Class 9 Student | రెసిడెన్షియ‌ల్ స్కూల్ విద్యార్థినికి ఐదు నెల‌ల గ‌ర్భం.. వైద్య‌ప‌రీక్ష‌ల్లో వెలుగులోకి..

Class 9 Student | త్రినేత్ర‌.న్యూస్‌: ఒడిశాలోని ఓ రెసిడెన్షియ‌ల్ పాఠ‌శాల‌లో విద్యార్థుల‌కు ఆరోగ్య ప‌రీక్ష‌లు నిర్వ‌హిస్తున్నారు. ఈ క్ర‌మంలో 9వ త‌ర‌గ‌తి చ‌దువుతున్న బాలిక (Class 9 Student) గ‌ర్భ‌వ‌తి (Pregnant) అని తేలింది. దీంతో షాక్ గురైన పాఠ‌శాల సిబ్బంది.. ఆమె త‌ల్లిదండ్రుల‌కు విష‌యం చెప్పారు.

మ‌యూర్‌భంజ్ (Mayurbhanj) జిల్లాలోని ఓ గురుకుల పాఠ‌శాల‌లో (residential school) ఇటీవ‌ల సాధార‌ణ వైద్య ప‌రీక్ష‌లు నిర్వ‌హించారు. ఈ క్ర‌మంలో 9వ త‌ర‌గ‌తి చ‌దువుతున్న ఓ బాలిక ఐదు నెల‌ల గ‌ర్భ‌వ‌తి అని గుర్తించారు. దీంతో తల్లిదండ్రులకు సమాచారం ఇవ్వ‌డంతో అసలు విషయం వెలుగులోకి వ‌చ్చింది. వేస‌వి సెల‌వుల్లో (summer vacation) త‌న‌పై లైంగిక‌దాడి జ‌రిగిన‌ట్లు ఆమె తల్లిదండ్రులకు చెప్పింది.

వేసవి సెలవుల్లో ట్యూషన్ చెప్పేందుకు వచ్చిన ప్రైవేట్ ట్యూటర్ త‌న‌పై అత్యాచారానికి పాల్పడిన‌ట్లు తెలిపింది. ఇంట్లో ఒంటరిగా ఉన్న స‌మ‌యంలో త‌న‌పై ఆఘాయిత్యానికి ఒడిగ‌ట్టాడ‌ని, విషయం ఎవరికైనా చెబితే తీవ్ర పరిణామాలు ఎదుర్కోవాల్సి వస్తుందని బెదిరించాడ‌ని వెల్ల‌డించింది. దీంతో బాలిక తల్లిదండ్రులు గురువారం పోలీసులకు ఫిర్యాదు చేశారు. ఎఫ్‌ఐఆర్ నమోదు చేసిన పోలీసులు నిందితుడిని అరెస్ట్ చేశారు. ఈ ఘ‌ట‌న‌పై దర్యాప్తు చేస్తున్నామ‌ని అధికారులు వెల్ల‌డించారు.