HMWSSB | వారణాసి నిర్మాతలకు జలమండలి ‘నో’.. సందిగ్ధంలో సినిమా యూనిట్!

HMWSSB | త్రినేత్ర‌.న్యూస్‌: ప్ర‌ముఖ దర్శకుడు ఎస్‌ఎస్ రాజమౌళి తెరకెక్కిస్తున్న భారీ బ‌డ్జెట్‌ చిత్రం వారణాసి షూటింగ్‌కు అవసరమైన 150 వాటర్ ట్యాంకర్ల సరఫరా విజ్ఞ‌ప్తిని హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (హెచ్‌ఎండబ్ల్యూఎస్‌ఎస్‌బీ) తిరస్కరించింది. మహేష్ బాబు, ప్రియాంక చోప్రా ప్రధాన పాత్రల్లో నటిస్తున్న ఈ చిత్రానికి సంబంధించిన షూటింగ్ ప్రస్తుతం నగర శివార్లలో నిర్మించిన ప్రత్యేక సెట్లో కొనసాగుతోంది. ఈ నేపథ్యంలో వారణాసి చిత్రాన్ని నిర్మిస్తున్న శ్రీ దుర్గా ఆర్ట్స్ సంస్థ ప్రతినిధులు జ‌ల‌మండ‌లిని సంప్రదించి, ఒక్కోటి 10వేల లీటర్ల సామర్థ్యం కలిగిన 150 వాటర్ ట్యాంకర్లను సరఫరా చేయాలని అభ్యర్థించారు. ఈ భారీ పరిమాణంలో నీటిని గగన్‌పహాడ్‌లోని రాజేంద్రనగర్ పరిధిలో ఉన్న హైదరాబాద్ ఫిల్మ్ సిటీ స్టూడియోలో అండర్‌వాటర్ సన్నివేశాల చిత్రీకరణ కోసం వినియోగించాలనుకున్నారు. అయితే వారి విజ్ఞ‌ప్తిని అధికారులు తిర‌స్కరించారు.

హెచ్‌ఎండబ్ల్యూఎస్‌ఎస్‌బీ మేనేజింగ్ డైరెక్టర్ కె అశోక్ రెడ్డికి చిత్ర నిర్మాత‌లు పంపిన లేఖలో, ట్యాంకర్ల సరఫరాకు సంబంధించిన అన్ని ఖర్చులను సరఫరా స్థలం నుంచి షూటింగ్ లొకేషన్ వరకు తమ సంస్థ భరించేందుకు సిద్ధమని పేర్కొన్నారు. షూటింగ్ కోసం ప్రత్యేకంగా నీటి కొలను నిర్మించామని, మే 18న జరగనున్న అండర్‌వాటర్ సన్నివేశాల కోసం శుద్ధి చేసిన నీటిని సరఫరా చేయాలని కూడా వారు విజ్ఞప్తి చేశారు. అయితే తీవ్ర వేసవి పరిస్థితుల్లో నగరంలో నీటి డిమాండ్ పెరగడం, ఇప్పటికే వివిధ ప్రాంతాల నుంచి ట్యాంకర్లకు భారీగా డిమాండ్ ఉండడం త‌దిత‌ర కారణాలతో జ‌ల‌మండ‌లి ఈ అభ్యర్థనను అంగీకరించలేమని స్పష్టం చేసింది.

ఈ అంశంపై స్పందించిన జ‌ల‌మండ‌లి ఎండీ కె అశోక్ రెడ్డి మాట్లాడుతూ సినిమా కోసం 150 ట్యాంకర్ల ద్వారా నీటిని సరఫరా చేసినట్లు వస్తున్న వార్తలు అస‌త్య‌మ‌ని తెలిపారు. మూవీ మేకర్స్ అభ్యర్థనకు అధికారులు మౌఖికంగా స్పందించార‌ని, ఇంత పెద్ద మొత్తంలో ట్యాంకర్లను సరఫరా చేయడం సాధ్యం కాదని చెప్పార‌ని వెల్ల‌డించారు.