల‌ని నిర్ణ‌యించుకున్న‌ట్లు స‌మాచారం. డైరెక్ట‌ర్ దీప‌క్ స్థానంలో ఈ రీషూట్స్‌కు హీరో సిద్ధార్థ్ మ‌ల్హోత్రా స్వ‌యంగా ద‌ర్శ‌క‌త్వం వ‌హించ‌బోతున్న‌ట్లు చెబుతున్నారు. క్లైమాక్స్‌తో పాటు ప్రీ క్లైమాక్స్ పోర్ష‌న్ల‌ను మ‌ళ్లీ కొత్త‌గా చిత్రీక‌రించేందుకు స‌న్నాహాలు చేస్తున్న‌ట్లు టాక్ . ఎడిటింగ్‌లో చాలా మార్పులు చేర్పులు చేయ‌నున్నార‌ట‌. త‌మ‌న్నా సీన్ల‌ను కూడా త‌గ్గించ‌నున్న‌ట్లు స‌మాచారం.

సినిమా వాయిదా....

సెప్టెంబ‌ర్ 25న రిలీజ్ కావాల్సిన ఈ మూవీ రీషూట్స్ వ‌ల్ల వాయిదాప‌డ‌నున్న‌ట్లు పుకార్లు షికారు చేస్తున్నాయి. మిల్కీ బ్యూటీ త‌మ‌న్నా ఈ సినిమాపై భారీగానే ఆశ‌లు పెట్టుకుంది. బాలీవుడ్‌లో తిరిగి విజ‌యాల బాట ప‌ట్టించే మూవీ అవుతుంద‌ని క‌ల‌లు క‌న్న‌ది. కానీ క్రియేటివ్ డిఫ‌రెన్సెస్‌తో రిలీజ్ విష‌యంలోనే ఇబ్బందుల‌ను ఎదుర్కొన‌డంతో మిల్కీ బ్యూటీ నిరాశ‌లో మునిగిన‌ట్లు చెబుతున్నారు.