US Iran Peace Memo | అమెరికా-ఇరాన్ యుద్ధానికి ముగింపు? ‘వన్-పేజీ’ ఒప్పందంతో శాంతి చర్చలకు మార్గం

• అమెరికా-ఇరాన్ మధ్య 14-పాయింట్ల 'వన్-పేజీ' శాంతి ఒప్పందం (MoU) దాదాపు ఖరారు
• యూరేనియం శుద్ధిని ఆపేందుకు ఇరాన్ అంగీకారం, బదులుగా ఇరాన్‌పై ఆంక్షల (sanctions) ఎత్తివేత
• స్తంభించిపోయిన బిలియన్ డాలర్ల ఇరాన్ ఆస్తులను విడుదల చేయనున్న అమెరికా
• కీలకమైన హార్ముజ్ జలసంధిలో (Strait of Hormuz) వాణిజ్య నౌకల రాకపోకలకు తిరిగి గ్రీన్ సిగ్నల్

US Iran Peace Memo | త్రినేత్ర.న్యూస్ : ప్రపంచ దేశాలను తీవ్ర ఆందోళనకు గురిచేసిన 2026 అమెరికా-ఇరాన్ యుద్ధం ముగింపు దశకు చేరుకున్నట్లు కనిపిస్తోంది. ఇరు దేశాల మధ్య శాంతిని నెలకొల్పే దిశగా వైట్ హౌస్ (White House) అడుగులు వేసింది. యాక్టివ్‌గా జరుగుతున్న దాడులను ఆపివేసి, అధికారికంగా శాంతి చర్చలు ప్రారంభించేందుకు వీలుగా ఒక 'వన్-పేజీ' అవగాహనా ఒప్పందం (MoU) కుదుర్చుకునేందుకు ఇరు వర్గాలు దాదాపు అంగీకారానికి వచ్చాయి. ఈ కీలకమైన టైమ్ లో, వచ్చే 48 గంటల్లో టెహ్రాన్ నుండి రాబోయే అధికారిక స్పందన కోసం అమెరికా ఆసక్తిగా ఎదురుచూస్తోంది.

న్యూక్లియర్ డీల్, ఆంక్షల ఎత్తివేత

ఈ 14-పాయింట్ల ప్రాథమిక ఒప్పందం ప్రకారం, ప్రధానంగా న్యూక్లియర్ (Nuclear) కార్యక్రమాలకు సంబంధించి ఇరాన్ ఒక మెట్టు దిగిరానుంది. అత్యంత వివాదాస్పదమైన యురేనియం శుద్ధిని తాత్కాలికంగా నిలిపివేసేందుకు ఇరాన్ అంగీకరించింది. దీనికి ప్రతిఫలంగా, అమెరికా విధించిన కఠిన ఆర్థిక ఆంక్షలను ఎత్తివేయడంతో పాటు, ఫ్రీజ్ చేసిన బిలియన్ డాలర్ల ఇరాన్ నిధులను అమెరికా విడుదల చేయనుంది.

హార్ముజ్ జలసంధిలో టెన్షన్స్ కు బ్రేక్

గ్లోబల్ ట్రేడ్ కు అత్యంత కీలకమైన 'హార్ముజ్ జలసంధి' (Strait of Hormuz) గుండా నౌకల రాకపోకలపై ఉన్న ఆంక్షలను సడలించేందుకు రెండు దేశాలు అంగీకరించాయి. ఈ శాంతి చర్చల నేపథ్యంలో, స్ట్రెయిట్ ఆఫ్ హార్ముజ్‌లో చేపట్టాల్సిన 'ప్రాజెక్ట్ ఫ్రీడమ్' నావల్ ఆపరేషన్‌ను అమెరికా ప్రెసిడెంట్ డొనాల్డ్ ట్రంప్ తాత్కాలికంగా నిలిపివేశారు. ఫిబ్రవరి చివరలో యుద్ధం మొదలైన తర్వాత, దౌత్యపరంగా ఇంత పెద్ద ముందడుగు పడటం ఇదే తొలిసారి.

తదుపరి చర్చలు ఎలా ఉండబోతున్నాయి?

ఈ ప్రాథమిక ఒప్పందంపై ఇరు దేశాలు సంతకాలు చేస్తే, రాబోయే 30 రోజుల పాటు ఇస్లామాబాద్ లేదా జెనీవా వేదికగా సమగ్ర దౌత్య చర్చలు జరుగుతాయి. ట్రంప్ తరఫున స్టీవ్ విట్‌కాఫ్, జారెడ్ కుష్నర్ ఈ చర్చల్లో కీలకంగా వ్యవహరిస్తున్నారు. అయితే, సెక్రటరీ ఆఫ్ స్టేట్ మార్కో రూబియో (Marco Rubio) మాట్లాడుతూ, ఈ ప్రక్రియ చాలా సంక్లిష్టమైనదని స్పష్టం చేశారు. దౌత్యపరమైన పరిష్కారం పూర్తిగా దొరికే వరకు అమెరికా నావల్ బ్లాకేడ్ కొనసాగుతుందని, ఒకవేళ చర్చలు విఫలమైతే అమెరికా తిరిగి సైనిక చర్యలు చేపట్టే అవకాశం ఉందని హెచ్చరించారు.