Indian Army | ఇండియ‌న్ ఆర్మీలో టెక్నిక‌ల్ ఆఫీస‌ర్లు.. అవివాహిత పురుషులు అర్హులు..

Indian Army | త్రినేత్ర‌.న్యూస్‌: ఇంజినీరింగ్ అభ్యర్థులకు ఇండియ‌న్ ఆర్మీ (Indian Army) అద్భుత‌మైన అవ‌కాశం క‌ల్పిస్తున్న‌ది. ఆక‌ర్ష‌ణీయ‌మైన వేత‌నంతోపాటు, దేశ సేవ‌కు బాట‌లు వేస్తున్న‌ది. 2027 ఏప్రిల్​లో ప్రారంభమయ్యే 68వ షార్ట్ సర్వీస్ కమిషన్ (Technical) కోర్సులో ప్రవేశాల కోసం 350 టెక్నికల్ ఆఫీసర్ (Technical Officer) పోస్టుల భర్తీకి నోటిఫికేషన్ విడుదల చేసింది. రాత పరీక్ష లేకుండా కేవలం ఇంటర్వ్యూతోనే ఈ ఉద్యోగాలను భర్తీ చేస్తున్నది. అర్హ‌త‌, ఆసక్తి క‌లిగిన‌వారు ఆగస్టు 7 వరకు అధికారిక వెబ్​సైట్​లో www.joinindianarmy.nic.in. ద‌ర‌ఖాస్తు చేసుకోవ‌చ్చు. అవివాహిత పురుషులు మాత్ర‌మే అర్హులు. ఎలక్ట్రికల్, సివిల్, కంప్యూటర్ సైన్స్, ఎలక్ట్రానిక్స్ అండ్‌ కమ్యూనికేషన్, మెకానికల్, ఎంఐఎస్సీ ఇంజినీరింగ్‌ విభాగాల్లో ఈ ఖాళీలు ఉన్నాయి. ఎంపికైనవారికి ప్ర‌తి నెల రూ.56,100 నుంచి రూ.1,77,500 జీతంతో పాటు ఇతర అలవెన్సులు లభిస్తాయి.

షార్ట్‌ సర్వీస్‌ కమీషన్‌ (టెక్‌)-68 పురుషులు - 350 పోస్టులు
అర్హతలు: ఎలక్ట్రికల్, సివిల్, కంప్యూటర్ సైన్స్, ఎలక్ట్రానిక్స్ అండ్‌ కమ్యూనికేషన్, మెకానికల్, ఎంఐఎస్సీ ఇంజినీరింగ్ బ్రాంచ్‌ల‌తో బీఈ/బీటెక్ పూర్తిచేసి ఉండాలి. ప్రస్తుతం చివరి ఏడాది చదువుతున్న విద్యార్థులు కూడా ద‌ర‌ఖాస్తు చేసుకోవచ్చు. అయితే, నిర్ణీత తేదీలోపు అవసరమైన ధ్రువపత్రాలు సమర్పించాలి. 2027 ఏప్రిల్ 1 నాటికి 20 నుంచి 27 ఏండ్ల‌ మధ్య ఉండాలి. అంటే, 2000 ఏప్రిల్ 1 నుంచి 2007 ఏప్రిల్ 1 మధ్య జన్మించి ఉండాలి.

ఫిజికల్ స్టాండర్డ్స్: 2.4 కి.మీ. పరుగు 10.30 నిమిషాల్లోనే పూర్తి చేయాలి. పుష్-అప్స్ 40, పుల్-అప్స్ 6; సిట్‌ అప్స్‌- 30 తీసే శారీరక సామర్థ్యం ఉండాలి. అదేవిధంగా ఈతలో ప్రాథమిక పరిజ్ఞానం ఉండాలి.

ఎంపిక విధానం: డిగ్రీలో వ‌చ్చిన మార్కుల ఆధారంగా షార్ట్‌లిస్ట్ చేసిన‌వారిని ఇంట‌ర్వ్యూకి పిలుస్తారు. ఎస్‌ఎస్‌బీ ఇంటర్వ్యూ (స్టేజ్‌-1, స్టేజ్‌-2), వైద్య పరీక్షలు, మెరిట్ ప్ర‌కారం ఎంపిచేస్తారు. శిక్ష‌ణ‌ సమయంలో అభ్యర్థులకు నెలకు రూ.56,100 స్టైపెండ్ చెల్లిస్తారు.
దరఖాస్తులు: ఆన్‌లైన్‌లో
దరఖాస్తుకు చివ‌రి తేదీ: ఆగస్టు 7
ఎస్‌ఎస్‌బీ ఇంటర్వ్యూ కేంద్రాలు: బెంగళూరు, భోపాల్, ప్రయాగ్‌రాజ్‌, జలంధర్‌.
వెబ్​సైట్: www.joinindianarmy.nic.in