Om Birla No Confidence Motion | దద్దరిల్లిన లోక్‌సభ.. స్పీకర్‌పై అవిశ్వాస తీర్మానం

• మాటల యుద్ధం
• రాహుల్ గాంధీ గైర్హాజరు

Om Birla No Confidence Motion | త్రినేత్ర.న్యూస్ : 2026 పార్లమెంట్ బడ్జెట్ సమావేశాలు తీవ్ర గందరగోళం మధ్య కొనసాగుతున్నాయి. లోక్‌సభ స్పీకర్ ఓం బిర్లాను పదవి నుంచి తొలగించాలంటూ కాంగ్రెస్ ఎంపీ మహ్మద్ జావేద్ ప్రవేశపెట్టిన తీర్మానంపై సభలో 10 గంటల సుదీర్ఘ చర్చ జరుగుతోంది. పశ్చిమాసియా సంక్షోభంపై ప్రత్యేక చర్చ జరపాలని విపక్షాలు పట్టుబట్టగా.. విదేశాంగ మంత్రి జైశంకర్ ఇప్పటికే వివరణ ఇచ్చారని ప్రభుత్వం తోసిపుచ్చింది. ఆప్ ఎంపీ సంజయ్ సింగ్, టీఎంసీ ఎంపీ సాకేత్ గోఖలే రాజ్యసభలో నోటీసులు ఇచ్చారు. ఆందోళనల మధ్య ఉభయ సభలు పలుమార్లు వాయిదా పడ్డాయి.

Parliament Budget Session 2026 | 'కర్మ' అనుభవించక తప్పదు: మహువా మొయిత్రా

స్పీకర్‌పై చర్చ సందర్భంగా టీఎంసీ ఎంపీ మహువా మొయిత్రా తీవ్ర స్థాయిలో విరుచుకుపడ్డారు. గతంలో తనను బహిష్కరించిన విషయాన్ని గుర్తుచేస్తూ.. "ఓం బిర్లా తాను చేసిన తప్పుల నుంచి, కర్మ నుంచి తప్పించుకోలేరు" అని వ్యాఖ్యానించారు. కేవలం విపక్ష ఎంపీలను మాత్రమే సస్పెండ్ చేయడం, గత 7-8 ఏళ్లుగా డిప్యూటీ స్పీకర్ పోస్టును ఖాళీగా ఉంచడాన్ని ఆమె తప్పుబట్టారు. బీజేపీ ఎంపీ రమేష్ బిధూరి.. ఎంపీ డానిష్ అలీపై అనుచిత వ్యాఖ్యలు చేసినా స్పీకర్ చర్యలు తీసుకోలేదని, తద్వారా దేశ ముస్లిం జనాభాను ఆయన మోసం చేశారని ఆరోపించారు. మణిపూర్ హింసపై చర్చకు అనుమతించలేదన్నారు.

రాహుల్ గాంధీని టార్గెట్ చేసిన కిరణ్ రిజిజు

స్పీకర్‌కు మద్దతుగా కేంద్ర పార్లమెంటరీ వ్యవహారాల మంత్రి కిరణ్ రిజిజు చర్చను ప్రారంభించారు. ప్రతిపక్షాల్లోని కనీసం 50 మంది ఎంపీలు తనకు వ్యక్తిగతంగా కలిసి, ఈ తీర్మానంతో తమకు ఏకీభావం లేదని చెప్పారని ఆయన సంచలన వ్యాఖ్యలు చేశారు. 1954లో స్పీకర్‌పై వచ్చిన అవిశ్వాస తీర్మానం సమయంలో జవహర్‌లాల్ నెహ్రూ చేసిన వ్యాఖ్యలను ఆయన ఉదహరించారు. పార్లమెంట్‌లో మాట్లాడేందుకు ఎవరి అనుమతి అవసరం లేదని రాహుల్ అనడం సరికాదన్నారు. ప్రియాంక గాంధీనైనా కనీసం ప్రతిపక్ష నాయకురాలిగా చేస్తే బాగుండేదని, ఆమె కనీసం సభకు వచ్చి వింటారని ఎద్దేవా చేశారు. 2017 డోక్లాం వివాదం సమయంలో చైనా రాయబారితో రాహుల్ భేటీని ఆయన తప్పుబట్టారు.

రాహుల్ ఎవరికీ తలవంచలేదు: ప్రియాంక గాంధీ

రాహుల్ మైక్ కట్ చేస్తున్నారని, దేశ నాయకత్వం బలహీనంగా ఉందని కాంగ్రెస్ ఎంపీ గౌరవ్ గొగోయ్ విమర్శించారు. ప్రియాంక గాంధీ మాట్లాడుతూ.. "గత 12 ఏళ్లలో పాలక పక్షం ముందు తలవంచని ఏకైక వ్యక్తి రాహుల్ గాంధీ మాత్రమే. ఆయన చెప్పే నిజాలను వారు జీర్ణించుకోలేకపోతున్నారు" అని అన్నారు. అమెరికాతో వాణిజ్య ఒప్పందంలో కేంద్రం తలవంచిందని ఆమె ఆరోపించారు.

విపక్షాలపై ఎన్డీయే పక్షాల ఫైర్

జేడీయూ (లలన్ సింగ్): విపక్షాలు కేవలం ఒక నాయకుడిని సంతోషపెట్టడానికే ఈ తీర్మానం తెచ్చాయి. సభలో సరిగ్గా ప్రవర్తించకపోతే మైక్ ఆగిపోతుంది. ఎమర్జెన్సీ పెట్టిన కాంగ్రెస్‌కు ప్రజాస్వామ్యం గురించి మాట్లాడే హక్కు లేదు.

టీడీపీ (లావు శ్రీకృష్ణ దేవరాయలు): విపక్షాలకు మెజారిటీ లేకపోయినా, కేవలం వార్తల్లో (Headlines) నిలవడానికే ఈ తీర్మానాన్ని ప్రవేశపెట్టారు.

శివసేన - షిండే (శ్రీకాంత్ షిండే): ప్రధాని మోదీకి విదేశాల్లో ఉన్న గుర్తింపు మరే ప్రధానికి లేదు. రాహుల్ గాంధీ ఎప్పుడూ విహారయాత్రల్లోనే ఉంటారు, సభలో కీలక చర్చలప్పుడు ఆయన ఉండరు.

శివసేన - ఉద్ధవ్ (అరవింద్ సావంత్): స్పీకర్ హక్కులు హరించబడుతున్నాయి, వాటిని కాపాడేందుకే విపక్షాలు పోరాడుతున్నాయి అని తీర్మానానికి మద్దతు తెలిపారు.