Pregnancy | గ‌ర్భిణీలు ఇద్ద‌రి కోసం తినాలా.. వివ‌ర‌ణ ఇచ్చిన న్యూట్రిష‌నిస్టు..

Pregnancy | గర్భధారణ సమయంలో మహిళలు అనేక ఆహారపు అపోహలను నమ్ముతుంటారు. ఇద్దరి కోసం తినాలి, కాఫీ పూర్తిగా మానేయాలి, వ్యాయామం చేయకూడదు.. వంటి అనేక నమ్మకాలపై ప్రముఖ న్యూట్రిషనిస్ట్ రుజుతా దివేకర్ స్పందిస్తూ.. వాటిలో చాలా వరకు అపోహలేనని వెల్లడించారు. సరైన పోషకాహారం, సమతుల్య జీవనశైలి గర్భిణీ, శిశువు ఆరోగ్యానికి కీలకమని ఆమె తెలిపారు. గర్భిణీలు ఇద్దరి కోసం తినాలి అనే భావన క‌లిగి ఉండ‌డం పూర్తిగా తప్పు అని రుజుతా దివేకర్ చెప్పారు. గర్భధారణ సమయంలో అధిక కేలరీలు అవసరమవుతాయనే విషయం నిజమే అయినప్పటికీ, దాన‌ర్థం రెండింతలు తినడం కాదని స్ప‌ష్టం చేశారు. శరీరానికి అవసరమైన పోషకాలు, ప్రోటీన్, ఐరన్, కాల్షియం, ఫోలేట్ వంటి పదార్థాలు సరిపడా అందేలా సమతుల్య ఆహారం తీసుకోవడమే ముఖ్యమని చెప్పారు.

కాఫీ మానేయాలా..

గర్భధారణ సమయంలో కాఫీ పూర్తిగా మానేయాలన్న నమ్మకంపైనా ఆమె స్పందించారు. పరిమిత మోతాదులో కాఫీ తీసుకోవడం సాధారణంగా హానికరం కాదని పేర్కొన్నారు. అయితే రోజువారీ కెఫీన్ పరిమితిని దాటకుండా జాగ్రత్తపడాలని సూచించారు. ప్రపంచ ఆరోగ్య సంస్థ (WHO), అనేక వైద్య మార్గదర్శకాల ప్రకారం రోజుకు 200 మిల్లీగ్రాముల లోపు కెఫీన్ తీసుకోవడం సాధారణంగా సురక్షితంగా పరిగణిస్తారని అన్నారు. గర్భిణీలు పాతకాలపు సంప్రదాయ ఆహారాలను పూర్తిగా నిర్లక్ష్యం చేయకూడద‌ని, ఇంట్లో తయారుచేసే పప్పులు, అన్నం, నెయ్యి, పండ్లు, స్థానిక ఆహార పదార్థాలు శరీరానికి మంచి పోషణ అందిస్తాయని చెప్పారు. సూపర్ ఫుడ్స్ పేరుతో ఖరీదైన విదేశీ ఆహారాలకన్నా, స్థానికంగా లభించే సంప్రదాయ ఆహారం కూడా సమానంగా ఉపయోగకరమని పేర్కొన్నారు.

వ్యాయామంపైనా అపోహ‌లు..

వ్యాయామంపై కూడా అనేక అపోహలు ఉన్నాయని ఆమె తెలిపారు. గర్భిణీలు పూర్తిగా విశ్రాంతి తీసుకోవాలని చాలామంది భావిస్తారని, కానీ వైద్యుల సూచన మేరకు తేలికపాటి నడక, ప్రీనేటల్ యోగా, స్ట్రెచింగ్ వంటి వ్యాయామాలు చేయడం ఆరోగ్యానికి మంచిదని అన్నారు. దీని వల్ల రక్త ప్రసరణ మెరుగుపడటంతోపాటు వెన్నునొప్పి, ఒత్తిడి వంటి సమస్యలు తగ్గే అవకాశం ఉంటుందని అన్నారు. గర్భధారణ సమయంలో బరువు పెరగడం సహజమే అయినప్పటికీ, అది పూర్తిగా నియంత్రణలో ఉండాల‌ని అన్నారు. అధికంగా ప్రాసెస్డ్ ఫుడ్స్, చక్కెరపదార్థాలు, జంక్ ఫుడ్ తీసుకోవడం వల్ల గర్భకాల మధుమేహం, రక్తపోటు వంటి సమస్యల ప్రమాదం పెరుగుతుందని హెచ్చరించారు.

గర్భధారణ అనేది అనారోగ్య పరిస్థితి కాదని, అది శరీరంలో సహజ మార్పుల ప్రక్రియ అని చెప్పారు. సోషల్ మీడియాలో వచ్చే భయపెట్టే సలహాలు, అపోహలను నమ్మకుండా వైద్యులు, న్యూట్రిషనిస్టుల సలహాల మేరకు ఆరోగ్యకరమైన జీవనశైలిని పాటించాలని రుజుతా దివేకర్ సూచించారు.