Air India AI 171 Crash Was Intentional | ఎయిర్ ఇండియా విమాన ప్రమాదం వెనుక షాకింగ్ ట్విస్ట్: కావాలనే ఇంజిన్లు ఆపేసిన పైలట్?

Air India AI 171 Crash Was Intentional | త్రినేత్ర.న్యూస్ : దేశవ్యాప్తంగా విషాదాన్ని నింపిన అహ్మదాబాద్ ఎయిర్ ఇండియా (AI 171) విమాన ప్రమాదంపై దర్యాప్తులో విస్తుపోయే నిజాలు వెలుగులోకి వస్తున్నాయి. 2025 జూన్‌లో జరిగిన ఈ ఘోర ప్రమాదం సాంకేతిక లోపం (Technical Failure) వల్ల జరగలేదని, ఇది పైలట్ చేసిన 'ఉద్దేశపూర్వక చర్య' (Intentional Act) అని ఇటాలియన్ దినపత్రిక 'కొరియెర్ డెల్లా సెరా' (Corriere della Sera) సంచలన కథనాన్ని ప్రచురించింది.

అసలేం జరిగింది?

గత ఏడాది జూన్‌లో అహ్మదాబాద్ విమానాశ్రయం నుంచి టేకాఫ్ అయిన కొద్ది క్షణాల్లోనే ఎయిర్ ఇండియా బోయింగ్ 787 డ్రీమ్‌లైనర్ కుప్పకూలింది. ఈ ప్రమాదంలో విమానంలోని ప్రయాణికులు, కింద ఉన్న మెడికల్ హాస్టల్ విద్యార్థులతో కలిపి మొత్తం 260 మంది ప్రాణాలు కోల్పోయారు. దీనిపై భారత దర్యాప్తు సంస్థలు, అమెరికా నిపుణులు జరిపిన విచారణలో కీలక విషయాలు వెల్లడైనట్లు తెలుస్తోంది.

పైలట్ పనేనా?

తాజా నివేదికల ప్రకారం, విమానం గాలిలో ఉండగా పైలట్-ఇన్-కమాండ్ కెప్టెన్ సుమీత్ సభర్వాల్ ఇంజిన్ ఫ్యూయల్ కంట్రోల్ స్విచ్‌లను (Fuel Control Switches) మాన్యువల్‌గా ఆఫ్ చేసినట్లు దర్యాప్తు అధికారులు గుర్తించారు. దీనివల్ల ఇంజిన్లకు ఇంధన సరఫరా నిలిచిపోయి విమానం కుప్పకూలిందని సమాచారం. "ఇది మెకానికల్ వైఫల్యం కాదు, ఉద్దేశపూర్వకంగా చేసిన చర్య" అని దర్యాప్తులో తేలినట్లు ఇటాలియన్ పత్రిక పేర్కొంది. కాక్‌పిట్ వాయిస్ రికార్డర్ డేటా ప్రకారం, ఇంధనం ఎందుకు ఆఫ్ చేశారని కో-పైలట్ ప్రశ్నించగా, తాను చేయలేదని కెప్టెన్ బదులిచ్చినట్లు తెలిసింది.

మానసిక స్థితిపై అనుమానాలు

కెప్టెన్ సుమీత్ సభర్వాల్ డిప్రెషన్‌తో (Depression) బాధపడుతున్నారని, అందుకే ఈ ఘాతుకానికి పాల్పడి ఉండవచ్చని అనుమానాలు వ్యక్తమవుతున్నాయి. అయితే, పైలట్ కుటుంబ సభ్యులు మాత్రం ఈ ఆరోపణలను ఖండించారు. తన కుమారుడికి ఎలాంటి మానసిక సమస్యలు లేవని కెప్టెన్ తండ్రి స్పష్టం చేశారు.

తుది నివేదిక త్వరలో

బ్లాక్ బాక్స్ డేటా ఆధారంగా జరిపిన ప్రాథమిక సాంకేతిక విశ్లేషణలో కూడా ఎలాంటి మెకానికల్ లోపం లేదని తేలింది. త్వరలో విడుదల కానున్న తుది నివేదికలో పైలట్ల మానసిక ఆరోగ్య పర్యవేక్షణకు సంబంధించి కొత్త మార్గదర్శకాలు ఉండే అవకాశం ఉంది.