INDIA Bloc Ramlila Maidan Rally | ఢిల్లీలో దద్దరిల్లిన రాంలీలా మైదాన్.. మోదీపై ఇండియా కూటమి వార్!

• ఢిల్లీలో రణరంగం
• 'ఓటు చోరీ'పై ఇండియా కూటమి మహా సంగ్రామం
• ఈసీ రాజీనామాకు డిమాండ్

INDIA Bloc Ramlila Maidan Rally | త్రినేత్ర న్యూస్ : దేశ రాజధాని ఢిల్లీ రాజకీయంగా అట్టుడికిపోయింది. దేశంలో ఓటర్ల లిస్టుల నుంచి పేర్ల తొలగింపు, ఎన్నికల ప్రక్రియలో అవకతవకలు జరుగుతున్నాయంటూ ఇండియా (INDIA) కూటమి చేపట్టిన 'ఛలో ఢిల్లీ' మహా ర్యాలీతో రాంలీలా మైదాన్ జనసంద్రంగా మారింది. చీఫ్ ఎలక్షన్ కమిషనర్ (CEC) జ్ఞానేశ్ కుమార్ తక్షణమే తన పదవికి రాజీనామా చేయాలని విపక్ష నేతలు ముక్తకంఠంతో డిమాండ్ చేశారు. మరోవైపు, కాంగ్రెస్ ర్యాలీని టార్గెట్ చేస్తూ 1984 సిక్కు వ్యతిరేక అల్లర్ల అంశంపై బీజేపీ పశ్చిమ ఢిల్లీలో భారీ నిరసన కౌంటర్ మార్చ్ నిర్వహించడంతో రాజధానిలో తీవ్ర ఉద్రిక్తత నెలకొంది.

ఓపెన్ బస్సులో అగ్రనేతల మార్చ్.. కన్నాట్ ప్లేస్‌లో దుకాణాల బంద్ కలకలం

కాంగ్రెస్ అధ్యక్షుడు మల్లికార్జున్ ఖర్గే నివాసం నుంచి రాహుల్ గాంధీ, ప్రియాంక గాంధీ, ఎస్పీ చీఫ్ అఖిలేష్ యాదవ్, పశ్చిమ బెంగాల్ సీఎం మమతా బెనర్జీ తదితర విపక్ష అగ్రనేతలు ఓపెన్ బస్సులో మింటో రోడ్ మీదుగా రాంలీలా మైదాన్ వైపు కదిలారు. కాగా, కన్నాట్ ప్లేస్ వద్ద పోలీసులు దుకాణాలను బలవంతంగా మూసివేయించారని రాహుల్ గాంధీ ఆరోపించారు. తమ ర్యాలీకి వచ్చిన వారితో వ్యాపారులకు లబ్ధి చేకూరాలని తాము భావిస్తే, బీజేపీ ప్రభుత్వం వ్యాపారులకు నష్టం కలిగించేలా వ్యవహరించిందని ఆయన మండిపడ్డారు.

ఓట్ల దొంగలపై మహాభారత యుద్ధం: తేజస్వి యాదవ్

సభలో ఆర్జేడీ నేత తేజస్వి యాదవ్ ప్రసంగిస్తూ చేసిన వ్యాఖ్యలు రాజకీయ వర్గాల్లో తీవ్ర చర్చనీయాంశమయ్యాయి. "చారిత్రకంగా రాంలీలా మైదాన్ రామాయణ ఘట్టాలకు వేదిక. కానీ నేడు ఓట్లు దొంగిలించే శకునుల ఆట కట్టించేందుకు మేం ఇక్కడ ‘మహాభారతం’ ప్రారంభించాం. మహాభారతం యుద్ధభూమిలో మొదలు కాలేదు, శకుని పాచికల ఆటతో మొదలైంది. ఇప్పుడు బీజేపీ కూడా వ్యవస్థలను అడ్డం పెట్టుకుని పాచికల ఆటే ఆడుతోంది. అందుకే ఈ యుద్ధం తప్పడం లేదు" అని తేజస్వి ధ్వజమెత్తారు.

అమిత్ షా ‘అంగదుడి కాలు’ వ్యాఖ్యలపై అఖిలేష్ సెటైర్లు

యూపీలో బీజేపీ పరిస్థితి ఎవరూ కదల్చలేని ‘అంగదుడి కాలు’ లాంటిదని కేంద్ర హోంమంత్రి అమిత్ షా గతంలో చేసిన వ్యాఖ్యలకు ఎస్పీ అధినేత అఖిలేష్ యాదవ్ స్ట్రాంగ్ కౌంటర్ ఇచ్చారు. "అసలు నిలబడటానికి నేలే లేనప్పుడు అంగదుడు కాలు ఎక్కడ పెడతాడు?" అంటూ ఎద్దేవా చేశారు. యూపీలో ఓడిపోతామనే భయంతోనే బీజేపీ ఎన్నికల సంఘాన్ని వాడుకుంటోందని, తమకు నచ్చినవారే పౌరులుగా, ఓటర్లుగా ఉండాలని ఆ పార్టీ కోరుకుంటోందని విమర్శించారు.

ఈసీపై ప్రజలకు నమ్మకం పోయింది: శశి థరూర్, ఖర్గే

కాంగ్రెస్ ఎంపీ శశి థరూర్ మాట్లాడుతూ.. ఓటరు జాబితాల స్పెషల్ రివిజన్ పేరుతో కోట్లాది మంది పేర్లను తొలగిస్తూ భవిష్యత్తును నాశనం చేస్తున్న జ్ఞానేశ్ కుమార్‌పై ప్రజలకు నమ్మకం పోయిందని, ఆయనకు కాస్తైనా నైతిక విలువలు ఉంటే వెంటనే తప్పుకోవాలని డిమాండ్ చేశారు.

ఈడీ, సీబీఐ, పోలీసు బెదిరింపులకు ఇండియా కూటమి భయపడబోదని కాంగ్రెస్ చీఫ్ మల్లికార్జున్ ఖర్గే స్పష్టం చేశారు. ఓట్ల చోరీతో గద్దెనెక్కిన ప్రభుత్వాలను సాగనంపాలని, దేశంలో ప్రజాస్వామ్యాన్ని కాపాడాలంటే ప్రధాని మోదీని అధికారం నుంచి దించడమే ఏకైక మార్గమని ఆయన పిలుపునిచ్చారు.

దాదాపు 4 వేల మందికి పైగా పోలీసులు, 200లకు పైగా సీసీటీవీ నిఘా నీడన జరిగిన ఈ ర్యాలీ కేంద్ర రాజకీయాల్లో పెను ప్రకంపనలు సృష్టిస్తోంది.