Karur Stampede | కరూర్ బాధితుల ఉద్యోగాలపై హైకోర్టు వేటు.. సీఎం విజయ్ ప్రభుత్వానికి భారీ షాక్!

Karur Stampede | త్రినేత్ర.న్యూస్ : తమిళనాడు ముఖ్యమంత్రి విజయ్ (CM Vijay) నేతృత్వంలోని టీవీకే (TVK) ప్రభుత్వానికి మద్రాస్ హైకోర్టులో భారీ ఎదురుదెబ్బ తగిలింది. గతేడాది సెప్టెంబర్‌లో కరూర్‌లో జరిగిన తొక్కిసలాట (Karur stampede) బాధితుల కుటుంబాలకు కారుణ్య నియామకాల కింద ఇచ్చిన ప్రభుత్వ ఉద్యోగాల (Government jobs) ఆదేశాలను కోర్టు సోమవారం రద్దు చేసింది. ఈ నియామకాలను సవాలు చేస్తూ దాఖలైన ప్రజా ప్రయోజన వాజ్యాలపై (PILs) విచారణ జరిపిన ధర్మాసనం ఈ కీలక తీర్పును వెలువరించింది.

ఆర్టికల్ 14, 16ల ఉల్లంఘనే

రాజ్యాంగం కల్పించిన సమానత్వపు హక్కు (Article 14), ప్రభుత్వ ఉద్యోగాల్లో సమాన అవకాశాల హక్కు (Article 16)ను ఈ నియామకాలు ఉల్లంఘిస్తున్నాయని మద్రాస్ హైకోర్టు స్పష్టం చేసింది. ఇలాంటి కేసుల్లో పరిహారంగా ప్రభుత్వ ఉద్యోగాలు ఇచ్చుకుంటూ పోతే.. భవిష్యత్తులో ప్రభుత్వ బస్సు ప్రమాదాలు లేదా శివకాశి బాణసంచా కర్మాగారాల పేలుళ్లు వంటి పారిశ్రామిక ప్రమాదాల్లో సైతం ఇలాంటి డిమాండ్లే తెరపైకి వస్తాయని కోర్టు ఆందోళన వ్యక్తం చేసింది.

తమిళనాడు పబ్లిక్ సర్వీస్ కమిషన్ (TNPSC) ద్వారా రిక్రూట్‌మెంట్ (Recruitment) కోసం రాష్ట్రంలో వేలాది మంది యువత ఏళ్ల తరబడి ఎదురుచూస్తున్నారని కోర్టు ఈ సందర్భంగా గుర్తుచేసింది. బాధితులకు ప్రభుత్వ ఉద్యోగాలు ఇవ్వడం కంటే నైపుణ్యాభివృద్ధి (Skill development) శిక్షణ, జీవనోపాధి కల్పన వంటివి మెరుగైన, స్థిరమైన పునరావాస చర్యలని ధర్మాసనం సూచించింది.

కన్నీటి పర్యంతమైన విజయ్.. ఇప్పుడేమో

సెప్టెంబర్ 2025లో డీఎంకే (DMK) అధికారంలో ఉన్న సమయంలో.. కరూర్‌లో జరిగిన టీవీకే ర్యాలీలో భారీ తొక్కిసలాట జరిగి పిల్లలు సహా 41 మంది ప్రాణాలు కోల్పోయారు. సీఎం బాధ్యతలు చేపట్టిన తర్వాత తొలిసారి ఈ జులై 10న కరూర్ వెళ్లిన విజయ్.. 32 మంది బాధిత కుటుంబ సభ్యులకు స్వయంగా అపాయింట్‌మెంట్ ఆర్డర్స్ (Appointment orders) అందజేశారు. ఈ కార్యక్రమం సందర్భంగా బాధితులను అక్కున చేర్చుకుని ఆయన కన్నీటి పర్యంతమయ్యారు. కరూర్ ఘటన తనను ఇంకా బాధిస్తున్న తీరని గాయమని భావోద్వేగానికి గురయ్యారు. అయితే, ఆ ఉద్యోగాలు ఇప్పుడు కోర్టు రద్దు చేయడంతో ఆ కుటుంబాల్లో ఆందోళన మొదలైంది.

సుప్రీంకోర్టుకు టీవీకే సర్కార్?

మద్రాస్ హైకోర్టు తీర్పుపై సుప్రీంకోర్టును (Supreme Court) ఆశ్రయించాలని టీవీకే ప్రభుత్వం భావిస్తున్నట్లు విశ్వసనీయ వర్గాల సమాచారం. మరోవైపు, సుప్రీంకోర్టు ఆదేశాల మేరకు ఈ తొక్కిసలాట ఘటనపై సీబీఐ (CBI) దర్యాప్తు ముమ్మరంగా కొనసాగుతోంది. ఈ ప్రమాదానికి విజయ్ ఆలస్యంగా రావడమే కారణమని పోలీసులు ఆరోపించగా.. మాజీ మంత్రి సెంథిల్ బాలాజీ కుట్ర, పోలీసుల వైఫల్యమే దీనికి కారణమని టీవీకే మొదటి నుంచీ వాదిస్తోంది.

మరోవైపు, నిబంధనలను తుంగలో తొక్కి రాజకీయ ప్రయోజనాల కోసం కారుణ్య నియామకాలు చేపట్టడం యువతకు ద్రోహం చేయడమేనని ఏఐఏడీఎంకే (AIADMK) సీనియర్ నేత ఆర్.బి. ఉదయకుమార్ విమర్శించారు. ప్రభుత్వ ఉద్యోగాల భర్తీ కేవలం TNPSC ద్వారానే జరగాలని ఆయన డిమాండ్ చేశారు.