India Economy | ఈ ఏడాది భార‌త్ వృద్ధి రేటు 7.3.. ఐక్య‌రాజ్య‌స‌మితి సంస్థ అంచ‌నా..

India Economy | ప్రపంచ ఆర్థిక వృద్ధి, అంతర్జాతీయ వాణిజ్యం మందగిస్తున్నప్పటికీ.. 2026లో ప్రపంచంలోనే అత్యంత వేగంగా వృద్ధి చెందుతున్న పెద్ద ఆర్థిక వ్యవస్థగా భారత్‌ కొనసాగనుందని ఐక్యరాజ్యసమితి వాణిజ్య, అభివృద్ధి సంస్థ అంచనా వేసింది. 2026లో భారత్‌ ఆర్థిక వృద్ధి రేటు 7.3 శాతంగా ఉంటుందని పేర్కొంది. ఐక్యరాజ్యసమితి వాణిజ్య, అభివృద్ధి సంస్థ విడుదల చేసిన ట్రేడ్ అండ్ డెవలప్‌మెంట్ రిపోర్ట్ 2026లో ఈ వివరాలను వెల్లడించింది. ప్రపంచ ఆర్థిక వృద్ధికి ఆసియా ప్రాధాన్యమైన కేంద్రంగా మారుతోందని నివేదిక పేర్కొంది. అయితే భౌగోళిక రాజకీయ ఉద్రిక్తతలు, ఇంధన ధరల షాక్‌లు, అభివృద్ధి చెందుతున్న దేశాలకు ఆర్థిక వనరులు సమానంగా అందకపోవడం వంటి అంశాలు ప్రపంచ ఆర్థిక వ్యవస్థపై ప్రతికూల ప్రభావం చూపే అవకాశం ఉందని హెచ్చరించింది.

ప్ర‌పంచ ఆర్థిక వ్య‌వ‌స్థ వృద్ధి త‌క్కువే..

2026లో ప్రపంచ ఆర్థిక వ్యవస్థ 2.6 శాతం వృద్ధి చెందుతుందని సంస్థ అంచనా వేసింది. 2025లో నమోదైన 2.9 శాతం వృద్ధితో పోలిస్తే ఇది తక్కువ. అభివృద్ధి చెందుతున్న దేశాల ఆర్థిక వృద్ధి కూడా 2025లోని 4.7 శాతం నుంచి 2026లో 4 శాతానికి తగ్గే అవకాశం ఉందని నివేదిక తెలిపింది. బాహ్య ఒత్తిళ్లు, కొనసాగుతున్న ఆర్థిక అసమానతలు ఇందుకు ప్రధాన కారణాలని పేర్కొంది. 2026లో ప్రపంచ ఆర్థిక వృద్ధిలో ఆసియా ఏకంగా 59 శాతం వాటాను అందించనుందని నివేదిక అంచనా వేసింది. భారత్‌, ఇండోనేషియా, చైనా ఈ ప్రాంతంలోని ప్రధాన వృద్ధి చోదక శక్తులుగా నిలవనున్నాయి. భారత్‌ 7.3 శాతం వృద్ధితో ముందుండగా, ఇండోనేషియా 5.2 శాతం, చైనా 4.5 శాతం వృద్ధి సాధించవచ్చని అంచనా. భారత్‌లో బలమైన దేశీయ డిమాండ్‌, విస్తరిస్తున్న తయారీ సామర్థ్యం, మౌలిక సదుపాయాలపై కొనసాగుతున్న ప్రభుత్వ పెట్టుబడులు ఆర్థిక వృద్ధికి మద్దతుగా నిలుస్తున్నాయని నివేదిక పేర్కొంది. అంతర్జాతీయ ఆర్థిక పరిస్థితులు అనిశ్చితంగా ఉన్నప్పటికీ ఈ అంశాలు భారత్‌ వృద్ధి వేగాన్ని కొనసాగించేందుకు సహాయపడతాయని తెలిపింది.

వెనుక‌బ‌డుతున్న దేశాలు..

