India becomes 4th largest economy | జపాన్‌ను వెనక్కి నెట్టి ప్రపంచంలోనే 4వ అతిపెద్ద ఆర్థిక వ్యవస్థగా భారత్.. 2030 నాటికి మూడో స్థానమే లక్ష్యం

India becomes 4th largest economy | భారత ఆర్థిక వ్యవస్థ మరో మైలురాయిని అధిగమించింది. జపాన్ను వెనక్కి నెట్టి ప్రపంచంలోనే నాలుగో అతిపెద్ద ఆర్థిక వ్యవస్థగా భారత్ అవతరించింది. ప్రస్తుతం భారత జీడీపీ (GDP) విలువ 4.18 ట్రిలియన్ డాలర్లకు చేరుకుందని ప్రభుత్వ గణాంకాలు వెల్లడించాయి. ఇదే జోరు కొనసాగితే, 2030 నాటికి జర్మనీని సైతం దాటేసి భారత్ ప్రపంచంలోనే మూడో అతిపెద్ద ఆర్థిక శక్తిగా నిలుస్తుందని కేంద్ర ప్రభుత్వం ధీమా వ్యక్తం చేసింది. ఆరు త్రైమాసికాల గరిష్ఠ స్థాయి ప్రస్తుతం ప్రపంచ వాణిజ్యంలో అనిశ్చితి నెలకొన్న విషయం తెలిసిందే. అయినా కూడా భారత్ మాత్రం ఏమాత్రం వెనకడుగు వేయకుండా ఆర్థిక వృద్ధిని కొనసాగించింది. దానికి ఫలితమే 2025-26 ఆర్థిక సంవత్సరం రెండో త్రైమాసికంలో భారత్ రియల్ జీడీపీ 8.2 శాతం వృద్ధిని నమోదు చేసింది. మొదటి త్రైమాసికంలో జీడీపీ 7.8 శాతం ఉండగా.. 2024-25 ఆర్థిక సంవత్సరంలో జీడీపీ 7.4 శాతంగా ఉంది. గత ఆరు త్రైమాసికాలను పొల్చి చూస్తే అత్యధిక వృద్ధి రేటు ఇదే కావడం గమనార్హం. భారత ఆర్థిక వ్యవస్థ ఇంత పటిష్ఠం కావడానికి ప్రభుత్వం చేపడుతున్న వ్యవస్థాగత సంస్కరణలు, దేశీయ వినియోగం ప్రధాన కారణాలని నివేదిక చెబుతోంది. 2047 నాటికి అభివృద్ధి చెందిన దేశంగా భారత్ ప్రపంచంలోని ప్రధాన ఆర్థిక వ్యవస్థల్లో భారత్ అత్యంత వేగంగా దూసుకుపోతోందని.. 2047 నాటికి భారత్ ఎట్టి పరిస్థితుల్లోనూ అభివృద్ధి చెందిన దేశంగా మారాలనే లక్ష్యంతోనే తాము ముందుకెళ్తున్నామని.. వ్యవస్థాగత సంస్కరణలు, సామాజిక పురోగతే.. భారత్ ఆర్థిక వృద్ధికి వెన్నెముకగా నిలిచాయని భారత ప్రభుత్వం ప్రకటించింది. ధరల నియంత్రణ, తగ్గుతున్న నిరుద్యోగం, పెరుగుతున్న ఎగుమతులే దేశ ఆర్థిక వ్యవస్థను బలోపేతం చేశాయని ప్రభుత్వం స్పష్టం చేసింది. తొలి స్థానంలో అమెరికా.. రెండో స్థానంలో చైనా ప్రస్తుతం అమెరికా ప్రపంచంలోనే మొదటి అతి పెద్ద ఆర్థిక వ్యవస్థగా ఉంది. చాలా ఏళ్ల నుంచి అమెరికానే తొలి స్థానంలో కొనసాగుతుండగా.. దాని తర్వాత చైనా రెండో స్థానంలో ఉంది. జర్మనీ మూడో స్థానంలో కొనసాగుతోంది. నాలుగో స్థానంలో ఉన్న జపాన్ని భారత్ వెనక్కి నెట్టింది. 2030 నాటికి భారత్ 7.3 ట్రిలియన్ డాలర్ల ఆర్థిక వ్యవస్థగా ఎదిగి, జర్మనీని కూడా దాటే ప్రణాళికలను అమలు చేస్తోంది.