India denies Elon Musk call | మోదీ-ట్రంప్ ఫోన్ కాల్‌లో ఎలాన్ మస్క్? వార్తలను ఖండించిన భారత్

• కాల్‌లో ఎలాన్ మస్క్ కూడా ఉన్నారన్న 'న్యూయార్క్ టైమ్స్' కథనాన్ని తోసిపుచ్చిన కేంద్రం
• పశ్చిమాసియాలో నెలకొన్న ఉద్రిక్తతలు, ఇరాన్ యుద్ధం, శాంతి స్థాపనపై ఇరువురు నేతల చర్చ
• ఇరాన్‌తో చర్చలకు అమెరికా సిద్ధంగా ఉందని, 15 అంశాల శాంతి ప్రణాళికను ప్రతిపాదించినట్లు అమెరికా రాయబారి స్టీవ్ విట్‌కాఫ్ వెల్లడి
• హార్ముజ్ జలసంధి మూసివేత ముప్పుతో అంతర్జాతీయంగా అమాంతం పెరిగిన చమురు ధరలు

India denies Elon Musk call | త్రినేత్ర.న్యూస్ : ఇరాన్‌పై యుద్ధం నేపథ్యంలో అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీల మధ్య మంగళవారం (మార్చి 24) జరిగిన ఫోన్ సంభాషణలో ప్రముఖ వ్యాపారవేత్త ఎలాన్ మస్క్ కూడా పాల్గొన్నారన్న వార్తలను కేంద్ర ప్రభుత్వం శనివారం తీవ్రంగా ఖండించింది. ఫిబ్రవరి 28న ఇరాన్‌పై ఇజ్రాయెల్, అమెరికా సంయుక్తంగా సైనిక దాడులు ప్రారంభించిన తర్వాత ఇద్దరు అగ్ర నేతల మధ్య జరిగిన తొలి ముఖాముఖి ఇది.

విదేశాంగ శాఖ స్పష్టీకరణ

ఈ వ్యవహారంపై భారత విదేశాంగ శాఖ అధికార ప్రతినిధి స్పందిస్తూ.. "మేము ఆ కథనాన్ని చూశాం. మార్చి 24న జరిగిన ఫోన్ సంభాషణ కేవలం ప్రధాని నరేంద్ర మోదీ, అధ్యక్షుడు డొనాల్డ్ ట్రంప్ మధ్య మాత్రమే జరిగింది" అని స్పష్టం చేశారు. పశ్చిమాసియాలో ప్రస్తుత పరిస్థితులపై ఇరువురు నేతలు అభిప్రాయాలను పంచుకున్నారని తెలిపారు.

న్యూయార్క్ టైమ్స్ కథనంలో ఏముంది?

పేరు చెప్పడానికి ఇష్టపడని అమెరికా అధికారులను ఉటంకిస్తూ న్యూయార్క్ టైమ్స్ ఓ కథనాన్ని ప్రచురించింది. "ఇద్దరు దేశాధినేతల మధ్య యుద్ధ సమయ సంక్షోభం గురించి జరుగుతున్న కాల్‌లో ఎలాన్ మస్క్ పాల్గొనడం అసాధారణం" అని అందులో పేర్కొంది. గతేడాది అమెరికా ప్రభుత్వంలో ఉద్యోగుల కోత విధింపు బాధ్యతలు చేపట్టిన మస్క్.. ఆ తర్వాత పదవి నుంచి తప్పుకున్నారు. అప్పటినుంచి ట్రంప్, మస్క్ మధ్య విభేదాలు ఉన్నట్లు వార్తలు వస్తున్న నేపథ్యంలో ఈ కాల్‌లో ఆయన ఎందుకు ఉన్నారో అర్థం కావడం లేదని ఆ కథనం పేర్కొంది.

హార్ముజ్ జలసంధి భద్రత అత్యవసరం: ప్రధాని మోదీ

ట్రంప్‌తో జరిగిన చర్చల వివరాలను ప్రధాని మోదీ 'ఎక్స్' వేదికగా పంచుకున్నారు. "అధ్యక్షుడు ట్రంప్ నుంచి నాకు ఫోన్ వచ్చింది. పశ్చిమాసియా పరిస్థితిపై మేము ఉపయోగకరమైన చర్చలు జరిపాము. ఈ ప్రాంతంలో ఉద్రిక్తతలు తగ్గి, వీలైనంత త్వరగా శాంతి నెలకొనాలని భారత్ కోరుకుంటోంది. హార్ముజ్ జలసంధి (Strait of Hormuz) అందరికీ అందుబాటులో, సురక్షితంగా ఉండటం ప్రపంచం మొత్తానికి చాలా అవసరం" అని ఆయన పేర్కొన్నారు.

ఇరాన్‌తో చర్చలకు అమెరికా ఆశాభావం

మరోవైపు ఇరాన్‌తో చర్చల పట్ల అమెరికా ఆశాభావం వ్యక్తం చేస్తోంది. ట్రంప్ ప్రత్యేక రాయబారి స్టీవ్ విట్‌కాఫ్ మియామీలో జరిగిన ఒక బిజినెస్ ఫోరమ్‌లో మాట్లాడుతూ.. "ఈ వారం వాషింగ్టన్‌తో ఇరాన్ చర్చలు జరుపుతుందని మేము విశ్వసిస్తున్నాము. అమెరికా సూచించిన 15-అంశాల శాంతి ప్రణాళికకు టెహ్రాన్ సానుకూలంగా స్పందిస్తుందని ఆశిస్తున్నాం. దీనిద్వారా సమస్యలన్నీ పరిష్కారం కావచ్చు" అని అన్నారు.

ఉద్రిక్తతల నడుమ పెరిగిన చమురు ధరలు

వ్యూహాత్మకంగా అత్యంత కీలకమైన హార్ముజ్ జలసంధి దాదాపుగా మూసుకుపోవడంతో అంతర్జాతీయ మార్కెట్లు కుప్పకూలాయి. ఉక్రెయిన్ యుద్ధం ప్రారంభమైన తర్వాత మునుపెన్నడూ లేని స్థాయికి చమురు ధరలు పెరిగాయి. ఏప్రిల్ 6 లోపు ఇరాన్ ఈ జలసంధిని తెరవకపోతే వారి ఇంధన స్థావరాలపై దాడులు తప్పవని ట్రంప్ హెచ్చరించారు. శుక్రవారం మూడు ఇరాన్ అణు కేంద్రాలు, రెండు స్టీల్ ప్లాంట్లపై దాడులు జరిగినట్లు ఇరాన్ మీడియా పేర్కొంది. అయితే అక్కడ ఎలాంటి రేడియోధార్మికత వెలువడలేదని అధికారులు తెలిపారు.

దీనికి ప్రతిగా ఇరాన్ రివల్యూషనరీ గార్డ్స్ తీవ్ర హెచ్చరికలు జారీ చేశారు. పారిశ్రామిక ప్రాంతాలపై తాము కూడా దాడులు చేస్తామని హెచ్చరించారు. ఇప్పటికే గల్ఫ్ ప్రాంతంతో పాటు అనేక ఇంధన స్థావరాలపై జరిగిన దాడులతో గల్ఫ్ దేశాల భద్రతపై తీవ్ర ఆందోళనలు వ్యక్తమవుతున్నాయి.

Received a call from President Trump and had a useful exchange of views on the situation in West Asia. India supports de-escalation and restoration of peace at the earliest. Ensuring that the Strait of Hormuz remains open, secure and accessible is essential for the whole world.…

— Narendra Modi (@narendramodi) March 24, 2026