Rahul Gandhi Foreign Powers Allegation | రాహుల్ గాంధీ విదేశీ శక్తుల చేతిలో కీలుబొమ్మ.. దేశాన్ని అస్థిరపరిచే కుట్ర

• రాహుల్‌ వెనుక విదేశీ శక్తులు
• బీజేపీ చీఫ్ నితిన్ నబిన్ ఫైర్

Rahul Gandhi Foreign Powers Allegation | త్రినేత్ర న్యూస్ : కాంగ్రెస్ అగ్రనేత రాహుల్ గాంధీ లక్ష్యంగా బీజేపీ జాతీయ అధ్యక్షుడు నితిన్ నబిన్ తీవ్రస్థాయిలో విరుచుకుపడ్డారు. భారతదేశంలో అలజడి, అరాచకం సృష్టించేందుకు విదేశీ శక్తులు రాహుల్‌ను ఒక టూల్‌కిట్‌లా వాడుకుంటున్నాయని ఆయన సంచలన ఆరోపణలు చేశారు. బీహార్‌లోని భాగల్‌పూర్‌లో సోమవారం నిర్వహించిన ‘లోక్‌తంత్ర బచావో, అరాజక్త హఠావో’ (ప్రజాస్వామ్యాన్ని కాపాడండి - అరాచకాన్ని తరిమికొట్టండి) ప్రచార ర్యాలీలో ప్రసంగిస్తూ ఆయన ఈ వ్యాఖ్యలు చేశారు.

ఢిల్లీ వేదికగా ప్రతిపక్షాలు ఇటీవల చేపట్టిన 'ఓట్ చోరీ' ఆరోపణల ర్యాలీపై నితిన్ నబిన్ సూటిగా స్పందించారు. ప్రజాస్వామ్యాన్ని అడ్డం పెట్టుకుని విదేశీ శక్తుల కనుసన్నల్లో విపక్షాలు కుట్రలు పన్నుతున్నాయని ధ్వజమెత్తారు.

"రాహుల్ గాంధీని విదేశీ టూల్‌కిట్ వాడుకుంటోంది"

సభనుద్దేశించి నితిన్ నబిన్ మాట్లాడుతూ.. "భారతదేశంలో తీవ్ర అస్థిరత తీసుకురావడానికి విదేశీ మద్దతు ఉన్న టూల్‌కిట్ రాహుల్ గాంధీని వాడుకుంటోంది. దేశంలో అరాచకం సృష్టించేందుకు విదేశీ శక్తుల ఆదేశాల మేరకు ఆయన నడుచుకుంటున్నారు. మన దేశం రాజ్యాంగబద్ధంగా నడుస్తుందన్న నిజాన్ని రాహుల్ గుర్తుంచుకోవాలి" అని హెచ్చరించారు.

ఓటర్ల జాబితా ప్రత్యేక సమగ్ర సవరణ (SIR) ప్రక్రియ జరుగుతున్న సమయంలో పలు రాష్ట్రాల్లో క్షేత్రస్థాయి కార్యకర్తలు లేక విపక్షాలు సరైన అభ్యంతరాలు కూడా నమోదు చేయలేకపోయాయని, ఇప్పుడు సాకులు వెతుకుతున్నాయని ఎద్దేవా చేశారు.

"గెలిస్తే మౌనం.. ఓడిపోతే ఈవీఎంలపై నెపం"

ఎన్నికల ఫలితాలు వచ్చిన ప్రతిసారీ ప్రతిపక్షాలు వ్యవహరించే ద్వంద్వ వైఖరిని నబిన్ ఎండగట్టారు. "బీహార్ అసెంబ్లీ ఎన్నికల్లో ప్రజలు విపక్షాలకు ఇప్పటికే తగిన గుణపాఠం చెప్పారు. ప్రజల చేతుల్లో ఘోర పరాజయం మూటగట్టుకున్నప్పుడు మాత్రమే వీరికి ఎన్నికల సంఘం, ఈవీఎంల పనితీరుపై అనుమానాలు వస్తాయి. అదే తాము గెలిచినప్పుడు మాత్రం ఫలితాలను మౌనంగా ఆమోదిస్తారు" అని మండిపడ్డారు.

2014 సార్వత్రిక ఎన్నికలను గుర్తుచేస్తూ.. అవినీతి, ఉగ్రవాదం, భారీ కుంభకోణాల వల్లే ప్రజలు కాంగ్రెస్ నేతృత్వంలోని యూపీఏను గద్దె దించారని చెప్పారు. క్షేత్రస్థాయిలో బలం లేని విపక్షాల రాజకీయ భవిష్యత్తు ప్రమాదంలో పడిందని, రాబోయే రోజుల్లో కూడా ఓటర్లు వారిని పూర్తిగా తిరస్కరిస్తారని ఆయన స్పష్టం చేశారు.