Om Birla | లోక్‌స‌భ స్పీక‌ర్‌ను బెదిరించిన కాంగ్రెస్ ఎంపీలు.. వీడియో షేర్ చేసిన కేంద్ర మంత్రి

Om Birla| కాంగ్రెస్ పార్టీపై పార్ల‌మెంట‌రీ వ్య‌వ‌హారాల శాఖ మంత్రి కిర‌ణ్ రిజుజు (Kiren Rijiju) సంచ‌ల‌న ఆరోప‌ణ‌లు చేశారు. లోక్‌స‌భ స్పీక‌ర్ (Lok Sabha Speaker) ఓం బిర్లా (Om Birla)ని కాంగ్రెస్ ఎంపీ (Congress MPs)లు బెదిరించార‌న్నారు. ఆయ‌న చాంబ‌ర్‌లోకి చొరబ‌డి బెదిరింపుల‌కు పాల్ప‌డిన‌ట్లు చెప్పారు. ఈ మేర‌కు ఇందుకు సంబంధించిన వీడియోని కిర‌ణ్ రిజుజు గురువారం ఉద‌యం ఎక్స్‌లో పోస్టు చేశారు.

ఆ వీడియోలో 20 మందికిపైగా కాంగ్రెస్ ఎంపీలు లోక్‌స‌భ స్పీక‌ర్ చాంబ‌ర్‌లోకి వెళ్లారు. అక్క‌డ ఆయ‌న‌ను దుర్బాషలాడుతూ బెదిరింపు ధోర‌ణితో మాట్లాడుతున్న‌ట్లు క‌నిపించింది. ఈ వీడియోని షేర్ చేసిన కిర‌ణ్ రిజుజు.. "గౌరవనీయులైన స్పీకర్ చాంబర్‌లోకి 20 నుంచి 25 మంది కాంగ్రెస్ ఎంపీలు ప్రవేశించారు. ఆయనను దుర్భాషలాడి, బెదిరింపుల‌కు పాల్ప‌డ్డారు. ఓ ఎంపీ తీసిన చట్టవిరుద్ధమైన వీడియో క్లిప్ ఇది. ఇలా బెదిరింపు ధోర‌ణిని మా పార్టీ ఎప్పుడూ ప్రోత్సహించదు" అని కిర‌ణ్ రిజిజు రాసుకొచ్చారు. ప్ర‌స్తుతం ఈ వీడియో వైర‌ల్‌గా మారింది.

పార్ల‌మెంట్ బ‌డ్జెట్ స‌మావేశాల్లో ప్ర‌తిప‌క్ష పార్టీ ఎంపీల‌పై కేంద్ర ప్ర‌భుత్వం తీవ్ర ఆరోప‌ణ‌లు చేస్తోంది. లోక్‌స‌భ‌లో ప్ర‌ధాని మోదీపై భౌతిక దాడికి కాంగ్రెస్ ఎంపీలు ప్ర‌య‌త్నించారంటూ ఇటీవ‌లే ఆరోపించిన విష‌యం తెలిసిందే. ఇందుకు సంబంధించిన వీడియోని కూడా పార్ల‌మెంట‌రీ వ్య‌వ‌హారాల శాఖ మంత్రి కిర‌ణ్ రిజుజు ఎక్స్‌లో షేర్ చేశారు. ఫిబ్ర‌వ‌రి 4న లోక్‌స‌భ‌లో కాంగ్రెస్ పార్టీకి చెందిన మ‌హిళా ఎంపీలు.. ప్ర‌ధాని కుర్చీ వ‌ద్ద‌కు వెళ్లి ఆందోళ‌న చేశారు. బ్యాన‌ర్ ప్ర‌ద‌ర్శించి నిర‌స‌న తెలిపారు. ఆ వీడియోకూడా ఇప్ప‌టికే పెద్ద ఎత్తున దుమారం రేపింది. ఇప్పుడు తాజాగా లోక్‌స‌భ స్పీక‌ర్‌ను కాంగ్రెస్ ఎంపీలు బెదిరించిన వీడియో బ‌య‌ట‌కు రావ‌డం చ‌ర్చ‌కు దారితీస్తోంది.

https://x.com/KirenRijiju/status/2021812385460420837