PM Modi | ఎపిస్టీన్ ఫైల్స్‌లో ప్ర‌ధాని మోదీ పేరు.. తీవ్రంగా తిరస్క‌రించిన భార‌త్‌..

PM Modi | జెఫ్రీ ఎపిస్టీన్‌కు సంబంధించిన దర్యాప్తు ఫైళ్లలో ప్రధాని నరేంద్ర మోదీపై చేసిన ప్రస్తావనను భారత్ తీవ్రంగా తిరస్కరించింది. దానిని.. దోషిగా తేలిన నేరస్తుడి అర్థరహిత, చౌకబారు ఊహాగానాలే తప్ప మరేమీ కాద‌ని పేర్కొంటూ, అలాంటి వ్యాఖ్యలను అత్యంత తిర‌స్క‌ర‌ణ‌తో కొట్టిపారేయాల‌ని స్పష్టం చేసింది. అమెరికా అధికారులు ఇటీవల విడుదల చేసిన ఈ ఫైళ్లు దోషిగా నిర్ధారితమైన లైంగిక అక్రమ రవాణాదారుడు జెఫ్రీ ఎపిస్టీన్ కు సంబంధించినవే. కాగా ఎపిస్టీన్ ఫైళ్లుగా పిలవబడుతున్న వాటిలోని ఒక ఈ-మెయిల్ సందేశంపై వచ్చిన వార్తలను తాము చూశామ‌ని, అందులో ప్రధాని, ఆయన ఇజ్రాయెల్ పర్యటనకు సంబంధించిన ప్రస్తావన ఉంద‌ని భార‌త‌ విదేశాంగ మంత్రిత్వ శాఖ ప్రతినిధి రంధీర్ జైస్వాల్ ఒక ప్రకటనలో తెలిపారు.

జూలై 2017లో ప్రధాని చేసిన అధికారిక ఇజ్రాయెల్ పర్యటన అనే వాస్తవాన్ని తప్పితే, ఆ ఈ-మెయిల్‌లోని మిగిలిన అన్ని వివ‌రాలు దోషిగా తేలిన నేరస్తుడి చెత్త ఊహాగానాలే అని, అవి అత్యంత తిర‌స్క‌ర‌ణ‌తో విస్మరించదగినవే.. అని ఆయన అన్నారు. కాగా స‌ద‌రు ఈ-మెయిల్ అమెరికా న్యాయ శాఖ విడుదల చేసిన దర్యాప్తు ఫైళ్లలో భాగం అని అక్క‌డి అధికారులు స్ప‌ష్టం చేశారు. అమెరికా కాంగ్రెస్ ఆమోదించిన ఓ చట్టం ప్రకారం, ఆ శాఖ మొత్తం 35 లక్షల పేజీలు, 2వేల‌ వీడియోలను ప్రజలకు అందుబాటులో ఉండేలా విడుద‌ల చేసింది. ఈ క్ర‌మంలో ఎపిస్టీన్ ఫైల్స్‌కు ప్రాధాన్య‌త ఏర్ప‌డింది.