WhatsApp Cyber Fraud | వాట్సప్‌లో ‘బాస్’ మెసేజ్.. ఏకంగా రూ.1 కోటి కొల్లగొట్టిన కేటుగాడు, పోలీసుల ఎంట్రీతో ఊహించని ట్విస్ట్

• సైబరాబాద్‌లో వాట్సప్ డీపీ (DP) మార్చి బాస్ పేరుతో భారీ సైబర్ మోసం
• అకౌంటెంట్‌ను బురిడీ కొట్టించి రూ. 1 కోటి ట్రాన్స్‌ఫర్ చేయించుకున్న లక్నో సైబర్ కేటుగాడు
• పక్కాగా దర్యాప్తు చేసి యూపీలో నిందితుడిని అరెస్ట్ చేసిన సైబరాబాద్ సైబర్ క్రైమ్ పోలీసులు
• కేవలం 10 రోజుల్లోనే కోటి రూపాయలు రికవరీ చేసి, బాధితుడికి అప్పగించిన అధికారులు

WhatsApp Cyber Fraud | త్రినేత్ర.న్యూస్ : హైదరాబాద్‌లోని ఓ చీరల రిటైల్ వ్యాపార సంస్థలో పనిచేసే అకౌంటెంట్‌కు వాట్సప్‌లో బాస్ (Boss) నుంచి అర్జెంట్‌గా ఒక మెసేజ్ వచ్చింది. వాట్సప్ డిస్‌ప్లే పిక్చర్ (DP) ఓనర్‌దే కావడంతో గుడ్డిగా నమ్మేసిన ఆ అకౌంటెంట్.. ఏకంగా కోటి రూపాయలు పంపేశాడు. తీరా మోసపోయానని గ్రహించి పోలీసులను ఆశ్రయించగా.. సైబరాబాద్ సైబర్ క్రైమ్ (Cyber Crime) పోలీసులు రంగంలోకి దిగి కేవలం 10 రోజుల్లోనే ఆ డబ్బును రికవర్ చేసి సంచలనం సృష్టించారు.

అసలేం జరిగిందంటే?

ఆగస్టు 4న అకౌంటెంట్‌కు వచ్చిన ఫేక్ వాట్సప్ (Fake WhatsApp) మెసేజ్‌తో ఈ భారీ మోసం మొదలైంది. కరూర్ వైశ్య బ్యాంక్ ఖాతా నుంచి ఇండస్‌ఇండ్ బ్యాంక్‌లోని 'రాయల్ మోడా ప్రైవేట్ లిమిటెడ్' కార్పొరేట్ అకౌంట్‌కు రూ. 1 కోటి బదిలీ చేశారు. బాధితుడి ఫిర్యాదుతో సైబరాబాద్ సీపీ డాక్టర్ ఎం. రమేష్ బృందం వెంటనే దర్యాప్తు ప్రారంభించింది. బ్యాంక్ లావాదేవీలు (Bank transactions), మ్యూల్ అకౌంట్ల (Mule accounts) ఆధారంగా నిందితుడిని యూపీలోని లక్నోకు చెందిన దీపక్ కుమార్(37)గా గుర్తించారు.

10 రోజుల్లోనే సూపర్ రికవరీ

పక్కా స్కెచ్‌తో లక్నో వెళ్లిన సైబరాబాద్ పోలీసులు.. ఆగస్టు 8న దీపక్ కుమార్‌ను అరెస్ట్ చేసి ట్రాన్సిట్ రిమాండ్‌పై సిటీకి తీసుకొచ్చారు. కూకట్‌పల్లి కోర్టు న్యాయమూర్తుల వేగవంతమైన ఆదేశాలతో, ఘటన జరిగిన కేవలం 10 రోజుల్లోనే (ఆగస్టు 14 నాటికి) కోటి రూపాయలను బాధితుడి ఖాతాలో భద్రంగా జమ చేశారు. ఒక సైబర్ కేసులో ఇంత త్వరగా వందశాతం రికవరీ జరగడం విశేషం. ఏసీపీ ఏ. రవీందర్ రెడ్డి పర్యవేక్షణలో ఇన్‌స్పెక్టర్ మన్మోహన్, ఎస్‌ఐ శ్రీనివాసులు బృందం ఈ కేసును చేధించింది.

పోలీసుల వార్నింగ్.. ఈ తప్పులు చేయకండి

సైబర్ మోసాల పట్ల ప్రజలు అలెర్ట్‌గా (Alert) ఉండాలని సైబరాబాద్ పోలీసులు కీలక సూచనలు చేశారు.

వాట్సప్ డీపీలు నమ్మొద్దు: వాట్సప్ డీపీలు (DP) చూసి ఎవరికీ డబ్బులు పంపకండి. ఆన్‌లైన్‌లో భారీ మొత్తంలో మనీ అడిగితే కచ్చితంగా వాయిస్ కాల్ చేసి నిర్ధారించుకోండి.

లింక్స్ క్లిక్ చేయకండి: వాట్సప్‌లో వచ్చే తెలియని ఏపీకే ఫైల్స్ (APK Files) ఎట్టిపరిస్థితుల్లో ఇన్‌స్టాల్ చేయొద్దు.

వెంటనే కాల్ చేయండి: ఒకవేళ మీకు తెలియకుండానే సైబర్ మోసానికి గురైతే, ఏమాత్రం ఆలస్యం చేయకుండా వెంటనే 1930 టోల్ ఫ్రీ నెంబర్‌కు కాల్ చేయండి. లేదా నేషనల్ సైబర్ క్రైమ్ పోర్టల్ (NCRP)లో కంప్లైంట్ చేయండి.