CJI Surya Kant | సెంటిమెంట్‌గా తీసుకోవద్దు.. ‘కాక్రోచ్ జనతా పార్టీ’ వివాదంపై సీజేఐ జస్టిస్ సూర్యకాంత్ కీలక వ్యాఖ్యలు

• సుప్రీంకోర్టులో 'కాక్రోచ్ జనతా పార్టీ' (CJP) వివాదంపై దాఖలైన పిటిషన్
• దీనిని సెంటిమెంట్‌గా తీసుకోవద్దని, అత్యవసర విచారణ అవసరం లేదన్న సీజేఐ
• కోర్టు రికార్డింగ్స్ దుర్వినియోగం, నకిలీ లా డిగ్రీలపై సీబీఐ విచారణ కోరిన లాయర్
• గతంలో సోషల్ మీడియా యాక్టివిస్టులను ఉద్దేశించి సీజేఐ చేసిన వ్యాఖ్యలపై స్పష్టత

CJI Surya Kant | త్రినేత్ర.న్యూస్ : సుప్రీంకోర్టు ప్రధాన న్యాయమూర్తి (CJI) జస్టిస్ సూర్యకాంత్ సోమవారం కీలక వ్యాఖ్యలు చేశారు. ఇటీవల నెట్టింట వైరల్‌గా మారిన 'కాక్రోచ్ జనతా పార్టీ' (CJP) వివాదం, కోర్టు విచారణల రికార్డింగ్స్‌ను సోషల్ మీడియాలో దుర్వినియోగం చేయడంపై దాఖలైన పిటిషన్‌పై ఆయన స్పందించారు. ఈ ఇష్యూను మరీ అంత "సెంటిమెంట్‌గా" (Sentimentally) తీసుకోవద్దని సదరు పిటిషనర్‌కు సూచించారు.

కోర్టు రికార్డింగ్స్ దుర్వినియోగం

కోర్టు విచారణలో న్యాయమూర్తులు చేసే మౌఖిక వ్యాఖ్యలను కమర్షియల్ ప్రయోజనాల కోసం వాడుకోవడం, సోషల్ మీడియాలో వక్రీకరించి ప్రచారం చేయడంపై ఒక న్యాయవాది సుప్రీంకోర్టులో (Supreme Court) రిట్ పిటిషన్ వేశారు. సీజేఐ స్వయంగా వివరణ ఇచ్చిన తర్వాత కూడా ఈ దుష్ప్రచారం కొనసాగుతోందని, ఇది న్యాయవ్యవస్థ ప్రతిష్టను దిగజారుస్తోందని ఆయన కోర్టు దృష్టికి తీసుకెళ్లారు. ఈ అంశంపై అత్యవసర విచారణ జరపాలని కోరారు.

నకిలీ డిగ్రీలపై సీబీఐ ఎంక్వైరీ

ఈ పిటిషన్‌లో నకిలీ లా డిగ్రీల (Fake law degrees) అంశం కూడా తెరపైకి వచ్చింది. దేశంలో 35 నుంచి 40 శాతం నకిలీ లా డిగ్రీలు ఉన్నాయని బార్ కౌన్సిల్ ఆఫ్ ఇండియా (BCI) చైర్‌పర్సన్ చేసిన వ్యాఖ్యలపై సీబీఐ (CBI) దర్యాప్తు జరిపించాలని సదరు లాయర్ కోర్టును కోరారు. నకిలీ డిగ్రీలతో ప్రాక్టీస్ చేస్తున్న వారిపై కఠిన చర్యలు తీసుకోవాలన్నారు. ఈ పిటిషన్‌పై అత్యవసర విచారణ కోరగా.. "ఇది అంత అత్యవసరమైన (Emergency) విషయం కాదు, మేం దీనిని తర్వాత పరిశీలిస్తాం" అని సీజేఐ బదులిచ్చారు.

అసలు వివాదం ఎక్కడ మొదలైందంటే?

కొందరు న్యాయవాదులు, యాక్టివిస్టులు న్యాయవ్యవస్థను టార్గెట్ చేస్తున్నారన్న కేసు విచారణలో సీజేఐ సూర్యకాంత్ మౌఖికంగా స్పందించారు. వ్యవస్థపై దాడి చేసే 'పరాన్నజీవులు' సమాజంలో ఉన్నారంటూ ఆగ్రహం వ్యక్తం చేశారు.

"ఎలాంటి ఉద్యోగం, వృత్తిలేని కొందరు యువకులు బొద్దింకల్లా (Cockroaches) తయారయ్యారు. వీరిలో కొందరు మీడియా, సోషల్ మీడియా, ఆర్టీఐ (RTI) యాక్టివిస్టులుగా మారి అందరిపై దాడులు చేస్తున్నారు" అని ఘాటు వ్యాఖ్యలు చేశారు. ఫేస్‌బుక్, యూట్యూబ్ తదితర ప్లాట్‌ఫామ్స్‌లో జరుగుతున్న ప్రచారాన్ని కోర్టు గమనిస్తోందని ఆయన హెచ్చరించారు. అంతేకాకుండా, ఢిల్లీలోని కొందరు న్యాయవాదుల డిగ్రీలపైనా తనకు తీవ్ర అనుమానాలు ఉన్నాయన్నారు.

ఆ ప్రచారం అబద్ధం

అయితే సీజేఐ వ్యాఖ్యలను సోషల్ మీడియాలో కొందరు వక్రీకరించారు. ఆయన యువతను కించపరిచేలా మాట్లాడారంటూ దుష్ప్రచారం చేశారు. దీనిపై మే 16న సీజేఐ క్లారిటీ ఇచ్చారు. యువతను తాను విమర్శించినట్లు మీడియాలో వస్తున్న వార్తలు తనను తీవ్రంగా బాధించాయన్నారు. నకిలీ డిగ్రీలతో (Bogus degrees) న్యాయవాద వృత్తిలోకి వస్తున్న వారిని ఉద్దేశించే తాను ఆ వ్యాఖ్యలు చేశానని, మీడియాలోని ఒక వర్గం తన మాటలను కావాలనే వక్రీకరించిందని (Misquoted) ఆయన స్పష్టం చేశారు.