Yadadri Thermal Power Plant | యాదాద్రి పవర్ ప్లాంట్‌లో రికార్డు స్థాయి కరెంట్ ఉత్పత్తి: రోజుకు 140 మిలియన్ యూనిట్లే లక్ష్యం

Yadadri Thermal Power Plant | త్రినేత్ర న్యూస్ : తెలంగాణ విద్యుత్ రంగంలో మరో భారీ మైలురాయి ఆవిష్కృతం కాబోతోంది. ప్రతిష్టాత్మక యాదాద్రి థర్మల్ పవర్ స్టేషన్ (YTPS) నుంచి రోజుకు ఏకంగా 140 మిలియన్ యూనిట్ల (MU) విద్యుత్‌ను ఉత్పత్తి చేసేందుకు తెలంగాణ జెన్‌కో (TGGENCO) వేగంగా చర్యలు చేపడుతోంది. ముఖ్యమంత్రి ఎ. రేవంత్ రెడ్డి, ఉప ముఖ్యమంత్రి మల్లు భట్టి విక్రమార్క ఆదేశాల మేరకు రాష్ట్ర భవిష్యత్ విద్యుత్ అవసరాలను దృష్టిలో ఉంచుకుని ఈ భారీ కార్యాచరణను సిద్ధం చేసినట్లు TGGENCO ఛైర్మన్ అండ్ మేనేజింగ్ డైరెక్టర్ వెల్లడించారు.

అడ్డంకులు దాటి.. పరుగులు పెట్టిన పనులు

2017లో YTPS నిర్మాణం ప్రారంభమైనప్పటికీ, నేషనల్ గ్రీన్ ట్రిబ్యునల్ (NGT)లో కేసుల కారణంగా ప్రాజెక్ట్ చాలా కాలం పాటు నిలిచిపోయింది. గతంలో అవసరమైన పర్యావరణ అనుమతులు (EC) రాకపోవడంతో తీవ్ర జాప్యం జరిగింది.

అయితే డిసెంబర్ 2023లో కొత్త ప్రభుత్వం బాధ్యతలు చేపట్టిన వెంటనే ప్రత్యేక చొరవ చూపింది.

ఫిబ్రవరి 2024లో ప్రజాభిప్రాయ సేకరణను పూర్తి చేసి అనుమతులు సాధించారు.

మే 7, 2024న సవరించిన పర్యావరణ అనుమతులు (EC) లభించడంతో, సుమారు 19 నెలల సుదీర్ఘ విరామం తర్వాత పనులు పునఃప్రారంభమయ్యాయి.

మే 14, 2024న యూనిట్-1, యూనిట్-2 ల బాయిలర్ లైట్-అప్ జరగ్గా, సెప్టెంబర్ 12న యూనిట్-2 గ్రిడ్‌కు అనుసంధానమైంది.

అటవీ శాఖకు సంబంధించిన 13.195 హెక్టార్ల భూమికి MoEFCC నుంచి స్టేజ్-2 క్లియరెన్స్ రావడంతో రా వాటర్ ఇన్‌టేక్, మార్షలింగ్ యార్డ్, రైల్వే లైన్ సమస్యలు పూర్తిగా తొలగిపోయాయి.

నవంబర్ 3, 2024న డిప్యూటీ సీఎం సమక్షంలో యూనిట్-1 గ్రిడ్ అనుసంధానంతో పాటు తొలి బొగ్గు రేక్ సైడింగ్‌కు చేరుకుంది.

7,180 మెగావాట్లకు చేరిన స్థాపిత సామర్థ్యం

నిర్మాణ పనులు పునఃప్రారంభమైన ఏడాదిలోనే జనవరి 2025లో మొదటి 800 MW యూనిట్ ప్రారంభమైంది. ఆ తర్వాత 2025–26, 2026–27 మధ్య మిగిలిన మూడు యూనిట్లు (3 × 800 MW) అందుబాటులోకి వచ్చాయి. దీంతో TGGENCO మొత్తం థర్మల్ విద్యుత్ ఉత్పత్తి సామర్థ్యం ఏకంగా 7,180 మెగావాట్లకు ఎగబాకింది. డిసెంబర్ 2023 నాటికి కేవలం 4,042.5 MWగా ఉన్న సామర్థ్యం ఇప్పుడు దాదాపు రెట్టింపు కావడం విశేషం.

ప్రస్తుతం భారత్ హెవీ ఎలక్ట్రికల్స్ లిమిటెడ్ (BHEL) కొన్ని వ్యవస్థల పనులను కొనసాగిస్తోంది. ఈ పనులన్నీ రాబోయే ఆరు నెలల్లో పూర్తయితే ప్లాంట్ పూర్తిస్థాయి కెపాసిటీతో విద్యుత్‌ను అందించనుంది.

బొగ్గు కొరత లేకుండా పక్కా ప్లానింగ్

సింగరేణిలో కొత్త గనులు రాకపోవడం, కొన్ని మూతపడటంతో తలెత్తిన సమస్యలను అధిగమించడానికి ప్రభుత్వం ప్రత్యామ్నాయ ఏర్పాట్లు చేసింది. ప్లాంట్‌కు నాణ్యమైన బొగ్గు నిరంతరం అందేలా నైనీ (Naini) బొగ్గు గనుల నుంచి రోజూ 2 రైళ్ల ద్వారా సరఫరా చేస్తున్నారు. అలాగే మహానది కోల్‌ఫీల్డ్స్ (MCL) నుంచి కూడా అదనంగా నాణ్యమైన బొగ్గును రవాణా చేయడానికి అవసరమైన చర్యలు తీసుకున్నారు.

రికార్డు స్థాయికి రోజువారీ ఉత్పత్తి

గతంలో ఏడేళ్లపాటు ఆలస్యమై, సాంకేతిక సమస్యలతో సతమతమైన భద్రాద్రి ప్లాంట్ కూడా సమస్యలను అధిగమించి 2025–26లో తొలిసారిగా 80 శాతం PLF (ప్లాంట్ లోడ్ ఫ్యాక్టర్) దాటింది.

TGGENCO మొత్తం థర్మల్ ఉత్పత్తి గణాంకాలను పరిశీలిస్తే

2022–23: రోజుకు సగటున 69.71 MU

2025–26: రోజుకు సగటున 78.88 MU

2026–27 ఆరంభం: రోజువారీ సగటు ఏకంగా 90.23 MU గరిష్ట స్థాయికి చేరింది.

త్వరలోనే యాదాద్రి ప్లాంట్ ద్వారానే రోజుకు 140 MU విద్యుత్‌ను ఉత్పత్తి చేసి, రాష్ట్రంలో నిరంతర నాణ్యమైన విద్యుత్ సరఫరాకు ఎలాంటి ఢోకా లేకుండా చూస్తామని జెన్‌కో స్పష్టం చేసింది.