Monkey Skull in Bag | ఢిల్లీ ఎయిర్‌పోర్ట్‌లో కలకలం.. హైదరాబాద్ ఫ్లైట్ ఎక్కే ప్రయాణికుడి బ్యాగ్‌లో ‘కోతి పుర్రె’

Monkey Skull in Bag | త్రినేత్ర.న్యూస్ : ఢిల్లీలోని ఇందిరా గాంధీ ఇంటర్నేషనల్ (IGI) ఎయిర్‌పోర్ట్‌లో ఓ ఆశ్చర్యకరమైన ఘటన వెలుగుచూసింది. ఢిల్లీ నుంచి హైదరాబాద్‌కు వెళ్లాల్సిన ఓ ప్రయాణికుడి హ్యాండ్ బ్యాగ్‌లో ఏకంగా 'కోతి పుర్రె' లభించడం విమానాశ్రయంలో తీవ్ర కలకలం రేపింది.

అసలేం జరిగిందంటే

ఫ్లైట్ ఎక్కే ముందు ఎయిర్‌పోర్ట్‌లో జరిగే సాధారణ సెక్యూరిటీ చెకింగ్‌లో (Security check) భాగంగా CISF సిబ్బంది ప్రయాణికుల లగేజీని స్కాన్ చేస్తున్నారు. ఈ క్రమంలో ఒక ప్యాసింజర్ హ్యాండ్ బ్యాగ్‌లో అనుమానాస్పద వస్తువు ఉన్నట్లు వారు గుర్తించారు. వెంటనే అప్రమత్తమై ఆ బ్యాగ్‌ను తెరిచి క్షుణ్ణంగా తనిఖీ చేయగా.. అందులో దాచిపెట్టిన ఓ పుర్రె (Skull) బయటపడింది.

అది కోతి పుర్రే అన్న ప్యాసింజర్

బ్యాగ్‌లో పుర్రెను చూసి విస్తుపోయిన భద్రతా సిబ్బంది ఆ ప్రయాణికుడిని విచారించగా.. అది ఒక కోతికి సంబంధించిన పుర్రె అని అతడు బదులిచ్చాడు. వెంటనే CISF అధికారులు ఆ స్కల్‌ను స్వాధీనం చేసుకుని, తదుపరి విచారణ నిమిత్తం సదరు ప్రయాణికుడిని స్థానిక పోలీసులకు అప్పగించారు.

దర్యాప్తు ముమ్మరం

ఇది వన్యప్రాణులకు సంబంధించిన (Wildlife) సున్నితమైన కేసు కావడంతో అధికారులు దీనిని సీరియస్‌గా తీసుకున్నారు. వన్యప్రాణి సంరక్షణ చట్టం, 1972 (Wildlife Protection Act, 1972) నిబంధనల కింద ప్రయాణికుడిపై కేసు నమోదు చేసి చట్టపరమైన చర్యలు ప్రారంభించినట్లు వెల్లడించారు.

అసలు ఆ కోతి పుర్రె అతనికి ఎక్కడి నుంచి వచ్చింది? దానిని ఢిల్లీ నుంచి హైదరాబాద్‌కు ఎందుకు తీసుకెళ్తున్నాడు? దీని వెనుక ఇంకెవరిదైనా హస్తం ఉందా? అన్న కోణంలో పోలీసులు, సంబంధిత శాఖల అధికారులు ప్రస్తుతం లోతైన దర్యాప్తు చేస్తున్నారు. వన్యప్రాణుల భాగాలను అక్రమంగా రవాణా చేయడం చట్టరీత్యా నేరం కావడంతో ఈ ఘటన ఇప్పుడు హాట్ టాపిక్‌గా మారింది.

CISF Detects Skull Concealed in Passenger’s Hand Baggage at IGI Airport, New Delhi

Alert CISF personnel deployed at IGI Airport, New Delhi, detected a skull concealed inside the hand baggage of a passenger during the Pre-Embarkation Security Check.

The passenger was scheduled… pic.twitter.com/BpC009joNq

— CISF (@CISFHQrs) August 12, 2026