India Cleanest City 2026 | ఇండోర్ 8 ఏళ్ల రికార్డుకు తెర: దేశంలోనే నం.1 క్లీన్ సిటీగా ‘నవీ ముంబై’.. సత్తా చాటిన విజయవాడ, విశాఖ!

India Cleanest City 2026 | త్రినేత్ర న్యూస్ : భారతదేశ అత్యంత పరిశుభ్రమైన నగరాల జాబితాలో (Swachh Survekshan 2025-26) సరికొత్త చరిత్ర నమోదైంది. గత ఎనిమిదేళ్లుగా అగ్రస్థానంలో కొనసాగుతున్న మధ్యప్రదేశ్‌లోని ఇండోర్ ఆధిపత్యానికి తెరదించుతూ.. మహారాష్ట్రలోని నవీ ముంబై దేశంలోనే నంబర్ వన్ క్లీన్ సిటీగా అవతరించింది. గుజరాత్‌లోని సూరత్ రెండో స్థానంలో నిలవగా, ఆంధ్రప్రదేశ్‌లోని విజయవాడ మూడో స్థానాన్ని కైవసం చేసుకుని సత్తా చాటింది.

దేశవ్యాప్తంగా 4,700కు పైగా పట్టణ స్థానిక సంస్థలు పాల్గొన్న ఈ సర్వే విజేతలకు రాష్ట్రపతి ద్రౌపది ముర్ము అవార్డులను ప్రదానం చేశారు. ఈసారి 'స్వచ్ఛత కీ నయీ పెహల్ - బఢాయే హాథ్, కరే సఫాయీ సాథ్' అనే థీమ్‌తో కేంద్ర గృహ, పట్టణ వ్యవహారాల మంత్రిత్వ శాఖ ఈ సర్వే నిర్వహించింది.

తెలుగు నగరాల జోరు.. విశాఖ, తిరుపతిలకు అరుదైన గౌరవం

ఈ ఏడాది స్వచ్ఛ సర్వేక్షణ్ అవార్డులలో ఆంధ్రప్రదేశ్ నగరాలు తమ ప్రత్యేకతను చాటుకున్నాయి.

గ్రేటర్ విశాఖపట్నం: 10 లక్షలకు పైగా జనాభా ఉన్న నగరాల కేటగిరీలో గ్రేటర్ విశాఖపట్నం దేశంలోనే మొదటి స్థానంలో నిలిచింది.

విజయవాడ: జాతీయ స్థాయి ఓవరాల్ ర్యాంకింగ్స్‌లో టాప్-3లో నిలిచి మెరిసింది.

తిరుపతి - కుప్పం: కొత్తగా ప్రవేశపెట్టిన 'స్వచ్ఛ షెహర్ జోడీ' (మెంటార్ సిటీ) విభాగంలో భాగస్వామ్య పట్టణం కుప్పంతో కలిసి తిరుపతి మూడో స్థానాన్ని దక్కించుకుంది. ఈ విభాగంలో అహ్మదాబాద్-సనంద్ తొలి స్థానంలో నిలిచాయి.

ఇండోర్ ఎందుకు జాబితాలో లేదు?

వరుసగా ఎనిమిదేళ్లు నంబర్ వన్ స్థానంలో ఉన్న ఇండోర్‌ను ఈసారి వేరే కేటగిరీలోకి మార్చారు. కొత్తగా తీసుకొచ్చిన 'మెంటార్ సిటీ' (Mentor City) విభాగంలో తన భాగస్వామ్య పట్టణం దేపాల్‌పూర్‌తో కలిసి ఇండోర్ రెండో స్థానాన్ని పొందింది.

ఇతర విభాగాల్లో విజేతలు ఇవే

3 లక్షల - 10 లక్షల జనాభా: ఉజ్జయిని (మధ్యప్రదేశ్) అగ్రస్థానంలో నిలిచింది.

50 వేల - 3 లక్షల జనాభా: దేవాస్ (మధ్యప్రదేశ్) తొలి స్థానం, న్యూఢిల్లీ మున్సిపల్ కౌన్సిల్ రెండో స్థానం, సాగర్ మూడో స్థానం సాధించాయి.

20 వేల - 50 వేల జనాభా: వీటా (మహారాష్ట్ర) నంబర్ వన్ కాగా, అస్కా (ఒడిశా), పనాజీ (గోవా) తర్వాతి స్థానాల్లో నిలిచాయి.

రివర్ ఫ్రంట్ టౌన్ (నదీ తీర పట్టణం): రేవా (మధ్యప్రదేశ్) మొదటి స్థానం, బిలాస్‌పూర్ (2), వారణాసి (3) తర్వాతి స్థానాలు దక్కించుకున్నాయి.

కోస్టల్ టౌన్ (తీర ప్రాంత పట్టణం): పూరీ (ఒడిశా) టాప్‌లో నిలవగా, అలప్పుళ (కేరళ), రత్నగిరి (మహారాష్ట్ర) 2, 3 స్థానాల్లో ఉన్నాయి.

హిమాలయన్ సిటీ: రుద్రపూర్ అగ్రస్థానం సాధించగా, జమ్మూ, షోపియాన్ తర్వాతి స్థానాల్లో నిలిచాయి.

పూర్తిగా డిజిటల్, జీపీఎస్ పర్యవేక్షణలో సర్వే

ఈసారి మూల్యాంకన ప్రక్రియను అత్యంత పారదర్శకంగా నిర్వహించినట్లు కేంద్ర మంత్రిత్వ శాఖ తెలిపింది. 3,000 మందికి పైగా శిక్షణ పొందిన అసెసర్లు రియల్ టైమ్ జీపీఎస్ (GPS) ట్రాకింగ్ సాయంతో క్షేత్రస్థాయిలో తనిఖీలు చేపట్టారు.

అగ్రశ్రేణి నగరాల మార్గదర్శకత్వం (Mentorship) వల్ల చిన్న పట్టణాల్లోనూ భారీ మార్పు కనిపించింది. గతేడాదితో పోలిస్తే 'కంటికి కనిపించే పరిశుభ్రత' (Visible Cleanliness) 48 శాతం నుంచి 70 శాతానికి, ఇంటింటికీ చెత్త సేకరణ 52 శాతం నుంచి 74 శాతానికి పెరగడం విశేషం.