IRCTC | అరుణాచ‌లం To రామేశ్వ‌రం.. రూ.16 వేల‌కే ఏడు ప్ర‌ముఖ పుణ్య‌క్షేత్రాల ద‌ర్శ‌నం

IRCTC | త్రినేత్ర‌.న్యూస్ : దక్షిణ భారతదేశంలోని ప్రముఖ ఆలయాలు, ఆధ్యాత్మిక ప్రదేశాలను (Major Temples In South India) సంద‌ర్శించుకోవాల‌నుకునే యాత్రికుల‌కు ఐఆర్‌సీటీసీ (IRCTC) గుడ్ న్యూస్ చెప్పింది. 'దివ్య దక్షిణ యాత్ర విత్ అరుణాచలం' పేరుతో ప్ర‌త్యేక టూర్ ప్యాకేజీని ప్ర‌క‌టించింది. ఈ టూర్‌లో తిరువ‌ణ్ణామ‌లైలో అరుణాచ‌లం ఆల‌యం, చిదంబరంలోని నటరాజ ఆలయం, శ్రీరంగంలోని శ్రీ రంగనాథస్వామి ఆలయం, తంజావూరులోని బృహదీశ్వర ఆలయం, రామేశ్వరంలోని రామనాథస్వామి ఆలయం, మధురైలోని మీనాక్షి అమ్మవారి ఆల‌యాన్ని దర్శించుకునే అవకాశం క‌ల్పిస్తోంది.

అది కూడా చాలా త‌క్కువ ఖ‌ర్చుతో ఈ ప్యాకేజీని ప్ర‌క‌టించింది ఐఆర్‌సీటీసీ. రూ.15,800 నుంచే ప్యాకేజీ ధరలు ప్రారంభం కానున్నాయి. చిన్నారులకు ప్రత్యేక రాయితీ ధరలు కూడా అందుబాటులో ఉన్నాయి. మొత్తం ఎనిమిది రాత్రులు, తొమ్మిది రోజుల‌పాటూ సాగే ఈ యాత్ర అక్టోబ‌ర్ 6న హైద‌రాబాద్ సికింద్రాబాద్ నుంచి భారత్‌ గౌరవ్‌ టూరిస్టు రైలు (Bharat Gaurav Tourist Train)తో ప్రారంభమవుతుంది. తెలుగు రాష్ట్రాల మీదుగా ఈ యాత్ర సాగుతుంది. ఈ యాత్ర‌లో భాగంగా కన్యాకుమారిలో రాక్ మెమోరియల్, గాంధీ మండపం కూడా సందర్శిస్తారు.

ప్ర‌యాణం సాగుతుందిలా..

