Saurav Das Press Conference | ఫోన్లు హ్యాక్ చేశారు, లాయర్‌ను కలవనివ్వలేదు

• ఢిల్లీ పోలీసులపై సీజేపీ నేతల సంచలన ఆరోపణలు

Saurav Das Press Conference | త్రినేత్ర న్యూస్ : చీఫ్ ఎలక్షన్ కమిషనర్ (CEC) జ్ఞానేశ్ కుమార్ రాజీనామా డిమాండ్ చేస్తూ దేశ రాజధాని ఢిల్లీలో ఉద్రిక్త పరిస్థితులు కొనసాగుతున్నాయి. నిరసనకారులపై పోలీసుల తీరును ఖండిస్తూ 'కాక్రోచ్ జనతా పార్టీ' (CJP) నేతలు సౌరవ్ దాస్, అశుతోష్ రంకా ఆదివారం ఢిల్లీ ప్రెస్ క్లబ్‌లో మీడియాతో మాట్లాడారు. తమను అదుపులోకి తీసుకున్న సమయంలో పోలీసులు అత్యంత నిరంకుశంగా వ్యవహరించారని, తమ ఫోన్లను బలవంతంగా లాక్కుని హ్యాక్ చేశారని వారు తీవ్ర ఆరోపణలు చేశారు.

ఢిల్లీలో వేలాది మంది భద్రతా బలగాల మోహరింపు మధ్య ఈ పరిణామాలు రాజకీయంగా హాట్ టాపిక్‌గా మారాయి.

జంతర్ మంతర్ వద్ద కఠిన ఆంక్షలు.. కొనసాగుతున్న నిరసనలు

ప్రస్తుతం మెట్రో, రైలు సర్వీసులు సాధారణ స్థితికి చేరుకున్నప్పటికీ, ఢిల్లీలో భద్రతా ఆంక్షలు మాత్రం సడలలేదు. పోలీసులు జంతర్ మంతర్ ప్రాంతాన్ని పూర్తిగా సీల్ చేయడంతో పాటు, సరిహద్దుల్లో బారికేడ్లను ఏర్పాటు చేసి సుమారు 30 ప్రాంతాల్లో ట్రాఫిక్ మళ్లింపులు చేపట్టారు.

సీజేపీ నేత అభిజీత్ దీప్కేను పోలీసులు అదుపులోకి తీసుకున్నప్పటికీ, తాము వెనక్కి తగ్గేది లేదని మరో నేత అజింక్య షిండే స్పష్టం చేశారు. జ్ఞానేశ్ కుమార్ పదవి నుంచి దిగిపోయే వరకు తమ ఆందోళన ఆపేది లేదని ఆయన తేల్చిచెప్పారు. మరోవైపు, ఏఐఎస్‌ఏ (AISA) అధ్యక్షురాలు నేహా బోరా కూడా నిరసనలు మరింత ఉద్ధృతం చేస్తామని సోషల్ మీడియా వేదికగా ప్రకటించారు.

40 వేల మంది భద్రతా బలగాల మోహరింపు

నిరసనకారులు ఎక్కడా గుమికూడకుండా ఢిల్లీ వ్యాప్తంగా భారీగా బలగాలను మోహరించారు. ఫిబ్రవరి 2020 తర్వాత నగరంలో ఇదే అతిపెద్ద భద్రతా ఏర్పాట్లు కావడం గమనార్హం. 26 వేల మంది అదనపు బలగాలతో కలిపి మొత్తం 40 వేల మందికి పైగా భద్రతా సిబ్బందిని రంగంలోకి దించారు. హర్యానా, ఉత్తరప్రదేశ్ సరిహద్దుల్లోనూ పటిష్టమైన బారికేడ్లను ఏర్పాటు చేశారు.

"మమ్మల్ని కిడ్నాప్ చేశారు" - సౌరవ్ దాస్

పోలీసుల అదుపు నుంచి విడుదలైన తర్వాత తొలిసారి మీడియాతో మాట్లాడిన CJP నేత సౌరవ్ దాస్ మాట్లాడుతూ.. దేశంలో ఎమర్జెన్సీ పరిస్థితి (Emergency)ని తలపించే వాతావరణం నెలకొందని మండిపడ్డారు.

"మేము విమానం దిగగానే పోలీసులు నేరుగా మెట్లపైకి దూసుకొచ్చి మమ్మల్ని కిడ్నాప్ చేశారు. అదుపులోకి తీసుకున్న తర్వాత మా ఫోన్లను బలవంతంగా లాక్కున్నారు. లాయర్‌ను కలిసే కనీస హక్కును కూడా నిరాకరించారు. మాకు ఎలాంటి అరెస్ట్ వారెంట్లు గానీ, పత్రాలు గానీ ఇవ్వలేదు. మహిళా పోలీసులను అడ్డుపెట్టుకుని ఫోన్లను లాక్కుని, సీజర్ మెమో ఇవ్వడానికి కూడా నిరాకరించారు" అని సౌరవ్ దాస్ ఆరోపించారు.

అంతేకాకుండా, తమ ఫోన్లను హ్యాక్ చేసి లేదా క్లోన్ చేసి ఎవిడెన్స్ ప్లాంట్ చేసే ప్రమాదం ఉందని ఆయన తీవ్ర అనుమానం వ్యక్తం చేశారు. ప్రభుత్వ తీరును ప్రజలంతా గమనిస్తున్నారని ఆయన అన్నారు.

సోమవారం సుప్రీంకోర్టుకు విపక్షాల మార్చ్

మరోవైపు, కేంద్ర ఎన్నికల సంఘం వ్యవహారశైలిపై నిరసన వ్యక్తం చేస్తూ సోమవారం 'ఇండియా' (INDIA) కూటమి ఆధ్వర్యంలో ప్రత్యేక నిరసన మార్చ్ జరగనుంది. విపక్ష నేతలందరూ కలిసి సుప్రీంకోర్టును ఆశ్రయించి, సంబంధిత కేసులను త్వరగా విచారించాలని కోరనున్నారు. శనివారం జరిగిన నిరసనల సందర్భంగా అరెస్టయిన తృణమూల్ కాంగ్రెస్ ఎంపీ అభిషేక్ బెనర్జీ నివాసం వద్ద మమతా బెనర్జీని కూడా పోలీసులు అదుపులోకి తీసుకోవడం కలకలం రేపింది.

ఇదీ చదవండి | అభిజీత్ స‌హా సీజేపీ నేత‌ల విడుద‌ల.. మధ్యాహ్నం 2 గంటలకు మీడియా సమావేశం