CM Revanth Reddy | కేసీఆర్, హరీశ్‌ ను జైల్లో పెట్టి సూచ‌న‌లు చేయండి: సీఎం రేవంత్

త్రినేత్ర‌.న్యూస్‌: కాళేశ్వరం కేసులో కేసీఆర్, హరీశ్‌రావును జైల్లో పెట్టిన తరువాత బీజేపీ నేతలు సూచనలు చేస్తే బాగుంటుందని ముఖ్య‌మంత్రి రేవంత్ రెడ్డి (CM Revanth Reddy)  అన్నారు. శాస‌న‌స‌భ‌(Assembly) లో ఆదివారం ఆయ‌న మాట్లాడారు. కాళేశ్వరం కేసు(Kaleshwaram case) ను సీబీఐ(CBI) కి అప్పగిస్తే కేసీఆర్, హరీశ్‌ రావును 48 గంటల్లో జైల్లో పెడతామని కేంద్ర మంత్రి కిషన్ రెడ్డి అన్నార‌ని.. వాళ్ల మాట‌లు న‌మ్మి సీబీఐకి అప్ప‌గించామ‌ని వెల్ల‌డించారు. 48 గంటలు అటుంచితే ఇప్ప‌టికి ఎన్ని నెలలు గడిచిందో రాష్ట్ర ప్ర‌జ‌లు చూస్తున్నార‌ని అన్నారు.

ఢిల్లీలో తొక్కిపెట్టారు..

తాము మొద‌టి నుంచి అవ‌క‌త‌వ‌క‌లు జ‌రిగాయ‌ని మొత్తుకున్నా ఎవ‌రూ ప‌ట్టించుకోవ‌లేద‌న్నారు. కాళేశ్వ‌రంలో కేసీఆర్ కుటుంబం దోపిడీకి పాల్ప‌డింద‌ని సాక్షాత్తు దేశ ప్ర‌ధాని మోదీ, కేంద్ర‌ హోంమంత్రి కూడా చెప్పార‌న్నారు. కాళేశ్వరంపై సీబీఐ విచారణను ఢిల్లీలో తొక్కిపెట్టి బీఆర్ఎస్‌, బీజేపీ ఒక్కటై పార్లమెంటు ఎన్నికల్లో ఓట్లు, సీట్లు పంచుకున్నార‌ని ఆరోపించారు.

హౌస్ క‌మిటీ వేయ‌డానికి ఒప్పుకోవాలి...

హరీశ్‌ రావు తమ్ముడు మహేశ్ రావు మహబూబ్ నగర్ జిల్లా బాలానగర్ లో ప్రైవేటు పరిశ్రమ యజమానులను బెదిరించార‌ని విమ‌ర్శించారు. అంత‌టితో ఆగ‌కుండా ధరణి ద్వారా వందల ఎకరాల‌ భూ బదలాయింపు చేసుకున్నారని రేవంత్ రెడ్డి ఆరోపించారు. హరీశ్‌రావు ఒప్పుకుంటే దీనిపై హౌస్ కమిటీ వేయడానికి మేం సిద్ధంగా ఉన్నామ‌ని స్ప‌ష్టం చేశారు. ఒక‌వేళ హరీశ్‌ రావు నిజాయితీపరుడే అయితే హౌస్ కమిటీ వేయడానికి కేటీఆర్, వెంకటరమణా రెడ్డి ఒప్పుకోవాల‌ని డిమాండ్ చేశారు.