Baby Sold | 48 గంట‌ల్లోనే మూడింత‌లైన ధ‌ర‌.. నెల వ‌య‌సున్న బాబును రూ.1.20 ల‌క్ష‌ల‌కు కొని.. రూ.3.50 ల‌క్ష‌ల‌కు అమ్మేశారు

Baby Sold | త్రినేత్ర న్యూస్‌: మహారాష్ట్రలోని ఛత్రపతి శంభాజీనగర్‌లో (Sambhajinagar) విస్తుపోయే ఘ‌ట‌న వెలుగులోకి వ‌చ్చింది. ఒక నెల వ‌య‌సున్న పసికందును (Baby Sold) అమ్మిన త‌ల్లింద్ర‌డులు.. వ‌చ్చిన ఆ డ‌బ్బుతో బంగారు ఆభ‌ర‌ణాలు, రెండు ఖ‌రీదైన సెల్‌ఫోన్లు (Smartphones) కొనుగోలు చేశారు. అయితే ఆ చిన్నారి ధ‌ర 48 గంట‌ల్లో మూడింత‌లు పెర‌గ‌డం, ఒక రాష్ట్రం నుంచి మ‌రో రాష్ట్రానికి త‌ర‌లించ‌డం గ‌మ‌నార్హం.

శంభాజీన‌గ‌ర్ టూ హైద‌రాబాద్ వ‌యా నాందేడ్‌

ఛ‌త్ర‌ప‌తి శంభాజీన‌గ‌ర్ జిల్లాకు చెందిన వంద‌న‌, యోగోశ్ కామ్రే దంప‌తులు త‌మ నెల రోజుల బాబును రూ.1.20 ల‌క్ష‌ల‌కు సీమా రెష్వాల్ అనే మ‌హిళ‌కు విక్ర‌యించారు. ఆమె ప‌డేగావ్‌కు చెందిన‌ సంగీత‌ అవ‌ధ్ అనే మ‌హిళ‌ల‌కు రూ.2.7 ల‌క్ష‌ల‌కు ఆ ప‌సికందును అమ్మేసింది. అనంత‌రం ఆ బాబును నాందేడ్‌కు (Nanded) తీసుకెళ్లిన సంగీత‌.. డాక్ట‌ర్‌గా చెప్పుకుంటున్న సురేశ్ గుంట్కా అనే వ్య‌క్తి రూ.3 ల‌క్ష‌ల 50 వేల‌కు విక్ర‌యించింది. అత‌డు హైద‌రాబాద్‌లో (Hyderabad) ఉంటున్న త‌న బంధువు ఉమ ఖ‌ట్క‌మ్‌కు అంతే మొత్తానికి అమ్మేశాడు. అలా మూడు చేతులు మారిన ఆ బాబు 48 గంట‌ల వ్య‌వ‌ధిలోనే రూ.1.20 ల‌క్ష‌ల నుంచి రూ.3.50 ల‌క్ష‌ల ధ‌ర ప‌లికాడు.

ఎలా వెలుగులోకి వచ్చిందంటే..?

కాగా, ప‌సికందు త‌ల్లి వంద‌న త‌న‌ను వేధింపుల‌కు గురిచేస్తున్నారంటూ ఈ నెల 20న శంభాజీన‌గ‌ర్‌లో పోలీసుల‌ను ఆశ్ర‌యించారు. దీంతో ఆమెను ప్ర‌శ్నిస్తున్న క్ర‌మంలో శిశువు అమ్మ‌కానికి సంబంధించిన విష‌యం వెలుగులోకి వ‌చ్చింది. ఈ ఘ‌ట‌న‌పై సెప్టెంబ‌ర్ 24న కేసు న‌మోదుచేసిన పోలీసులు ద‌ర్యాప్తు ప్రారంభించారు. ఈ క్ర‌మంలో వంద‌న నుంచి బాబును కొనుగోలు చేసిన సీమా రేష్వాల్‌ను అదుపులోకి తీసుకొని ప్ర‌శ్నించ‌గా.. ఆ పాప రాష్ట్రంతోపాటు మూడు చేతులు మారిన‌ట్లు తేలింది. దీంతో హైద‌రాబాద్ చేరుకున్న పోలీసులు.. ఉమ ఖ‌ట్క‌మ్ నుంచి ఆ చిన్నారిని స్వాధీనం చేసుకుని సుర‌క్షితంగా మ‌హారాష్ట్ర‌కు త‌ర‌లించారు. చైల్డ్ వెల్ఫేర్ కమిటీ (Child Welfare Committee) ఆదేశాల మేరకు ఒక స్వచ్ఛంద సంస్థకు అప్పగించారు. ఈ కేసులో శిశువు కన్నతల్లితో సహా మొత్తం ఏడుగురు నిందితులను అరెస్ట్ చేశారు.

కాగా, ప‌సికందును అమ్మ‌డిన డ‌బ్బుతో ఆ పాప త‌ల్లిదండ్రులు రూ.62,000 విలువైన బంగారు ఆభరణాలు, రెండు బ్రాండెడ్ స్మార్ట్‌ఫోన్‌లను కొనుగోలు చేశార‌ని పోలీసులు వెల్ల‌డించారు.