Maharashtra Freedom of Religion Act 2026 | మహారాష్ట్రలో ఆగస్టు 28 నుంచి ‘మత మార్పిడి నిరోధక చట్టం’ అమలు.. గెజిట్ విడుదల, శిక్షల వివరాలు ఇవే!

Maharashtra Freedom of Religion Act 2026 | త్రినేత్ర.న్యూస్ : మహారాష్ట్ర ప్రభుత్వం (Maharashtra Government) సంచలన నిర్ణయం తీసుకుంది. తీవ్ర చర్చనీయాంశమైన 'మహారాష్ట్ర మత స్వాతంత్య్ర చట్టం - 2026' (Maharashtra Freedom of Religion Act) అమలు తేదీని అధికారికంగా ప్రకటించింది. హోం శాఖ ఇటీవల విడుదల చేసిన గెజిట్ నోటిఫికేషన్ (Gazette notification) ప్రకారం, ఈ చట్టం 2026 ఆగస్టు 28 నుంచి రాష్ట్రవ్యాప్తంగా అమల్లోకి రానుంది.

బలవంతంగా, మోసపూరితంగా, ప్రలోభాలకు గురిచేసి లేదా వివాహం పేరుతో జరిగే మత మార్పిడులను (Religious conversions) అడ్డుకోవడమే ఈ చట్టం ప్రధాన ఉద్దేశం. దేవేంద్ర ఫడ్నవీస్ ప్రభుత్వం ఈ ఏడాది మార్చి 17న అసెంబ్లీలో 'ఫ్రీడమ్ ఆఫ్ రిలీజియన్ బిల్లు - 2026' ముసాయిదాను ప్రవేశపెట్టింది. దేశంలోని పలు ప్రాంతాల్లో బలవంతపు, వ్యవస్థీకృత మత మార్పిడులు జరుగుతున్నాయని..పేదలు, బడుగు బలహీన వర్గాలను ప్రలోభపెట్టి లక్ష్యంగా చేసుకుంటున్నారని ప్రభుత్వం తన బిల్లు ఉద్దేశాల్లో పేర్కొంది. ఈ కొత్త చట్టంతో మత మార్పిడులను నియంత్రించే చట్టాలున్న ఉత్తరప్రదేశ్, గుజరాత్, మధ్యప్రదేశ్, కర్ణాటక, ఉత్తరాఖండ్ రాష్ట్రాల సరసన మహారాష్ట్ర కూడా చేరినట్లయింది.

కొత్త చట్టం ప్రకారం శిక్షలు ఎలా ఉంటాయంటే?

ఈ చట్టంలో కఠినమైన జైలు శిక్షలు, జరిమానాలకు సంబంధించిన నిబంధనలు పొందుపరిచారు.

వివాహం పేరుతో: పెళ్లి పేరుతో చట్టవిరుద్ధంగా మత మార్పిడికి పాల్పడితే ఏడేళ్ల వరకు జైలు శిక్షతో పాటు, రూ. లక్ష వరకు జరిమానా విధిస్తారు.

బలహీన వర్గాలైతే: మైనర్లు, మానసిక స్థితి సరిగా లేని వారు, మహిళలు లేదా ఎస్సీ/ఎస్టీ (SC/ST) వర్గాలకు చెందిన వారిని మతం మార్పిస్తే ఏడేళ్ల జైలు శిక్ష, రూ. 5 లక్షల వరకు జరిమానా పడుతుంది.

సామూహిక మార్పిడులు: సామూహికంగా మత మార్పిడులకు పాల్పడినా ఏడేళ్ల జైలు, రూ. 5 లక్షల జరిమానా విధిస్తారు.

పునరావృతమైతే: నేరం పదేపదే చేస్తే గరిష్టంగా 10 ఏళ్ల వరకు జైలు శిక్ష, రూ. 5 లక్షల జరిమానా విధించే అవకాశం ఉంది.

అలాగే ఈ చట్టం ప్రకారం.. చట్టవిరుద్ధమైన మత మార్పిడిపై ఎవరైనా ఫిర్యాదు చేస్తే ఆయా పోలీసు స్టేషన్ ఇన్‌చార్జి తప్పనిసరిగా కేసు నమోదు చేయాల్సిందే. బహుమతులు, డబ్బు, ఉద్యోగం, ఉచిత విద్య, మెరుగైన జీవనశైలి లేదా దైవిక స్వస్థత (Divine healing) పేరుతో ఆశ చూపి మతం మార్చడాన్ని "ప్రలోభం" (Allurement) కింద పరిగణించి చట్టపరంగా చర్యలు తీసుకుంటారు.

రాజకీయ వర్గాల స్పందన

మహారాష్ట్ర అసెంబ్లీలో ఉద్ధవ్ ఠాక్రే నేతృత్వంలోని శివసేన (UBT) ఈ బిల్లుకు మద్దతు తెలిపింది. మత స్వేచ్ఛ అనేది రాజ్యాంగ హక్కు అయినప్పటికీ.. బెదిరింపులు, మోసాల ద్వారా మతం మార్చడాన్ని తాము వ్యతిరేకిస్తామని ఠాక్రే స్పష్టం చేశారు.

అయితే, ఏఐఎంఐఎం (AIMIM) అధినేత అసదుద్దీన్ ఒవైసీ ఈ చట్టాన్ని తీవ్రంగా తప్పుబట్టారు. ఇది ప్రాథమిక హక్కుల ఉల్లంఘన అని, ఇప్పటికే ఉన్న చట్టాల కంటే ఇది అత్యంత దారుణమైనదని (Worse than the worst) ఆయన విమర్శించారు. ఈ చట్టం నిజమైన మత మార్పిడులను కూడా నేరంగా పరిగణిస్తుందని, ఇది భిన్న మతాలకు చెందిన జంటలు పెళ్లి చేసుకోవడాన్ని ప్రమాదకరంగా మారుస్తుందని ఆయన ఎక్స్ వేదికగా ఆందోళన వ్యక్తం చేశారు.

Maharashtra Freedom of Religion Act will be implemented from 28th August 2026, Rakshabandhan. Gazette notification published for this. pic.twitter.com/si7sMJaZOh

— ANI (@ANI) August 18, 2026