• భారత్ గౌరవ్ టూరిస్ట్ ట్రైన్ అక్టోబర్ 6న ఉదయం 7:55 గంటలకు సికింద్రాబాద్ నుంచి బయలుదేరుతుంది. చ‌ర్ల‌ప‌ల్లి, జ‌న‌గాం, కాజీపేట్‌, వ‌రంగ‌ల్‌, మ‌హ‌బూబాబాద్‌, ఖ‌మ్మం, మ‌ధిర‌, విజ‌య‌వాడ‌, తెనాలి, ఒంగోలు, నెల్లూరు, గూడూరు, రేణిగుంట మీదుగా ప్ర‌యాణం సాగుతుంది.
• అక్టోబ‌ర్ 7న ఉద‌యం 8 గంట‌ల‌కు తిరువ‌ణ్ణామ‌లై చేరుకుంటారు. అక్క‌డ దిగిన వెంట‌నే హోట‌ల్ రూమ్‌కు వెళ్తారు. ఫ్రెష్ అయ్యాక అరుణాచలం ఆలయాన్ని దర్శించుకుంటారు. రాత్రి స్టే అరుణాచ‌లంలోనే.
• అక్టోబ‌ర్ 8న ఉద‌యం లేవ‌గానే ఫ్రెష్ అవుతారు. హోట‌ల్ చెక్ అవుట్ చేసి రైల్వే స్టేష‌న్‌కు చేరుకుంటారు. అక్క‌డి నుంచి చిదంబ‌రం బ‌య‌ల్దేర‌తారు. మ‌ధ్యాహ్నం 1 గంట‌ల‌కు చిదంబ‌రం చేరుకుంటారు. అక్క‌డ న‌ట‌రాజ స్వామి ఆల‌యాన్ని సంద‌ర్శిస్తారు. ఈ ఆల‌యం రైల్వే స్టేష‌న్‌కు కేవ‌లం 1.5 కిలోమీట‌ర్ల దూరంలోనే ఉంటుంది. కాలిన‌డ‌క‌న లేదా ఆటో రిక్లాలో వెళ్లాల్సి ఉంటుంది. ద‌ర్శ‌నానంత‌రం తిరిగి రైల్వే స్టేష‌న్‌కు చేరుకుంటారు. రాత్రి 7 గంట‌ల‌కు రైల్లో తిరుచ్చిరాపల్లికి బ‌య‌ల్దేర‌తారు. రాత్రి 11 గంట‌ల‌కంతా తిరుచ్చిరాప‌ల్లికి చేరుకుంటారు. రాత్రి బ‌స అక్క‌డే ఉంటుంది.
• అక్టోబ‌ర్ 9న ఉద‌యం లేవ‌గానే.. బ్రేక్‌ఫాస్ట్ కంప్లీట్ చేసుకుని. శ్రీరంగంలోని శ్రీ రంగనాథస్వామి ఆలయ సంద‌ర్శ‌న‌కు వెళ్తారు. ఆ త‌ర్వాత రోడ్డు మార్గంలో తంజావూరుకు బ‌య‌ల్దేర‌తారు. సుమారు 60 కిలోమీట‌ర్ల మేర ప్ర‌యాణం చేయాల్సి ఉంటుంది. అక్క‌డ బృహ‌దీశ్వ‌ర ఆల‌యాన్ని సంద‌ర్శిస్తారు. ఆల‌య ద‌ర్శ‌నం పూర్తైన త‌ర్వాత తంజావూరు రైల్వే స్టేష‌న్‌కు చేరుకుంటారు. రాత్రి 10:50కి రైల్లో రామేశ్వరం బ‌య‌ల్దేర‌తారు.
• అక్టోబ‌ర్ 10వ తేదీన తెల్ల‌వారుజామున 3 గంట‌ల‌కు రామేశ్వ‌రం రైల్వే స్టేష‌న్ చేరుకుంటారు. అక్క‌డ హోట్‌లో చెక్ ఇన్ అయ్యి.. ఫ్రెష్ అవుతారు. రామనాథస్వామి ఆలయం, స్థానిక ఆల‌యాల‌ను సంద‌ర్శిస్తారు (లోక‌ల్ ట్రాన్స్‌పోర్ట్ యాత్రికులే భ‌రించుకోవాలి). రామేశ్వ‌రంలోనే రాత్రి బ‌స ఉంటుంది.
• అక్టోబ‌ర్ 11న ఉద‌యం హోట‌ల్ చెక్ అవుట్ చేసి రైల్వే స్టేష‌న్‌కు చేరుకుంటారు. ఉద‌యం 11 గంట‌ల‌కు రైల్లో మ‌ధురైకి బయ‌ల్దేర‌తారు. మ‌ధ్యాహ్నం 2 గంట‌ల‌కు మ‌ధురై రైల్వే స్టేష‌న్‌కు చేరుకుంటారు. అక్క‌డ మీనాక్షి అమ్మ‌వారి ద‌ర్శ‌నం అనంత‌రం మ‌ళ్లీ రైల్వే స్టేష‌న్ చేరుకుంటారు. రాత్రి 11 గంట‌ల‌కు రైల్లో క‌న్యాకుమారికి బ‌య‌ల్దేర‌తారు.
• అక్టోబ‌ర్ 12న తెల్ల‌వారుజామున 4:50 గంట‌లకు క‌న్యాకుమారి చేరుకుంటారు. అక్కడి నుండి హోట‌ల్‌కు వెళ్లి స్నానం చేసి రాక్ మెమోరియల్, గాంధీ మండపం, సన్‌సెట్ పాయింట్ సందర్శిస్తారు. ఇక్క‌డితో మీ యాత్ర పూర్త‌వుతుంది. అదేరోజు రాత్రి 10 గంట‌ల‌కు తిరురు ప‌య‌న‌మ‌వుతారు.
• రేణిగుంట, గూడూరు, నెల్లూరు, ఒంగోలు, తెనాలి, విజయవాడ, మధిర, ఖమ్మం, మహబూబాబాద్, వరంగల్, కాజీపేట, జనగాం, చర్లపల్లి మీదుగా రైలు అక్టోబ‌ర్ 14 తెల్ల‌వారుజామున 3 గంట‌ల‌కు సికింద్రాబాద్ చేరుకుంటుంది. రైలు దిగిన త‌ర్వాత యాత్రికులు త‌మ గ‌మ్య‌స్థానాల‌కు వెళ్లిపోతారు. దీంతో ఈ టూర్ పూర్త‌వుతుంది.

