PM Modi Bloomberg Forum | ఎవరి నష్టంతోనో మనం ఎదగడం లేదు.. ప్రపంచంతో పాటే భారత్ ప్రగతి

• బ్లూమ్‌బెర్గ్ ఫోరమ్‌లో ప్రధాని మోదీ ఘన నినాదం

PM Modi Bloomberg Forum | త్రినేత్ర న్యూస్ :  ప్రపంచవ్యాప్తంగా యుద్ధాలు, సప్లై చైన్ అంతరాయాలు, అనిశ్చితులు నెలకొన్న వేళ భారతదేశం ప్రపంచానికి ఒక విశ్వసనీయమైన భాగస్వామిగా ముందుకొచ్చిందని ప్రధాని నరేంద్ర మోదీ స్పష్టం చేశారు. మంగళవారం జరిగిన ప్రతిష్టాత్మక బ్లూమ్‌బెర్గ్ న్యూ ఎకానమీ ఫోరమ్‌లో ప్రసంగించిన ఆయన, "భారత్ ఎవరి నష్టంపైనో ఎదగడం లేదు. ప్రపంచంతో పాటే, ప్రపంచం మేలు కోసమే మన ప్రగతి సాగుతోంది" అని తేల్చిచెప్పారు. బలమైన ఆర్థిక పునాదులు, నిరంతర సంస్కరణలే దేశ వృద్ధిని ముందుకు నడిపిస్తున్నాయని పేర్కొన్నారు.

సంక్షోభాల వేళ భారత్ ఒక నమ్మకం

గత ఆరేళ్లలో కోవిడ్ సంక్షోభం, ప్రాంతీయ యుద్ధాలు, వాణిజ్యపరమైన ఆంక్షలు ప్రపంచాన్ని కుదిపేశాయని ప్రధాని గుర్తుచేశారు. ఒకప్పుడు దేశాలను కలిపిన అంశాలే ఇప్పుడు ఆయుధాలుగా మారుతున్నాయని ఆందోళన వ్యక్తం చేశారు. ఇలాంటి క్లిష్ట పరిస్థితుల్లో అంతర్జాతీయంగా అత్యంత అవసరమైనది 'నమ్మకం' అని, ఆ నమ్మకానికి అసలైన చిరునామా భారతదేశమేనని వివరించారు. మానవాళికి భారత్ 'సున్నా'ను ఇచ్చినా ఎన్నడూ రాయల్టీ కోరలేదని, మన శక్తిని ఇతరులకు కొత్త అవకాశాలు సృష్టించేందుకు వినియోగిస్తున్నామని స్పష్టం చేశారు.

7.8 శాతం వృద్ధి.. 700 బిలియన్ డాలర్ల నిల్వలు

భారత ఆర్థిక వ్యవస్థ పటిష్టతను గణాంకాలతో సహా ప్రధాని వివరించారు. ఏప్రిల్–జూన్ త్రైమాసికంలో దేశ జీడీపీ వృద్ధి రేటు 7.8 శాతంగా నమోదైందని, కరెంట్ అకౌంట్ లోటు 0.61 శాతానికి తగ్గిందని వెల్లడించారు. విదేశీ మారకద్రవ్య నిల్వలు (ఫారెక్స్) 700 బిలియన్ డాలర్లను అధిగమించాయని, దశాబ్దాల కాలంలో ఎన్నడూ లేనంత బలంగా మన బ్యాంకింగ్ వ్యవస్థ ఉందని తెలిపారు. ఈ పటిష్టతే భారత సావరిన్ రేటింగ్‌లను మరింత పెంచుతోందని చెప్పారు.

Speaking at the Bloomberg New Economy Forum. https://t.co/H91kiKqNQ8

— Narendra Modi (@narendramodi) October 13, 2026

సంస్కరణలు బలవంతం కాదు.. మన నిబద్ధత

ఆర్థిక ప్రయాణంలో సంస్కరణల ప్రాధాన్యతను వివరిస్తూ, "మాకు రిఫార్మ్స్ అనేవి ఏదో ఒత్తిడి వల్ల చేస్తున్న బలవంతపు చర్యలు కావు. అవి మా సిద్ధాంతం, మా నిబద్ధత" అని స్పష్టం చేశారు. జీఎస్టీతో పన్నుల గందరగోళాన్ని తొలగించామని, 29 కార్మిక చట్టాలను 4 సరళమైన కోడ్‌లుగా మార్చామని, వందలాది వ్యాపార నిబంధనలను నేరరహితం (డీక్రిమినలైజ్) చేశామని ప్రధాని గుర్తుచేశారు.

అందరికీ అందుబాటులో సాంకేతికత.. 2.5 లక్షల స్టార్టప్‌లు

దేశంలో సాంకేతికత పేద, ధనిక అంతరాలను తొలగిస్తోందని మోదీ అన్నారు. "మన దేశంలో ఒక చిన్న వీధి వ్యాపారి అయినా, ఒక పెద్ద లగ్జరీ కార్ల షోరూమ్ యజమాని అయినా ఒకే డిజిటల్ పేమెంట్ ప్లాట్‌ఫామ్‌ను ఉపయోగిస్తున్నారు. ఇదే సమ్మిళిత సాంకేతికత గొప్పతనం" అని ప్రశంసించారు. 2014కు ముందు కేవలం కొన్ని వందల సంఖ్యలో మాత్రమే ఉన్న స్టార్టప్‌లు నేడు 2.5 లక్షలను దాటాయని, వీటిలో దాదాపు సగం చిన్న నగరాల నుంచే వస్తుండగా, 45 శాతం స్టార్టప్‌లలో మహిళా డైరెక్టర్లు ఉన్నారని హర్షం వ్యక్తం చేశారు.

వేదాల్లోని 'సంగచ్ఛధ్వం సంవదధ్వం' (కలిసి నడుద్దాం.. కలిసి మాట్లాడుకుందాం) శ్లోకాన్ని ఉటంకిస్తూ, అందరం కలిసి పనిచేసినప్పుడే మానవాళి ముందున్న పెను సవాళ్లను సమష్టిగా పరిష్కరించుకోగలమని ప్రధాని మోదీ పిలుపునిచ్చారు.

Also Read | ప‌బ్‌లో ఏపీ ఐఏఎస్ వీరంగం.. బెంగ‌ళూరులో క్రిమిన‌ల్ కేసు న‌మోదు