అయితే కొన్ని ప్రముఖ ఆసియా ఆర్థిక వ్యవస్థలు చూపిస్తున్న స్థిరత్వాన్ని అభివృద్ధి చెందుతున్న దేశాలన్నింటికీ వర్తింపజేయలేమని సంస్థ హెచ్చరించింది. 2010ల మధ్యకాలం నుంచి అనేక అభివృద్ధి చెందుతున్న దేశాలు మరింత వెనుకబడిపోయాయని, ప్రపంచ ఆర్థిక వృద్ధి ప్రయోజనాలు సమానంగా పంపిణీ కావడం లేదని పేర్కొంది. 2025లో ప్రపంచ వాణిజ్యం రికార్డు స్థాయిలో 35 ట్రిలియన్ డాలర్లకు చేరుకుంది. సాయుధ ఘర్షణలు, పెరుగుతున్న వాణిజ్య ఆంక్షలు ఉన్నప్పటికీ ఈ స్థాయికి చేరడం గమనార్హం. అయితే 2026లో వస్తువులు, సేవల అంతర్జాతీయ వాణిజ్య వృద్ధి 4 శాతానికి తగ్గే అవకాశం ఉంది. 2025లో ఇది 4.4 శాతంగా ఉంది. ఇంధన మార్కెట్లలో అంతరాయాలు, భౌగోళిక రాజకీయ ఘర్షణలు, కఠినమైన ఆర్థిక పరిస్థితులు, సరఫరా గొలుసుల్లో సమస్యలు ప్రపంచ వాణిజ్యంపై ఒత్తిడిని పెంచుతున్నాయి. ఇంధన ధరలు పెరిగితే ఉత్పత్తి, రవాణా వ్యయాలు కూడా పెరిగే అవకాశం ఉంది. ముఖ్యంగా దిగుమతి చేసుకునే ఇంధనంపై ఆధారపడే దేశాలపై దీని ప్రభావం ఎక్కువగా ఉంటుంద‌ని నివేదిక తెలిపింది.

అమెరికా, చైనా మ‌ధ్య త‌గ్గిన వాణిజ్యం..

వాణిజ్య ఆంక్షలు, ఎగుమతి నియంత్రణలు, పెట్టుబడుల పరిశీలన వంటి చర్యలు అంతర్జాతీయ వాణిజ్య విధానాలను కూడా మార్చుతున్నాయి. 2024తో పోలిస్తే చైనా, అమెరికా మధ్య వాణిజ్యం 20 శాతానికి పైగా తగ్గిందని నివేదిక పేర్కొంది. ఇది మారుతున్న ప్రపంచ వాణిజ్య సంబంధాలకు సంకేతంగా నిలుస్తోంది. కృత్రిమ మేధకు సంబంధించిన ఉత్పత్తులు, ముఖ్యంగా డేటా కేంద్రాల్లో ఉపయోగించే అధునాతన కంప్యూటింగ్ పరికరాలు, ప్రపంచ వస్తు వాణిజ్యానికి ముఖ్యమైన వృద్ధి చోదక శక్తులుగా మారాయని నివేదిక పేర్కొంది. అయితే కృత్రిమ మేధ విస్తరణ ద్వారా లభిస్తున్న ప్రయోజనాలు ప్రస్తుతం పరిమిత సంఖ్యలోని దేశాలు, సరఫరాదారుల వద్దే ఎక్కువగా కేంద్రీకృతమవుతున్నాయని తెలిపింది.

ఇవే కార‌ణాలు..

ఇంధన ధరల షాక్‌, కృత్రిమ మేధ ఆధారిత వృద్ధిపై ఉన్న అనిశ్చితి, అభివృద్ధి కోసం అందుబాటులో ఉన్న ఆర్థిక సహాయం తగ్గిపోవడం వంటి అంశాలు కూడా ప్రమాదాలను పెంచుతున్నాయని సంస్థ పేర్కొంది. ఈ పరిణామాలు అభివృద్ధి చెందిన దేశాలు, అభివృద్ధి చెందుతున్న దేశాల మధ్య ఆర్థిక అసమానతలను మరింత పెంచే అవకాశం ఉందని హెచ్చరించింది. అయినప్పటికీ 2026లో ప్రపంచ ఆర్థిక విస్తరణకు ఆసియా ప్రధాన ఇంజిన్‌గా కొనసాగుతుందని నివేదిక అంచనా వేసింది. ముఖ్యంగా 7.3 శాతం వృద్ధి అంచనాతో భారత్‌ ప్రపంచ ఆర్థిక అనిశ్చితి మధ్య కీలకమైన స్థిరత్వాన్ని అందించే ఆర్థిక వ్యవస్థగా నిలవనుందని ఐక్యరాజ్యసమితి వాణిజ్య, అభివృద్ధి సంస్థ పేర్కొంది.