Ayodhya Ram Mandir Trust | రామ జన్మభూమి ట్రస్ట్‌లో భారీ ప్రక్షాళన: చంపత్ రాయ్ రాజీనామా.. విరాళాల లెక్కలు పక్కా!

Ayodhya Ram Mandir Trust | త్రినేత్ర.న్యూస్ : అయోధ్యలోని శ్రీ రామ జన్మభూమి తీర్థ క్షేత్ర ట్రస్ట్ (Shri Ram Janmabhoomi Teerth Kshetra) భేటీలో కీలక నిర్ణయాలు వెలువడ్డాయి. విరాళాల వినియోగంపై ఆరోపణల నేపథ్యంలో సిట్ (SIT) విచారణ జరుగుతుండగా.. ప్రధాన కార్యదర్శి చంపత్ రాయ్ సహా మరొకరు రాజీనామా చేశారు. అదే సమయంలో ఆలయ నిర్మాణానికి వచ్చిన నిధులు, ఖర్చుల వివరాలను ట్రస్ట్ పారదర్శకంగా ప్రకటించింది.

రాజీనామాలు.. విచారణకు సహకారం

సిట్ (SIT) ప్రాథమిక నివేదిక వెలువడిన తర్వాత నైతిక బాధ్యత వహిస్తూ.. ట్రస్ట్ జనరల్ సెక్రటరీ చంపత్ రాయ్, ట్రస్టీ అనిల్ మిశ్రా తమ పదవుల నుంచి తప్పుకున్నారు. విచారణ నిష్పక్షపాతంగా, పారదర్శకంగా సాగేందుకు వీలుగా వారు సమర్పించిన రాజీనామాలను ట్రస్ట్ వెంటనే ఆమోదించింది. అలాగే, స్పెషల్ ఇన్వైటీల జాబితా నుంచి గోపాల్ నాగరకట్టెను తొలగిస్తూ ట్రస్ట్ సంచలన నిర్ణయం తీసుకుంది. చట్టపరమైన విచారణ ప్రక్రియ పూర్తయిన తర్వాతే నిజానిజాలు బయటపడతాయని, అప్పటివరకు ఎవరిపైనా నిందలు మోపడం సరికాదని ట్రస్ట్ సభ్యులు అభిప్రాయపడ్డారు.

విరాళాలు ఎన్ని వచ్చాయి? ఎంత ఖర్చైంది?

ఆలయ నిర్మాణానికి సంబంధించి ఆర్థిక వివరాలను ట్రస్ట్ బహిర్గతం చేసింది. విరాళాల సేకరణ, కార్పస్ ఫండ్స్ ద్వారా ట్రస్ట్‌కు మొత్తం రూ.3,264 కోట్లు సమకూరాయి. ఇందులో ప్రాజెక్టు నిర్మాణం, ఇతర క్యాపిటల్ ఖర్చుల (capital expenditure) కోసం రూ.2,370 కోట్లు వినియోగించారు. మరోవైపు ట్రస్ట్ ఆవిర్భావం నుంచి 2026 మార్చి 31 నాటికి భక్తుల కానుకల ద్వారా రూ.582 కోట్ల ఆదాయం రాగా.. అందులో నిర్వహణ ఖర్చుల (operational expenses) కోసం రూ.391 కోట్లు వాడారు. ఖర్చులు పోను మిగిలిన నిధులన్నీ బ్యాంకు ఖాతాల్లో భద్రంగా ఉన్నట్లు ట్రస్ట్ స్పష్టం చేసింది.

భక్తుల కానుకలకు పూర్తి రక్షణ

నగదుతో పాటు శ్రీరామ్‌లల్లాకు భక్తులు ఎన్నో విలువైన కానుకలను వస్తు రూపంలో కూడా సమర్పించారు. ఇప్పటివరకు ఇలాంటివి మొత్తం 2,926 కానుకలు ట్రస్ట్‌కు అందాయి. వాటికి సంబంధించిన తేదీ, ఇతర పూర్తి వివరాలను ఒక ప్రత్యేక రిజిస్టర్‌లో భద్రపరుస్తున్నారు. అంతేకాకుండా, ప్రతి ఏటా ఒక ఇండిపెండెంట్ చార్టర్డ్ అకౌంటెన్సీ (CA) సంస్థతో ఇంటర్నల్ ఆడిట్, ఫిజికల్ వెరిఫికేషన్ చేయిస్తున్నట్లు ట్రస్ట్ వెల్లడించింది.

ఎవరైనా భక్తులు తాము ఇచ్చిన కానుకల వినియోగాన్ని స్వయంగా పరిశీలించాలనుకుంటే.. ముందుగా అపాయింట్‌మెంట్ తీసుకుని, అయోధ్యకు వచ్చి ట్రస్ట్ అధికారులను కలవొచ్చని సూచించింది.