ప్యాకేజీ ధ‌ర‌ల విష‌యానికొస్తే..

• ఈ టూర్ కోసం ఐఆర్‌సీటీసీ స్లీప‌ర్ క్లాస్‌, స్టాండర్డ్ (3ఏసీ), కంఫర్ట్ (2ఏసీ) అనే మూడు రకాల ప్యాకేజీలను ప్రకటించింది.
• స్లీపర్‌ క్లాస్‌లో ఎకానమీ టికెట్‌ ధర రూ.15,800 నుంచి ప్రారంభమవుతుంది. అదే 5-11 ఏళ్ల మ‌ధ్య వ‌య‌సు గ‌ల చిన్నారుల‌కు మాత్రం రూ.14,800 చెల్లించాలి.
• 3ఏసీ స్టాండర్డ్‌ ప్యాకేజీ ధర రూ.23,200 నుంచి ప్రారంభ‌మ‌వుతుంది. ఇందులో 5-11 ఏళ్ల మ‌ధ్య చిన్నారుల‌కు రూ.22,000 చెల్లించాలి.
• ఇక‌ 2ఏసీ కంఫర్ట్‌ ప్యాకేజీ ధర రూ.29,600గా నిర్ణయించారు. ఇందులో 5-11 ఏళ్ల చిన్నారుల‌కు రూ.28,100 చెల్లించాలి.

ఇవీ సౌక‌ర్యాలు..

యాత్రికులకు హోటల్‌ బస, శాకాహార భోజనం, స్థానిక రవాణా, ట్రావెల్‌ ఇన్సూరెన్స్‌, టూర్‌ మేనేజర్‌ సహాయం వంటి సదుపాయాలు ప్యాకేజీలో భాగం. అయితే, ఏ ఆల‌యం వ‌ద్దైనా ఎంట్రీ ఫీజులు ఉంటే మాత్రం ప్ర‌యాణికులే చెల్లించుకోవాల్సి ఉంటుంది. కేవ‌లం యాత్రికుల భ‌ద్ర‌త‌, ప్ర‌యాణ స‌దుపారం, బ‌స‌, ఫుడ్ వంటివి మాత్ర‌మే రైల్వే సిబ్బంది చూసుకుంటారు. ఈ ప్రత్యేక దివ్య దక్షిణ యాత్ర కోసం మొత్తం 705 సీట్లు అందుబాటులో ఉన్నాయి. ఇందులో 237 స్లీపర్ క్లాస్ సీట్లు, 416 3-ఏసీ సీట్లు, 52 2-ఏసీ సీట్లు ఉన్నాయి.

Also Read..

ఓపెన్‌ఏఐ నుంచి జీపీటీ-6 ఆస్ట్రా.. కంప్యూటర్‌ను మనిషిలా ఆపరేట్ చేసే కొత్త ఏఐ..

ఎస్ఐఆర్ పేరుతో ఓట్లు తొల‌గించేందుకు కుట్ర‌.. దొంగదెబ్బ తీస్తామంటే చూస్తూ ఊరుకునేవారు లేరు: సీఎం రేవంత్‌

ఒక్క రోజులోనే రూ.18వేలు త‌గ్గిన బంగారం ధ‌ర‌.. మ‌ళ్లీ ప‌త‌నం దిశ‌గా..?