ISRO | ఇస్రో ప్రైవేటీక‌ర‌ణ ఉండ‌దు.. ఇస్రో చీఫ్ స్ప‌ష్టీక‌ర‌ణ‌

ISRO | త్రినేత్ర‌.న్యూస్ : భార‌త అంత‌రిక్ష ప‌రిశోధ‌నా సంస్థ ఇస్రో (ISRO) ప్రైవేటీక‌ర‌ణ‌పై ర‌క‌ర‌కాలుగా ప్ర‌చారం జ‌రుగుతున్న విష‌యం తెలిసిందే. ఈ ప్ర‌చారంపై ఇస్రో చీఫ్ (Isro Chairman) డాక్టర్ వి. నారాయణన్ (Dr V. Narayanan) స్పందించారు. ఇస్రో ప్రైవేటీక‌ర‌ణ ఉండ‌ద‌ని స్ప‌ష్టం చేశారు. సంస్థ ప్రాధాన్యతను తగ్గించే ప్రసక్తే లేదని తేల్చి చెప్పారు. ఈ విష‌యంలో ఉద్యోగుల ఆందోళనలను పరిష్కరిస్తామని తెలిపారు. ఇస్రో భవిష్యత్తు, ఉద్యోగుల పాత్రపై కొన్ని ఉద్యోగ సంఘాలు అధికారిక స్పష్టత కోరిన నేపథ్యంలో ఆయ‌న ఈ ప్ర‌క‌ట‌న చేశారు.

బెంగళూరు స్పేస్ ఎక్స్‌పో (Bengaluru Space Expo)లో ఆయ‌న మాట్లాడారు. అంతరిక్ష రంగ సంస్కరణలు ఆరేళ్ల క్రిత‌మే ప్రారంభ‌మైన‌ట్లు చెప్పారు. ప్రైవేట్ రంగానికి చేయూతనిస్తూ అంతరిక్ష రంగ వ్యవస్థను (ecosystem) వృద్ధి చేయ‌డ‌మే దీని ప్ర‌ధాన ఉద్దేశం అని నొక్కి చెప్పారు. భార‌త అంత‌రిక్ష కార్య‌క్ర‌మంలో ప్రైవేట్ ప‌రిశ్ర‌మ‌ల పాత్ర ఎప్ప‌టి నుంచో ఉంద‌ని పేర్కొన్నారు. పీఎస్ఎల్‌వీ, జీఎస్ఎల్‌వీ ప్ర‌యోగానికి సంబంధించిన బ‌డ్జెట్‌లో దాదాపు 80 శాతం మేర భార‌తీయ ప‌రిశ్ర‌మ‌లే పెట్టుబ‌డి పెడుతున్నాయ‌ని వివ‌రించారు. సుమారు 450 ప‌రిశ్ర‌మ‌లు త‌మ‌తో క‌లిసి ప‌నిచేస్తున్నట్లు వెల్ల‌డించారు.

భారతదేశం తన ప్రయోగ సామర్థ్యాన్ని గణనీయంగా పెంచుకోవాలని లక్ష్యంగా పెట్టుకుందని ఈ సంద‌ర్భంగా నారాయ‌ణ‌న్ తెలిపారు. దేశంలో లాంచ్ వెహికల్స్ అవసరం ఏటా సుమారు 50 దాకా ఉంటుందని అంచనా వేశారు. ఈ భారీ లక్ష్యాన్ని సాధించాలంటే ఇస్రోతో పాటు భారతీయ పరిశ్రమల భాగస్వామ్యం మరింతగా ఉండాలని అభిప్రాయ‌ప‌డ్డారు. ఈ సంద‌ర్భంగా ఇస్రో ప్రైవేటీకరణపై వ‌స్తున్న వార్త‌ల‌ను ఆయ‌న కొట్టిపారేశారు. ఇస్రోలో మొత్తం 20,000 మంది ఉద్యోగులున్నారని చెప్పారు. ఉద్యోగులంద‌రితో మాట్లాడి వారి ఆందోళ‌న‌ల‌ను ప‌రిష్క‌రిస్తామ‌ని హామీ ఇచ్చారు. ఇస్రో ప్రాముఖ్య‌త‌ను త‌గ్గించే ప్ర‌స‌క్తే లేద‌ని తేల్చి చెప్పారు.

Also Read..

విమానం 36 వేల అడుగుల‌ ఎత్తులో ఉండ‌గా.. ఇంజిన్‌-1లో త‌గ్గిపోయిన ఆయిల్‌

టాక్సిక్‌కు దెబ్బ మీద దెబ్బ.. ఓటీటీ రైట్స్ విష‌యంలో దారుణంగా..!

రేపు 1000 డప్పులతో కేసీఆర్ ఫామ్‌హౌస్‌ను ముట్టడిస్తాం: దేవని సతీష్ మాదిగ