Digestive Health Problems | జీర్ణ స‌మ‌స్య‌లు త‌ర‌చూ వ‌స్తుంటే తేలిగ్గా తీసుకోవ‌ద్దు.. గ్యాస్ట్రో ఎంట‌రాలజిస్టు హెచ్చ‌రిక‌..

Digestive Health Problems | క‌డుపు ఉబ్బ‌రం, గుండెల్లో మంట‌, అసిడిటీ వంటి జీర్ణ‌కోశ‌ లక్షణాలను సాధారణంగా తీసుకోవడం ప్రమాదకరమని గ్యాస్ట్రో ఎంట‌రాల‌జిస్టు డాక్ట‌ర్ సౌర‌భ్ సేథి హెచ్చరించారు. ఇవి సాధారణ సమస్యలుగా కాకుండా శ‌రీరంలో అంత‌ర్గ‌తంగా ఉండే అనారోగ్య సమస్యలకు సంకేతాలుగా క‌నిపించే అవ‌కాశాలు ఉన్నాయ‌ని ఆయన స్పష్టం చేశారు. సప్లిమెంట్స్‌పై ఆధారపడటం కంటే ఫైబర్ తీసుకోవడం, సరైన భోజన సమయాలను పాటించడం ముఖ్యమని సూచించారు. మలవిసర్జన ఎంత తరచుగా జరుగుతుందన్న విష‌యం క‌న్నా అది సులభంగా, అసౌకర్యం లేకుండా జరుగుతుందా అన్నదే ముఖ్యమని తెలిపారు. అలాగే కాలేయ ఆరోగ్యం కూడా జీర్ణ వ్య‌వ‌స్థ‌ ఆరోగ్యంతో సన్నిహిత సంబంధం కలిగి ఉంటుందని, ఈ లక్షణాలను నిర్లక్ష్యం చేస్తే తీవ్రమైన సమస్యలకు దారితీయ‌వ‌చ్చ‌ని హెచ్చరించారు.

క‌డుపు ఉబ్బ‌రం త‌ర‌చూ వ‌స్తే సాధార‌ణం కాదు..

చాలా మంది భోజనం తర్వాత వచ్చే క‌డుపు ఉబ్బ‌రం, అప్పుడప్పుడు వచ్చే అసిడిటీ, మ‌ల‌బ‌ద్ద‌కం వంటి జీర్ణ స‌మ‌స్య‌ల‌ను సాధారణ జీవనశైలిలో భాగంగా వ‌చ్చిన‌వే అని భావిస్తుంటారు. అయితే ఈ లక్షణాలు యాదృచ్ఛికం కావని, శరీరం ఇచ్చే హెచ్చరిక సంకేతాలుగా చూడాలని డాక్టర్ సేథి సూచించారు. తన 25 ఏళ్ల వైద్య అనుభవం ఆధారంగా ఆయ‌న ఈ విష‌యాల‌ను చెబుతూ చాలామంది ఈ సమస్యలను తక్కువగా అంచ‌నా వేస్తున్నార‌ని ఆయన సోషల్ మీడియాలో తెలిపారు. ప్రతిరోజూ క‌డుపు ఉబ్బ‌రం అనుభవించడం సాధారణం కాదని, ఇది జీర్ణక్రియ సరిగా పనిచేయకపోవడానికి సూచన కావచ్చని ఆయన వివరించారు. జీర్ణ వ్యవ‌స్థ‌, కాలేయం మధ్య ఉన్న సంబంధాన్ని కూడా ప్రస్తావించారు. సాధారణంగా వేర్వేరుగా చర్చించే ఈ రెండు అవయవాలు ఒకదానితో ఒకటి బలంగా అనుసంధానమై ఉంటాయని చెప్పారు. జీర్ణాశ‌య‌ ఆరోగ్యాన్ని నిర్లక్ష్యం చేస్తే కాలేయంపై కూడా ప్రభావం పడుతుందని హెచ్చరించారు. అంటే తరచూ వచ్చే జీర్ణ సమస్యలు కాలక్రమంలో పెద్ద అనారోగ్య సమస్యలకు దారితీయవచ్చ‌ని అన్నారు.

ప్రో బ‌యోటిక్స్ వినియోగంపై..

