రేవంత్ ‘యూఎస్ టూర్’ బ్రేక్: వివాదాన్ని పొలిటికల్ అస్త్రంగా మార్చిన తెలంగాణ సీఎం!

   రేవంత్ ‘యూఎస్ టూర్’కు ఢిల్లీ బ్రేక్: పర్యటన రద్దైనా పొలిటికల్ ‘గెయిన్’ సీఎంకేనా?

 

విదేశీ పర్యటనలకు అనుమతి నిరాకరించడం కేంద్రం దృష్టిలో సాధారణ పరిపాలనా ప్రక్రియ కావచ్చు... కానీ తెలంగాణ ముఖ్యమంత్రి ఎనుముల రేవంత్ రెడ్డి చేతిలో అదొక పదునైన ‘పొలిటికల్ ఆయుధం’గా మారింది. లండన్ పర్యటన ముగించుకుని, హార్వర్డ్, ఎంఐటీ లాంటి అంతర్జాతీయ వర్సిటీలతో ఒప్పందాల కోసం యూఎస్ వెళ్లాల్సిన సీఎం బృందానికి విదేశాంగ శాఖ (MEA) “ప్రతిపాదిత కార్యక్రమాలు సీఎం పదవికి మరియు పర్యటన ఉద్దేశానికి సరిపోలడం లేదు” (Proposed programme not appropriate to the office held and the purpose of the visit) అన్న కారణంతో అనుమతి నిరాకరించడం రాష్ట్ర రాజకీయాల్లో తీవ్ర చర్చకు దారితీసింది.

అనుమతి నిరాకరణ విషయంలో యూకే టూర్ ముగించిన సీఎం రేవంత్ రెడ్డి బి.ఆర్. అంబేడ్కర్‌ సచివాలయంలో మీడియా ముందుకు వచ్చి తనదైన శైలిలో కేంద్రం తీరుపై విరుచుకుపడ్డారు. కేంద్రం వేసిన దౌత్యపరమైన బ్రేక్‌ను ఆయన కేవలం ఒక సమస్యగా మిగిల్చకుండా, వ్యూహాత్మకంగా కమలనాథులపైకే తిప్పికొట్టినట్లు స్పష్టమవుతోంది.
అయితే సీఎం రేవంత్ విదేశీ పర్యటనమొత్తం ఎపిసోడ్ వెనుక ఉన్న 4 ప్రధాన పొలిటికల్ యాంగిల్స్ ఏంటో చూద్దాం.

1. 'నయా ఫెడరల్ సమరం' – ప్రాంతీయ ఆత్మగౌరవ కార్డు

గతంలో తెలంగాణ రాజకీయాల్లో బలంగా నడిచిన 'ఢిల్లీ వర్సెస్ తెలంగాణ' పొలిటికల్ సెంటిమెంట్‌ను రేవంత్ రెడ్డి నూతన పరిపాలనా కోణంలో రీ-లాంచ్ చేశారు. దేశాన్ని 30 ట్రిలియన్ డాలర్ల ఆర్థిక వ్యవస్థగా మార్చాలన్న కేంద్రం పిలుపునకు అనుగుణంగానే 'తెలంగాణ రైజింగ్ 2047' విజన్‌తో తాము పెట్టుబడులు తెస్తామంటే ఢిల్లీ పెద్దలు కళ్లెం వేస్తున్నారని ఆయన ఆరోపించారు. వ్యక్తిగత వివాదం కాకుండా "రాష్ట్రాభివృద్ధిని అడ్డుకుంటున్న ఢిల్లీ పీఠం" అనే ప్రాంతీయ ఆత్మగౌరవ ఎజెండాను ప్రెస్ మీట్ ద్వారా ప్రజల్లోకి తీసుకెళ్లే ప్రయత్నం చేశారు.

