Tree Falls On School Bus | స్కూల్ బ‌స్సుపై కూలిన చెట్టు.. 10 ఏళ్ల చిన్నారి మృతి.. ప‌లువురికి గాయాలు

Tree Falls On School Bus | రుతుప‌వ‌నాల ప్ర‌భావంతో గ‌త కొన్ని రోజులుగా దేశ ఆర్థిక రాజ‌ధాని ముంబైని (Mumbai) భారీ వ‌ర్షాలు ముంచెత్తుతున్నాయి. ఈ వ‌ర్షాల ధాటికి లోత‌ట్టు ప్రాంతాలు నీట మునిగాయి. ప్ర‌ధాన ర‌హ‌దారులు న‌దుల‌ను త‌ల‌పిస్తున్నాయి. ప‌లు చోట్ల భారీ వృక్షాలు నేల‌కూలాయి. తాజాగా ముంబైలో ఓ పాఠ‌శాల బ‌స్సుపై భారీ వృక్షం కూలిప‌డింది (Tree Falls On School Bus). ఈ ఘ‌ట‌న‌లో ఓ విద్యార్థి మ‌ర‌ణించ‌గా (Student dies).. 10 మందికిపైగా విద్యార్థులు గాయ‌ప‌డ్డారు.

మంగ‌ళ‌వారం మ‌ధ్యాహ్నం 2:50 గంట‌ల స‌మ‌యంలో ఈ ప్ర‌మాదం చోటు చేసుకుంది. తిల‌క్ న‌గ‌ర్‌లోని యూనివ‌ర్స‌ల్ స్కూల్‌కు చెందిన బ‌స్సుపై చెట్టు కూలిపోయింది. ఆ స‌మ‌యంలో బ‌స్సులో మొత్తం 18 మంది పిల్ల‌లు ఉన్నారు. ఈ ప్ర‌మాదంలో 10 ఏళ్ల విద్యార్థి మృతి చెంద‌గా.. 10 మందికిపైగా గాయ‌ప‌డ్డారు. వెంట‌నే స్పందించిన స్థానికులు స‌హాయ‌క చ‌ర్య‌లు చేప‌ట్టారు. బ‌స్సులో చిక్కుకుపోయిన చిన్నారుల‌ను ర‌క్షించి స‌మీపంలోని ఆసుప‌త్రికి త‌ర‌లించారు. వారిలో కొంద‌రి ప‌రిస్థితి విష‌మంగా ఉన్న‌ట్లు తెలుస్తోంది.