Summer Heat | శ‌రీరంలోని వేడి త‌గ్గాలంటే.. కొబ్బ‌రి నీళ్లు, చెర‌కు ర‌సం.. వేటిని తీసుకోవాలి..?

Summer Heat | వేసవి కాలంలో వేడి పెరిగినప్పుడు చాలా మంది చల్లగా, తాజాగా ఉండే పానీయాలవైపు మొగ్గుచూపుతారు. భారత్‌లో అత్యంత ప్రాచుర్యం పొందిన రెండు వేసవి పానీయాలు చెరకు రసం, కొబ్బరి నీళ్లు ఎక్కడ చూసినా కనిపిస్తాయి. ఇవి రెండూ శరీరాన్ని హైడ్రేట్ చేస్తాయి, చల్లదనాన్ని ఇస్తాయి, ప్యాకేజ్డ్ చక్కెర పానీయాలకంటే చాలా మెరుగైనవి. అయితే హైడ్రేషన్, జీర్ణక్రియ లేదా మొత్తం ఆరోగ్యాన్ని దృష్టిలో పెట్టుకుని ఎంపిక చేసుకోవాలంటే, ఈ రెండింటి మధ్య తేడాల‌ను తెలుసుకోవడం అవసరం. బయటకు ఒకేలా కనిపించినా పోషక విలువలు, శరీరంపై ప్రభావం పరంగా ఇవి భిన్నంగా ఉంటాయి. కొబ్బరి నీళ్లలో పొటాషియం, సోడియం వంటి ముఖ్యమైన ఎలక్ట్రోలైట్స్ ఉంటాయి. ఇవి చెమట ద్వారా కోల్పోయిన ద్రవాలను తిరిగి భర్తీ చేయడంలో సహాయపడతాయి. అందువల్ల తీవ్ర వేడి లేదా వ్యాయామం తర్వాత కొబ్బరి నీళ్లు తీసుకోవడం ప్రయోజనకరం.

చెర‌కు ర‌సంలో చ‌క్కెర అధికం..

చెరకు రసం కూడా చ‌ల్ల‌ద‌నాన్ని ఇస్తుంది కానీ ఇది ప్రధానంగా సహజ చక్కెరల‌తో కూడిన పానీయం మాత్రమే. ఎలక్ట్రోలైట్ సమతుల్యత త‌క్కువగా ఉంటుంది. ఈఏఎస్ జర్నల్ ఆఫ్ హ్యూమానిటీస్ అండ్ కల్చరల్ స్టడీస్ లో ప్రచురితమైన అధ్యయనం ప్రకారం చెరకు రసం అధిక సుక్రోజ్ కారణంగా రక్తంలో గ్లూకోజ్ స్థాయిల‌ని వేగంగా పెంచుతుంది. అందుకే ఇది తక్షణ శక్తిని ఇస్తుంది కానీ తరచూ తీసుకోవడం ఆరోగ్యానికి మంచిది కాదు. కొబ్బరి నీళ్లలో కూడా సహజ చక్కెరలు ఉంటాయి కానీ తక్కువ పరిమాణంలో ఉండటం వల్ల రోజువారీగా తీసుకోవడానికి ఇది సమతుల్యమైన ఎంపికగా నిలుస్తుంది.

పొట్ట‌కు తేలిగ్గా ఉండే కొబ్బ‌రినీళ్లు..

ఇవి రెండూ శరీరానికి చల్లదనం ఇస్తాయి. అయితే కొబ్బరి నీళ్లు సాధారణంగా తేలికగా జీర్ణమవుతాయి. తీవ్ర వేడి సమయంలో ఇవి పొట్టకు భారంగా అనిపించవు. చెరకు రసం మాత్రం ఎక్కువగా తీసుకున్నా లేదా పొట్ట నిండినప్పుడు తీసుకున్నా కొంచెం భారంగా అనిపిస్తుంది. కొబ్బరి నీళ్లు ఎలక్ట్రోలైట్స్‌తోపాటు విటమిన్లు, ఖనిజాల‌ను కూడా అందిస్తాయి. శరీర ద్రవ సమతుల్యతను నిలబెట్టడంలో ఇవి సహాయపడతాయి. చెరకు రసంలో కూడా యాంటీఆక్సిడెంట్లు, వృక్ష సంబంధ స‌మ్మేళ‌నాలు ఉంటాయి. చెరకు రసంలో ఫినోలిక్ స‌మ్మేళ‌నాలు ఉంటాయి. అయితే ఇది ప్రధానంగా చక్కెర ఆధారిత పానీయమే కావడంతో దీన్ని పరిమితంగా మాత్రమే తీసుకోవాలి.

వేడి తగ్గాలంటే..

రోజువారీ హైడ్రేషన్ కోసం, ముఖ్యంగా వేడి ఎక్కువగా ఉన్నప్పుడు లేదా చెమట పట్టిన తర్వాత కొబ్బరి నీళ్లు ఉత్తమ ఎంపిక అని పోష‌కాహార నిపుణులు చెబుతున్నారు. ఇవి శరీరానికి తేలికగా ఉంటాయి. అంతేకాక త‌ర‌చూ తీసుకోవచ్చు. చెరకు రసం మాత్రం తక్షణ శక్తి కోసం అప్పుడప్పుడు తీసుకోవడానికి అనుకూలంగా ఉంటుంది. అధిక చక్కెర కారణంగా దీన్ని పరిమితంగా తీసుకోవడం మంచిది. ఆరోగ్యకరమైన వేసవి పానీయం ఎంపికలో కొబ్బరి నీళ్లు ముందంజలో ఉంటాయని వైద్య నిపుణులు స్ప‌ష్టం చేస్తున్నారు.