India condom price hike | పడకగదిపై యుద్ధం ఎఫెక్ట్: భారత్‌లో భారీగా పెరగనున్న కండోమ్ ధరలు

India condom price hike | త్రినేత్ర.న్యూస్ : పశ్చిమాసియాలో నెలకొన్న యుద్ధ వాతావరణం కేవలం ముడి చమురు, స్టాక్ మార్కెట్లనే కాదు.. సామాన్యుల పడకగదిని కూడా తీవ్రంగా ప్రభావితం చేస్తోంది. అమెరికా-ఇరాన్ యుద్ధం కారణంగా ప్రపంచ వాణిజ్య మార్గాలు మూసుకుపోవడంతో, భారత కండోమ్ పరిశ్రమ (Condom Industry) తీవ్ర ముడిసరుకుల కొరతను ఎదుర్కొంటోంది. ఫలితంగా త్వరలోనే కండోమ్‌ల ధరలు భారీగా పెరగనున్నాయి.

రూ.8,000 కోట్ల పరిశ్రమ.. 400 కోట్ల ఉత్పత్తి

భారత కండోమ్ మార్కెట్ విలువ సుమారు రూ.8,170 కోట్లు ($860 మిలియన్లు). మన దేశంలో ఏటా దాదాపు 400 కోట్ల కండోమ్‌లు తయారవుతాయి. అయితే తాజా భౌగోళిక రాజకీయ ఉద్రిక్తతలు ఈ పరిశ్రమను ఉక్కిరిబిక్కిరి చేస్తున్నాయి. మ్యాన్‌కైండ్ ఫార్మా (Mankind Pharma), హెచ్‌ఎల్‌ఎల్ లైఫ్‌కేర్ (HLL Lifecare), క్యూపిడ్ లిమిటెడ్ (Cupid Limited) వంటి ప్రధాన కండోమ్ తయారీ సంస్థలు ముడిసరుకు రాక ఆలస్యం కావడంతో ఉత్పత్తిని తగ్గించాల్సిన పరిస్థితి ఏర్పడింది.

ధరల పెరుగుదలకు ప్రధాన కారణాలివే

అమ్మోనియా కొరత: కండోమ్‌ల తయారీలో ఉపయోగించే లేటెక్స్‌ను (Latex - రబ్బరు చెట్ల నుంచి తీసే తెల్లని జిగురు) స్థిరీకరించేందుకు 'అన్‌హైడ్రస్ అమ్మోనియా' అత్యంత కీలకం. భారత్‌కు అవసరమైన 86% అమ్మోనియా సౌదీ అరేబియా, ఖతార్, ఒమన్ వంటి గల్ఫ్ దేశాల నుంచే వస్తుంది. ఇప్పుడు దీని ధర కిలోకు రూ.45 ($0.48) నుంచి రూ.63.4 ($0.68) కు పెరిగింది. అంటే దాదాపు 40-50% పెరిగింది.

సిలికాన్ ఆయిల్ (లూబ్రికెంట్) కటకట: కండోమ్‌ల లూబ్రికేషన్ కోసం వాడే సిలికాన్ ఆయిల్ దొరకడం గగనంగా మారింది. దీని ధర అమాంతం పెరగడం మార్కెట్‌లో అనిశ్చితికి దారితీసింది.

హార్ముజ్ జలసంధి దిగ్బంధం: ప్రపంచ వాణిజ్యానికి కీలకమైన హార్ముజ్ జలసంధి (Strait of Hormuz) మూతపడటంతో నౌకల రాకపోకలు నిలిచిపోయాయి.

ప్యాకేజింగ్ ఖర్చులు: ముడిసరుకులతో పాటు ప్యాకేజింగ్ కోసం వాడే అల్యూమినియం ఫాయిల్, పీవీసీ (PVC) రేట్లు కూడా పెరగడం తయారీదారులపై అదనపు భారం మోపుతోంది. ప్యాకేజింగ్ ఖర్చులు 20% మేర పెరిగాయి.

ప్రజారోగ్యంపై తీవ్ర ప్రభావం

కండోమ్ ధరలు పెరిగితే అది ప్రజారోగ్యంపై తీవ్ర ప్రభావం చూపుతుందని నిపుణులు ఆందోళన వ్యక్తం చేస్తున్నారు.

"పశ్చిమాసియా యుద్ధ ప్రభావం ఇప్పుడు గర్భనిరోధక సాధనాల తయారీని దెబ్బతీస్తోంది. ఈ కొరత, ధరల పెంపు ముప్పు పొంచి ఉంది. ముఖ్యంగా పేద, అట్టడుగు వర్గాల ప్రజలపై ఈ భారం పడుతుంది. చిన్నపాటి ధర పెరిగినా వారు కండోమ్‌ల వాడకాన్ని ఆపేసే ప్రమాదం ఉంది. దీనివల్ల అవాంఛిత గర్భాలు, మాతాశిశు మరణాలు, సుఖవ్యాధులు (STIs) ప్రబలే అవకాశం ఉంది" అని ఇండియన్ మెడికల్ అసోసియేషన్ (IMA) మాజీ అధ్యక్షుడు డాక్టర్ రాజీవ్ జయదేవన్ హెచ్చరించారు.

యునైటెడ్ నేషన్స్ పాపులేషన్ ఫండ్ (UNFPA) నివేదిక ప్రకారం.. నౌకలు సూయజ్ కాలువను కాదని ఆఫ్రికా మీదుగా దారి మళ్లించడంతో ఆసియా దేశాలకు చేరాల్సిన 12 లక్షల కండోమ్‌లు దాదాపు నెల రోజులుగా సముద్రంలోనే చిక్కుకుపోయాయి.

ఇతర రంగాలపైనా దెబ్బ

కేవలం గర్భనిరోధక సాధనాలు మాత్రమే కాకుండా.. పెరుగుతున్న రవాణా, ఇంధన ఖర్చుల (LNG, ఇంధనం) వల్ల నిర్మాణ రంగం (సిమెంట్, స్టీల్, టైల్స్) కూడా తీవ్రంగా దెబ్బతింది. గుజరాత్‌లోని మోర్బీ సిరామిక్ పరిశ్రమల్లో ఉత్పత్తి మందగించింది. గ్యాస్ కొరత కారణంగా ఉత్తరప్రదేశ్‌లోని ఫిరోజాబాద్ గ్లాస్ పరిశ్రమల్లో ఫర్నేస్‌లు మూతబడ్డాయి. దీంతో బీరు, ఫార్మా, పర్ఫ్యూమ్ బాటిళ్ల ఉత్పత్తి 30 నుంచి 40 శాతం పడిపోయింది. నిత్యావసరాలు, స్నాక్స్, సాఫ్ట్ డ్రింక్స్ ప్యాకెట్ల పరిమాణం తగ్గుతూ 'ష్రింక్‌ఫ్లేషన్' (Shrinkflation) కు దారితీస్తోంది.