Harvard Community India | హార్వర్డ్ యూనివర్సిటీ పేరుతో రాజకీయ ప్రచారమా? భారత రాజ్యాంగ సంస్థలపై దాడి జరుగుతోంది

Harvard Community India | త్రినేత్ర న్యూస్ : భారతదేశంలోని కీలక రాజ్యాంగ సంస్థలను లక్ష్యంగా చేసుకుని జరుగుతున్న దుష్ప్రచారంపై హార్వర్డ్ కమ్యూనిటీకి చెందిన ప్రముఖ భారతీయులు తీవ్ర ఆందోళన వ్యక్తం చేశారు. లాయర్లు, పాలసీమేకర్లు, సివిల్ సర్వెంట్లు, సైంటిస్టులు, విద్యావేత్తలతో కూడిన ఈ బృందం బుధవారం ఒక ఉమ్మడి ప్రకటన విడుదల చేసింది. ప్రపంచంలోనే అతిపెద్ద ప్రజాస్వామ్య దేశమైన భారత్‌కు చెందిన బాధ్యతాయుతమైన పౌరులుగా, ఇలాంటి కీలక సమయంలో మౌనంగా ఉండటం సరికాదని వారు పేర్కొన్నారు.

రాజ్యాంగ సంస్థలపై దాడి.. హార్వర్డ్ పేరు దుర్వినియోగం

కేంద్ర ఎన్నికల సంఘం (ECI), సుప్రీంకోర్టు, భారత ప్రధాన న్యాయమూర్తి (CJI) కార్యాలయం, పార్లమెంట్ వంటి అత్యున్నత రాజ్యాంగ సంస్థలపై పథకం ప్రకారం జరుగుతున్న వ్యతిరేక ప్రచారం తమను తీవ్రంగా కలచివేస్తోందని వారు తెలిపారు.

అంతేకాకుండా, ఒక రాజకీయ ప్రచారానికి విశ్వసనీయత తెచ్చుకునేందుకు ఎలాంటి అధికారిక అనుమతి (Authorisation) లేకుండా 'హార్వర్డ్ యూనివర్సిటీ' పేరును వాడుకుంటున్నట్లు వస్తున్న వార్తలు మరింత ఆందోళన కలిగిస్తున్నాయని వారు స్పష్టం చేశారు.

'దొంగలు' అంటూ నిందించడం ప్రజాస్వామ్యానికే ముప్పు

భారతదేశం ఏదో ముట్టడిలో (Siege) ఉన్నట్లు చిత్రీకరించడం, రాజ్యాంగబద్ధమైన పదవుల్లో ఉన్నవారిని 'దొంగలు' (Thieves) అని లేదా 'అమ్ముడుపోయారు' (Compromised) అంటూ దిగజారుడు భాషను వాడటంపై వారు మండిపడ్డారు. ప్రజాస్వామ్య సంస్థలపై ప్రజల్లో ఉన్న నమ్మకాన్ని దెబ్బతీసే ఉద్దేశంతోనే ఇలాంటి వ్యాఖ్యలు చేస్తున్నారనే తీవ్ర అనుమానాలు కలుగుతున్నాయని అన్నారు.

అధికారుల గౌరవాన్ని కాపాడాల్సిందే

శాంతిభద్రతలను కాపాడేందుకు లా ఎన్‌ఫోర్స్‌మెంట్ ఏజెన్సీలు తీసుకునే చర్యలను నిష్పక్షపాతంగా పరిశీలించవచ్చని, కానీ ఆధారాలు లేకుండా నిరాధార ఆరోపణలు చేయడం, దూషణలకు దిగడం చట్టబద్ధమైన ప్రక్రియకు (Due Process) ప్రత్యామ్నాయం కాబోదని వారు హితవు పలికారు. ప్రభుత్వ అధికారుల, వారు నిర్వహించే పదవుల గౌరవాన్ని ప్రతి ఒక్కరూ కాపాడాలని సూచించారు.

రాజ్యాంగానికే మా కట్టుబాటు

మన ప్రయోజనాలకు అనుకూలంగా ఉన్నప్పుడే కాకుండా, అన్ని వేళలా రాజ్యాంగాన్ని, రూల్ ఆఫ్ లా (Rule of Law)ను, పౌర హక్కులను గౌరవించాలని హార్వర్డ్ ప్రముఖులు పిలుపునిచ్చారు.

తమ కట్టుబాటు ఎప్పుడూ అవకాశవాదానికి కాకుండా రాజ్యాంగానికే ఉంటుందని, సెలెక్టివ్ ఆగ్రహానికి కాకుండా న్యాయానికే ఉంటుందని, ఆరోపణల రాజకీయాలకు కాకుండా ప్రజాస్వామ్య సంస్థలకే తమ మద్దతు అని వారు తేల్చి చెప్పారు. హార్వర్డ్ మెడికల్ స్కూల్, హార్వర్డ్ కెన్నెడీ స్కూల్, హార్వర్డ్ లా స్కూల్, హార్వర్డ్ బిజినెస్ స్కూల్ తదితర విభాగాలకు చెందిన పలువురు ప్రముఖులు ఈ ప్రకటనపై సంతకాలు చేశారు.