అంబేడ్కర్ విగ్రహాలకు రక్షణగా ప్రహరీ గోడ, షెడ్ ఏర్పాటు

శనివారం అంబేడ్కర్ వర్ధంతి సందర్భంగా యూపీ సీఎం యోగి ఆదిత్యనాథ్ కీలక నిర్ణయం తీసుకున్నారు. రాజ్యాంగ నిర్మాత డాక్టర్ బాబా సాహెబ్ అంబేడ్కర్ విగ్రహాల రక్షణ కోసం ప్రత్యేక చర్యలు చేపడుతున్నట్టు యోగి ఆదిత్యనాథ్ ప్రకటించారు.

యూపీలో చాలా చోట్ల అంబేడ్కర్ విగ్రహాలను ఆకతాయిలు ధ్వంసం చేస్తున్నారు. అగౌరవపరుస్తున్నారు. ఇలాంటి ఘటనలు తరుచుగా జరుగుతున్నాయి. వీటిని అరికట్టేందుకు మా ప్రభుత్వం పటిష్టమైన వ్యవస్థను ఏర్పాటు చేస్తోంది.. అని యోగి వెల్లడించారు.

అంబేడ్కర్ విగ్రహాలకు రక్షణ కల్పించడం కోసం విగ్రహం ఉన్న ప్రతి చోట ప్రహరీ గోడ నిర్మిస్తామని హామీ ఇచ్చారు. పైకప్పు లేని విగ్రహాలకు ఎండావానల నుంచి రక్షణ కల్పించేందుకు షెడ్ నిర్మిస్తామని సీఎం స్పష్టం చేశారు.

అంబేడ్కర్ గౌరవానికి ఎలాంటి భంగం కలగకుండా, విగ్రహాల భద్రత కోసం తమ ప్రభుత్వం ఎల్లప్పుడూ సిద్ధంగా ఉంటుందని అన్నారు.