Protein | ప్రోటీన్లను అధికంగా తీసుకుంటే ఫ్యాటీ లివ‌ర్ స‌మ‌స్య త‌గ్గుతుందా..? నిపుణులు ఏమంటున్నారు..?

Protein | ప్రస్తుతం ఆరోగ్యంపై జరుగుతున్న చర్చల్లో ప్రొటీన్ కీలక అంశంగా మారింది. ఫిట్‌నెస్ ట్రైనర్లు, హెల్త్ కోచ్‌లు, సెలబ్రిటీలు సైతం ప్రొటీన్ ప్రాముఖ్యతను, ప్రొటీన్ సప్లిమెంట్ల వినియోగాన్ని ప్రోత్సహిస్తున్నారు. అయితే ఏదైనా సప్లిమెంట్‌ను ఉపయోగించే ముందు దాని గురించి పూర్తి అవగాహన కలిగి ఉండటం అవసరమని నిపుణులు సూచిస్తున్నారు. గురుగ్రామ్‌లోని పారస్ హెల్త్ ఇన్‌స్టిట్యూట్ ఆఫ్ లివర్ ట్రాన్స్‌ప్లాంట్ అండ్ జీఐ సర్జరీలో లివర్ ట్రాన్స్‌ప్లాంట్ స్పెషలిస్ట్‌గా పనిచేస్తున్న డాక్టర్ వైభవ్ కుమార్ మాట్లాడుతూ అధిక ప్రొటీన్ ఆహారం, ప్రొటీన్ సప్లిమెంట్లు కాలేయ ఆరోగ్యంపై ఎలా ప్రభావం చూపుతాయో వివరించారు. ఫ్యాటీ లివర్ వ్యాధికి సంబంధించిన ఒక పెద్ద అపోహ ప్ర‌జ‌ల్లో ఇప్పటికీ కొనసాగుతోంది. ఎక్కువ ప్రొటీన్ తీసుకుంటే ఫ్యాటీ లివర్ సమస్య తగ్గిపోతుందని, జీవక్రియ మెరుగుపడుతుందని చాలామంది నమ్ముతుంటారు. అయితే వాస్తవానికి ఫ్యాటీ లివర్ వ్యాధి ప్రధానంగా ఊబకాయం, ఇన్సులిన్ రెసిస్టెన్స్, అధిక కేలరీల వినియోగం, శారీరక శ్రమ లేకపోవడం వల్ల వస్తుంది. ఇది ప్రొటీన్ లోపం వల్ల వచ్చే సమస్య కాదని ఆయన స్పష్టం చేశారు.

క‌ఠిన‌మైన ప్రోటీన్ డైట్ క‌రెక్టేనా..

ఫ్యాటీ లివర్ నిర్ధారణ అయిన వెంటనే చాలా మంది రోగులు కఠినమైన ప్రొటీన్ ఆధారిత డైట్‌ను ప్రారంభిస్తారని, కానీ అది ప్రతి సందర్భంలో సరైన పరిష్కారం కాదని ఆయన తెలిపారు. శరీరంలో కండరాల పరిరక్షణకు, జీవక్రియను సమర్థవంతంగా కొనసాగించడానికి తగినంత ప్రొటీన్ అవసరమని డాక్టర్ వైభవ్ తెలిపారు. అయితే అవసరానికి మించి ప్రొటీన్ తీసుకోవడం వల్ల కాలేయం మరింత ఆరోగ్యంగా మారుతుందని చెప్పలేమన్నారు. మార్కెట్‌లో లభించే అనేక ప్రొటీన్ సప్లిమెంట్లు సరైన నియంత్రణలో ఉండవని, వాటిలో దాగి ఉన్న పదార్థాలు లేదా కలుషిత స‌మ్మేళ‌నాలు కాలేయంపై అనవసర ఒత్తిడిని కలిగించే అవకాశం ఉందని హెచ్చరించారు. ఒకేసారి అనేక రకాల సప్లిమెంట్లను తీసుకోవడం, వాటిని మద్యం, వేగంగా బరువు తగ్గించే ఉత్పత్తులు లేదా అధిక స్టిమ్యులెంట్ కలిగిన ప్రీ-వర్కౌట్ ఫార్ములాలతో కలిపి వాడడం వల్ల కాలేయంపై భారం గణనీయంగా పెరుగుతుందని పేర్కొన్నారు.

ఆరోగ్య‌క‌ర‌మైన జీవ‌న‌శైలి ముఖ్యం..

ప్రొటీన్ మంచిదా లేదా చెడ్డదా అనే ప్రశ్న కంటే, దానిని సురక్షితంగా, సరైన కారణాల కోసం తీసుకుంటున్నామా అనే అంశమే ముఖ్యమని డాక్టర్ వైభవ్ అన్నారు. చాలా మంది వ్యక్తులకు సహజమైన, సంపూర్ణ ఆహార వనరుల ద్వారా లభించే సమతుల్య ప్రొటీన్ సరిపోతుందని ఆయన వివరించారు. కాలేయ ఆరోగ్యం ఒకే పోషక పదార్థంపై ఆధారపడదని, మొత్తం జీవనశైలి ఎంపికల ఫలితమని చెప్పారు. ఫ్యాటీ లివర్‌ను నివారించడానికి లేదా తగ్గించడానికి స్థిరమైన ఆహార అలవాట్లు, క్రమం తప్పని శారీరక వ్యాయామం, తగిన బరువును నిర్వ‌హ‌ణ‌లో ఉంచుకోవ‌డం అత్యంత ప్రభావవంతమైన మార్గాలని ఆయన సూచించారు.