2. గుజరాత్ పోలిక: భాజపాకు వ్యూహాత్మక చెక్

సచివాలయం వేదికగా రేవంత్ రెడ్డి సంధించిన అత్యంత పదునైన పొలిటికల్ అస్త్రం — 'గుజరాత్ మోడల్ పోలిక'. గుజరాత్ సీఎం భూపేంద్ర పటేల్ ‘వైబ్రెంట్ గుజరాత్’ ప్రచారం కోసం అమెరికా, కెనడా పర్యటనకు అనుమతి పొందారని సీఎం ఎత్తిచూపారు. గుజరాత్ సీఎం పర్యటనకు లేని అభ్యంతరం తెలంగాణ సీఎం పర్యటనకు ఎందుకు వచ్చిందన్నది ఆయన వేసిన సూటి ప్రశ్న. ఈ ఒక్క పాయింట్‌తో కేంద్ర విదేశాంగ విధానంలోని పక్షపాత వైఖరిని ఎండగట్టడమే కాకుండా, తెలంగాణ భాజపా నేతలను దౌత్యపరమైన-రాజకీయపరమైన ఆత్మరక్షణలోకి నెట్టేశారు.

3. 'విదేశీ విద్య' – బహుజన సెంటిమెంట్ విశ్లేషణ

అమెరికా పర్యటన నిలిచిపోవడాన్ని కేవలం ఒక విజిట్ రద్దుగా చూడకుండా, పేద విద్యార్థుల గ్లోబల్ విద్యా కలలతో రేవంత్ ముడిపెట్టారు. "కోట్లు ఖర్చు చేసి బిలియనీర్ల పిల్లలే విదేశాలకు వెళ్లి చదువుకోవాలా? ఎస్సీ, ఎస్టీ, బీసీ విద్యార్థులకు హార్వర్డ్, ఎంఐటీ స్థాయి విద్యను హైదరాబాద్‌లోనే అందించే ప్రయత్నం చేస్తుంటే కేంద్రం అడ్డుకుంటోందా?" అనే సోషల్ జస్టిస్ నెరేటివ్‌ను తెరపైకి తెచ్చారు. ఇది రాజకీయ డిఫెన్స్ మాత్రమే కాకుండా బహుజన ఓటుబ్యాంక్‌ను ఆకట్టుకునే వ్యూహం.

4. లండన్ విజయాన్ని ‘షీల్డ్’గా మలచడం

యూఎస్ అనుమతి రద్దయినంత మాత్రాన వెనకడుగు వేయకుండా, లండన్‌లో ఆక్స్‌ఫర్డ్, కేంబ్రిడ్జ్, లండన్ స్కూల్ ఆఫ్ ఎకనామిక్స్ (LSE) వర్సిటీలతో సాధించిన పురోగతిని ప్రదర్శించారు. "కేంద్రం బ్రేకులు వేసినా తెలంగాణ బ్రాండింగ్ ఆగదు" అనే సంకేతాన్ని ఇస్తూనే, అధికారుల బృందాన్ని యూఎస్ పంపి ఒప్పందాలు పూర్తి చేయాలని ఆదేశించడం ద్వారా తానొక 'రిజల్ట్-ఓరియెంటెడ్ లీడర్' అని నిరూపించుకునే ప్రయత్నం చేశారు.

సీఎం పొలిటికల్ మైండ్ గేమ్

దౌత్యపరమైన క్లియరెన్స్ రాకపోవడం సాధారణంగా అధికార పక్షానికి ఇబ్బందికర పరిణామమే. కానీ, రేవంత్ రెడ్డి దానిని కేంద్రంపై రాజకీయ దాడికి, ప్రతిపక్షాల విమర్శలను తిప్పికొట్టడానికి ఒక వ్యూహాత్మక రాజకీయ ఆయుధంగా మలుచుకున్నారు. ఢిల్లీ పీఠానికి లొంగేది లేదని స్పష్టం చేస్తూనే, తెలంగాణ పొలిటికల్ స్క్రీన్‌పై తన 'ఫైటింగ్ కెపాసిటీ'ని చాటుకోవడంలో సీఎం సక్సెస్ అయ్యారనే చెప్పాలి.