PM Modi Natural Farming Speech | ఆర్గానిక్ కాదు.. నేచురల్ ఫార్మింగ్ చేయండి.. రసాయన ఎరువులతో భూమాతను చంపుకుంటున్నాం

• భూమాతకు ప్రమాదం
• ఆర్గానిక్ వర్సెస్ నేచురల్
• రూ.16 లక్షల కోట్ల సబ్సిడీ
• నేల సారాన్ని బట్టి ఎరువులు
• ప్రధాని మోదీ కీలక వ్యాఖ్యలు

PM Modi Natural Farming Speech | త్రినేత్ర న్యూస్ : వ్యవసాయంలో విపరీతంగా రసాయనాలు వాడుతూ మన కళ్ల ముందే భూమాతను నాశనం చేసుకుంటున్నామని ప్రధానమంత్రి నరేంద్ర మోదీ తీవ్ర ఆందోళన వ్యక్తం చేశారు. గురువారం న్యూఢిల్లీలోని భారత్ మండపంలో ఇండియా టుడే గ్రూప్ నిర్వహించిన 'కిసాన్ తక్ భారత్ అగ్రికల్చర్ కాన్ఫరెన్స్'లో ఆయన ప్రసంగించారు. రసాయన రహిత సాగు వైపు రైతులు మళ్లాలని పిలుపునిచ్చిన ప్రధాని.. తాను ప్రోత్సహిస్తున్నది 'ఆర్గానిక్ ఫార్మింగ్' (Organic Farming) కాదని, 'నేచురల్ ఫార్మింగ్' (Natural Farming) అని స్పష్టమైన తేడాను వివరించారు.

మన తల్లిని మనమే చంపుకుంటున్నాం

రెండు రోజుల పాటు జరుగుతున్న ఈ సదస్సుకు దేశవ్యాప్తంగా సుమారు 2,000 మంది రైతులు, వ్యవసాయ శాస్త్రవేత్తలు, పరిశ్రమ ప్రతినిధులు హాజరయ్యారు. వారిని ఉద్దేశించి మోదీ ఎమోషనల్‌గా మాట్లాడారు.

"మనం రసాయనాలను ఉపయోగిస్తున్న తీరు చూస్తుంటే భూమాతను పూర్తిగా నాశనం చేస్తున్నాం. మనం ఆమె బిడ్డలం.. కానీ మన కళ్ల ముందే మన తల్లిని మనమే చంపుకుంటున్నాం" అని ఆవేదన వ్యక్తం చేశారు.

రసాయనాల బారి నుంచి వ్యవసాయ భూమిని కాపాడుకోకపోతే, రాబోయే తరాలు తీవ్ర పరిణామాలను ఎదుర్కోవాల్సి వస్తుందని ఆయన హెచ్చరించారు.

ఎరువుల సబ్సిడీపై రూ. 16 లక్షల కోట్లు ఖర్చు

మధ్యప్రాచ్య (Middle East) యుద్ధం కారణంగా ప్రపంచవ్యాప్తంగా ఎరువుల సరఫరా గొలుసు (Supply chains) దెబ్బతిన్నప్పటికీ, భారత రైతులపై ఆ భారం పడకుండా కేంద్ర ప్రభుత్వం అండగా నిలిచిందని ప్రధాని గుర్తుచేశారు. గత 12 ఏళ్లలో ఎరువులను తక్కువ ధరకే అందించేందుకు ప్రభుత్వం ఏకంగా రూ. 16 లక్షల కోట్లు సబ్సిడీ రూపంలో ఖర్చు చేసిందని వెల్లడించారు.

టెక్నాలజీ సాయంతో నేచురల్ ఫార్మింగ్ వైపు అడుగులు

ఎరువుల సబ్సిడీని సమర్థిస్తూనే, రైతులు తమ పొలంలోని మట్టికి అసలు ఎంత ఎరువు అవసరమో ఆధునిక టెక్నాలజీ ద్వారా తెలుసుకోవాలని మోదీ సూచించారు. కేవలం ఎరువుల వాడకాన్ని తగ్గించడమే కాకుండా.. పూర్తిస్థాయి ప్రకృతి వ్యవసాయం (Natural Farming) వైపు మళ్లడం ద్వారానే నేల సారాన్ని, రైతు ఆదాయాన్ని కాపాడుకోగలమని ఆయన స్పష్టం చేశారు.