ప్రోబయోటిక్ సప్లిమెంట్స్ వాడ‌కం పెరుగుతుండ‌డాన్ని కూడా ఆయన ప్రశ్నించారు. ఇవి స‌మ‌స్య‌కు పరిష్కారం అన్న భావన తప్పుదారి పట్టించే అవ‌కాశం ఉంద‌ని పేర్కొన్నారు. సప్లిమెంట్స్‌కు ముందుగా ఆహారంలో ఫైబర్ ఉండేలా చూసుకోవ‌డం, సరైన సమయాల్లో భోజనం చేయడం వంటి సాధారణ అలవాట్లు ఎక్కువ ప్రయోజనం అందిస్తాయని చెప్పారు. ఆహారంలో ఫైబర్ పాత్రపై ఆయన ప్రత్యేకంగా వివ‌రాల‌ను వెల్ల‌డించారు. ఫైబర్ జీర్ణక్రియను నియంత్రించడంలో, జీర్ణ‌వ్య‌వ‌స్థలో మంచి బ్యాక్టీరియాను మెరుగుపరచడంలో, మొత్తం జీర్ణ సామర్థ్యాన్ని పెంచడంలో కీలక పాత్ర పోషిస్తుంద‌ని తెలిపారు. అయితే పండ్లు, కూరగాయలు, పప్పులు, సంపూర్ణ ధాన్యాలు, గింజలు వంటి ఫైబర్ అధికంగా ఉన్న ఆహారాల‌ను చాలామంది తక్కువగా తీసుకుంటున్నార‌ని తెలిపారు. జీర్ణ వ్య‌వ‌స్థ‌ ఆరోగ్యం ఆహార ప్లేట్ నుంచే ప్రారంభమవుతుందని అన్నారు.

భోజ‌న స‌మ‌యాలు ముఖ్యం..

భోజన సమయాల ప్రాముఖ్యతను కూడా ఆయన వివరించారు. ముఖ్యంగా రోజులో మొదటి భోజనం జీర్ణ వ్య‌వ‌స్థ‌ పనితీరును ప్రభావితం చేస్తుందని తెలిపారు. ఉదయం భోజనం ఆలస్యం చేయడం, ప్రాసెస్డ్ ఫుడ్ తీసుకోవడం వంటి అలవాట్లు రోజంతా జీర్ణ సమస్యలకు దారి తీస్తాయని హెచ్చరించారు. మలవిసర్జనపై కూడా ఆయన స్పష్టత ఇచ్చారు. ప్రతిరోజూ మలవిసర్జన జరగకపోతే అది సమస్య అని భావించడం తప్పు అని చెప్పారు. అసలు విషయం మలవిసర్జన సులభంగా, నొప్పి లేకుండా జరుగుతుందా, లేదా అన్నదేనని ఆయన వివరించారు. కొంతమందికి రోజూ మలవిసర్జన జరిగినా సమస్యలు ఉండవచ్చ‌ని, మరికొంతమందికి నిర్దిష్ట సమయం లేకపోయినా ఎలాంటి సమస్యలు ఉండకపోవచ్చ‌ని తెలిపారు.

గుండెల్లో మంట అంటే..

గుండెల్లో మంట గురించి కూడా ఒక ముఖ్యమైన అపోహను ఆయన తొలగించారు. గుండెల్లో మంట‌ అంటే శరీరంలో ఆమ్లం ఎక్కువగా ఉత్పత్తి అవుతోందని అనుకోవడం తప్పు అని చెప్పారు. చాలా సందర్భాల్లో ఇది పొత్తికడుపులో ఒత్తిడి లేదా ఆలస్యంగా భోజనం చేయడం వంటి అలవాట్ల వల్ల జరుగుతుందని అన్నారు. రాత్రి ఆలస్యంగా ఎక్కువగా తినడం, వెంటనే పడుకోవడం వంటి అలవాట్లు ఈ సమస్యను పెంచుతాయని చెప్పారు. కాలేయ నష్టం కూడా ఒక్కసారిగా సంభవించదని పేర్కొన్నారు. ఇది రోజువారీ అలవాట్ల వల్ల మెల్లగా అభివృద్ధి చెందుతుందని అన్నారు. అధిక చక్కెర వినియోగం, అనారోగ్యకర నూనెల వినియోగం వంటి అలవాట్లు దీర్ఘకాలంలో కాలేయ ఆరోగ్యాన్ని దెబ్బతీస్తాయని తెలిపారు. తీవ్రమైన లక్షణాలు కనిపించే వరకు వేచి ఉండకుండా చిన్న చిన్న సంకేతాలను గుర్తించడం చాలా ముఖ్యం అని అన్నారు. క‌డుపు ఉబ్బ‌రం, గుండెల్లో మంట‌, పొట్ట‌లో అసౌకర్యం వంటి ల‌క్ష‌ణాలు శ‌రీర ఆరోగ్యం గురించి ముందుగానే హెచ్చరికలు ఇస్తాయని తెలిపారు. రోజువారీ అలవాట్లను సరిచేసుకోవడం ద్వారా జీర్ణ వ్య‌వ‌స్థ‌, కాలేయ ఆరోగ్యాన్ని కాపాడుకోవచ్చని డాక్టర్ సౌరభ్ సేథి స్పష్టం చేశారు.