Parliament Budget Session 2026 Highlights | బడ్జెట్ సెషన్ 2026: ఉపాధి హామీ రద్దుపై రగడ, రాష్ట్రపతి ప్రసంగం హైలైట్స్

Parliament Budget Session 2026 Highlights | 2026 పార్లమెంట్ బడ్జెట్ సమావేశాలు బుధవారం (జనవరి 28) ఉదయం ఉభయ సభల సంయుక్త సమావేశంతో ప్రారంభమయ్యాయి. ఈ సందర్భంగా రాష్ట్రపతి ద్రౌపది ముర్ము ప్రసంగిస్తుండగా, సభలో నాటకీయ పరిణామాలు చోటు చేసుకున్నాయి. ముఖ్యంగా మహాత్మా గాంధీ జాతీయ గ్రామీణ ఉపాధి హామీ పథకాన్ని (MGNREGA) రద్దు చేయడంపై ప్రతిపక్షాలు తీవ్ర అభ్యంతరం వ్యక్తం చేశాయి.

కేంద్ర ప్రభుత్వం ఎంతో ప్రతిష్టాత్మకంగా తీసుకువచ్చిన 'వికసిత్ భారత్-గ్యారంటీ ఫర్ రోజ్‌గార్ అండ్ అజీవికా మిషన్ - గ్రామీణ్' (VB-G RAM G) చట్టాన్ని రాష్ట్రపతి తన ప్రసంగంలో ప్రస్తావించిన వెంటనే, ప్రతిపక్ష ఎంపీలు తమ స్థానాల్లో నుంచి లేచి నిరసన తెలిపారు. పాత ఉపాధి హామీ చట్టాన్ని రద్దు చేయడాన్ని వారు తీవ్రంగా వ్యతిరేకించారు. "గౌరవప్రదమైన రీతిలో" తమ నిరసనను తెలిపామని కాంగ్రెస్ నేత జైరాం రమేష్ పేర్కొన్నారు. అయితే, రాష్ట్రపతి ప్రసంగానికి ఆటంకం కలిగించడంపై కేంద్ర పార్లమెంటరీ వ్యవహారాల మంత్రి కిరణ్ రిజిజు ఆగ్రహం వ్యక్తం చేశారు. విపక్షాల తీరు దేశానికి తలవంపులు తెచ్చేలా ఉందని ఆయన మండిపడ్డారు.

రాష్ట్రపతి ప్రసంగం - కీలక అంశాలు

నిరసనల నడుమనే రాష్ట్రపతి ముర్ము తన ప్రసంగాన్ని కొనసాగిస్తూ, గత ఏడాది కాలంలో భారత్ సాధించిన విజయాలను వివరించారు

ఆపరేషన్ సింధూర్ (Operation Sindoor)

పాకిస్థాన్‌లోని ఉగ్రవాద స్థావరాలను ధ్వంసం చేయడానికి భారత్ చేపట్టిన 'ఆపరేషన్ సింధూర్' విజయాన్ని ఆమె కొనియాడారు. ఈ ఆపరేషన్ భారత సైనిక పటిమను ప్రపంచానికి చాటిచెప్పిందని అన్నారు. సింధు జలాల ఒప్పందాన్ని (Indus Water Treaty) తాత్కాలికంగా నిలిపివేయడాన్ని కూడా ఆమె ప్రస్తావించారు.

ఆర్ధిక ప్రగతి: గత దశాబ్దంలో 25 కోట్ల మంది భారతీయులు పేదరికం నుంచి బయటపడ్డారని, ద్రవ్యోల్బణం అదుపులో ఉందని తెలిపారు.

మౌలిక సదుపాయాలు: దేశవ్యాప్తంగా ప్రస్తుతం 150 వందే భారత్ రైళ్లు నడుస్తున్నాయని వెల్లడించారు.

అంతరిక్ష విజయాలు: గగన్‌యాన్ మిషన్‌లో భాగంగా వ్యోమగామి శుభాన్షు శుక్లా అంతర్జాతీయ అంతరిక్ష కేంద్రానికి (ISS) వెళ్లడాన్ని చారిత్రక ఘట్టంగా అభివర్ణించారు.

ఎలక్ట్రానిక్స్: మొబైల్ ఫోన్ల తయారీలో భారత్ ప్రపంచంలోనే రెండో అతిపెద్ద దేశంగా అవతరించిందని తెలిపారు.

కేంద్ర బడ్జెట్ షెడ్యూల్ ఇదే

జనవరి 28న రాష్ట్రపతి ప్రసంగం ముగిసింది. జనవరి 29 (గురువారం) కేంద్ర ఆర్థిక మంత్రి నిర్మలా సీతారామన్ పార్లమెంట్‌లో 'ఎకనామిక్ సర్వే' (ఆర్థిక సర్వే)ను ప్రవేశపెడతారు. ఫిబ్రవరి 1న (ఆదివారం) నిర్మలా సీతారామన్ 2026-27 కేంద్ర బడ్జెట్‌ను సమర్పిస్తారు. ఇది ఆమెకు వరుసగా 9వ బడ్జెట్ కావడం విశేషం.

రెండు దశల్లో బడ్జెట్ సమావేశాలు

ఈసారి బడ్జెట్ సమావేశాలు రెండు దశల్లో జరగనున్నాయి. మొదటి దశలో భాగంగా జనవరి 28న ప్రారంభం అయిన బడ్జెట్ సమావేశాలు ఏప్రిల్ 2 వరకు కొనసాగనున్నాయి. ఫిబ్రవరి 14 నుంచి మార్చి 8 వరకు సమావేశాలకు విరామం ఉంటుంది. రెండో దశ సమావేశాలు మార్చి 9 నుంచి ప్రారంభం అయి ఏప్రిల్ 2 వరకు కొనసాగనున్నాయి.

మార్చి 9 నుంచి ఈసారి బడ్జెట్‌లో ద్రవ్యోల్బణం, ఉద్యోగ కల్పన, పన్ను మినహాయింపులపై సామాన్యులు భారీ ఆశలు పెట్టుకున్నారు.