Mumbai UPI Protest | రూ.2,000 దాటితే యూపీఐ వాడరా? కొత్త ఛార్జీలపై భగ్గుమంటున్న జనం.. సర్వేలో షాకింగ్ నిజాలు

Mumbai UPI Protest | త్రినేత్ర న్యూస్ : మొబైల్ తీసి క్యూఆర్ కోడ్ స్కాన్ చేసి క్షణాల్లో చేసే యూపీఐ పేమెంట్లకు ఇకపై అదనపు భారం పడనుందా? కేంద్ర ప్రభుత్వం ప్రకటించిన 0.4% ఎండీఆర్ (MDR - మర్చంట్ డిస్కౌంట్ రేట్) ఛార్జీలను వ్యాపారులు తమ బిల్లుల్లో కలిపితే.. యూపీఐని పక్కన పెట్టేందుకు దేశ ఆర్థిక రాజధాని ముంబై ప్రజలు సిద్ధమవుతున్నారు. ప్రముఖ రీసెర్చ్ ప్లాట్‌ఫామ్ 'లోకల్ సర్కిల్స్' (LocalCircles) అక్టోబర్ 1న విడుదల చేసిన తాజా సర్వే ప్రకారం.. ప్రతి ఐదుగురిలో నలుగురు (సుమారు 80 శాతం మంది) ఈ అదనపు ఛార్జీలు చెల్లించడానికి ఏమాత్రం సిద్ధంగా లేరని తేలింది.

అసలు ఏమిటీ కొత్త ఛార్జీలు?

గత ఆరేన్నరేళ్లుగా జీరో ఎండీఆర్ విధానంతో పూర్తి ఉచితంగా సాగిన యూపీఐ లావాదేవీలపై కేంద్ర ఆర్థిక శాఖ ఇటీవల కొత్త గెజిట్ నోటిఫికేషన్ విడుదల చేసింది. దీని ప్రకారం, అక్టోబర్ 15 నుంచి ఒక వ్యక్తి వ్యాపారికి (P2M) చేసే రూ. 2,000 కంటే ఎక్కువ విలువైన చెల్లింపులపై 0.4% ఎండీఆర్ వర్తిస్తుంది. రూ. 75,000 అంతకంటే ఎక్కువ మొత్తాలకు ఈ రుసుముపై గరిష్టంగా రూ. 300 క్యాప్ విధించారు.

యూపీఐ కాకపోతే ఏంటి ఆప్షన్?

వ్యాపారులు ఈ 0.4% భారాన్ని కస్టమర్ల నుంచే వసూలు చేయాలని చూస్తే ఏం చేస్తారన్న ప్రశ్నకు ముంబైలో 6,500 మందికి పైగా వినియోగదారులు స్పష్టమైన సమాధానం ఇచ్చారు.

• 29% మంది నేరుగా క్రెడిట్ కార్డుల వినియోగానికి మారతామని తెలిపారు.
• 20% మంది పాత పద్ధతిలోనే నగదు (Cash) చెల్లిస్తామన్నారు.
• 17% మంది డెబిట్ కార్డులను ప్రత్యామ్నాయంగా ఎంచుకుంటామని చెప్పారు.
• కేవలం 21% మంది మాత్రమే అదనపు ఛార్జీ పడినా యూపీఐ కొనసాగిస్తామని పేర్కొన్నారు.

మొత్తంగా చూస్తే.. రూ. 2,000 దాటిన లావాదేవీలకు 75 శాతం మంది కార్డులు, క్యాష్ లేదా డైరెక్ట్ బ్యాంక్ బదిలీలనే ఎక్కువగా ఉపయోగిస్తామని స్పష్టం చేశారు. జాతీయ స్థాయిలో దాదాపు 67,000 మందిపై నిర్వహించిన సర్వేలోనూ కేవలం 14 శాతం మంది మాత్రమే ఫీజు చెల్లించి యూపీఐ కొనసాగిస్తామని చెప్పడం గమనార్హం.

వ్యాపారుల తీవ్ర నిరసన.. 'నో యూపీఐ డే'కి పిలుపు

దేశంలోనే అత్యధికంగా యూపీఐ లావాదేవీలు జరిగే రాష్ట్రం మహారాష్ట్ర (ఎన్‌పీసీఐ ఏప్రిల్ డేటా ప్రకారం వాల్యూమ్‌‌లో 9.84%). అయితే జాతీయ సర్వేలో దాదాపు 83% మంది వ్యాపారులు ఈ 0.4% ఎండీఆర్ భారాన్ని తాము భరించలేమని స్పష్టం చేశారు.

ఈ నిర్ణయానికి వ్యతిరేకంగా ముంబైలోని ఆరు లక్షల మంది చిరువ్యాపారులకు ప్రాతినిధ్యం వహిస్తున్న 'ఫెడరేషన్ ఆఫ్ రిటైల్ ట్రేడర్స్ వెల్ఫేర్ అసోసియేషన్' (FRTWA), అక్టోబర్ 2న "నో యూపీఐ డే" (No UPI Day) నిరసనకు పిలుపునిచ్చింది. "ఈరోజు 0.4% ఉన్నది రేపు 0.75% లేదా అంతకంటే ఎక్కువ కాదని గ్యారెంటీ ఏమిటి?" అని సంఘం ప్రతినిధులు ప్రశ్నిస్తున్నారు. ఇప్పటికే కేంద్ర ఆర్థిక మంత్రితో వ్యాపార సంఘాలు చర్చలు జరిపినప్పటికీ, నిరసనపై వెనక్కి తగ్గేది లేదని స్పష్టం చేస్తున్నాయి.