Naaz Anjum Hyderabad | రూ.80 పెట్టుబడితో మొదలై నెలకు రూ.లక్ష సంపాదన.. హైదరాబాద్ ‘బిర్యానీ క్వీన్’ నాజ్ అంజుమ్ సక్సెస్ స్టోరీ!

Naaz Anjum Hyderabad | త్రినేత్ర న్యూస్ : పెద్ద వ్యాపారం చేయాలంటే లక్షల రూపాయల పెట్టుబడి ఉండాల్సిన అవసరం లేదు.. ఆత్మవిశ్వాసం, నాణ్యత ఉంటే చిన్న అడుగు కూడా అద్భుత విజయాన్ని అందిస్తుందని నిరూపించారు హైదరాబాద్‌కు చెందిన నాజ్ అంజుమ్. 2016లో కేవలం రూ. 80 పెట్టుబడితో ఇంటి నుంచే ఫుడ్ బిజినెస్ మొదలుపెట్టిన ఆమె.. నేడు నగరంలోనే అత్యంత విజయవంతమైన మహిళా 'క్లౌడ్ కిచెన్' (Cloud Kitchen) నిర్వాహకుల్లో ఒకరిగా ఎదిగారు. 'అంజుమ్స్ కిచెన్' (Anjum's Kitchen) పేరుతో 2023 నాటికి 20,000కు పైగా ఆర్డర్లు పూర్తి చేసి, నెలకు రూ. లక్ష వరకు సంపాదిస్తూ ఎందరో మహిళలకు ఆదర్శంగా నిలుస్తున్నారు.

రూ.80తో మొదలైన బిర్యానీ ప్రయాణం

వృత్తిరీత్యా టెక్స్‌టైల్ ఇంజనీర్ అయిన నాజ్ అంజుమ్.. 2016 రంజాన్ మాసంలో తన వ్యాపార ప్రయాణాన్ని ప్రారంభించారు. ఇరుగుపొరుగు వారి ప్రోత్సాహంతో ఇంట్లోనే డబుల్ కా మీఠా, సొరకాయ హల్వా వంటి డెజర్ట్‌లు తయారు చేసి, తన బావ రెస్టారెంట్‌లో విక్రయించడం మొదలుపెట్టారు. ఆ రెండు వంటకాలకు కస్టమర్ల నుంచి మంచి స్పందన రావడంతో ఆమెలో ఆత్మవిశ్వాసం రెట్టింపైంది.

ఆ తర్వాత కొద్దిరోజులకే హైదరాబాద్‌లోని హైటెక్ సిటీలో ఒక చిన్న వేడుక కోసం మటన్ దమ్ బిర్యానీ తయారు చేయాలంటూ ఆమెకు తొలి పెద్ద ఆర్డర్ వచ్చింది. "ఆ మొదటి ఆర్డర్ వచ్చినప్పుడే 'అంజుమ్స్ కిచెన్' అనుకోకుండా మొదలైంది. నాపై నాకు పూర్తి నమ్మకం ఉంది. ఆ ఆర్డర్ కోసం కావాల్సిన కూరగాయలు కొనడానికి నేను కేవలం రూ. 80 మాత్రమే ఖర్చు చేశాను" అని అంజుమ్ 'ది బెటర్ ఇండియా'కు ఇచ్చిన ఇంటర్వ్యూలో గుర్తు చేసుకున్నారు. అలా హైదరాబాద్‌లోని తొలితరం హోమ్ చెఫ్‌లలో (Home Chefs) ఒకరిగా ఆమె ప్రస్థానం మొదలైంది.

తెల్లవారుజామున 4:30 గంటలకే దినచర్య షురూ

ఒకవైపు కుటుంబాన్ని చూసుకుంటూనే, మరోవైపు వ్యాపారాన్ని నడిపించడం అంత సులభం కాదు. అందుకే అంజుమ్ రోజూ తెల్లవారుజామున 4:30 గంటలకే నిద్రలేచి ప్రార్థనలు పూర్తి చేసుకుంటారు. ఉదయం 6 గంటలకు తన ముగ్గురు పిల్లలకు బ్రేక్‌ఫాస్ట్ సిద్ధం చేసి, వారు స్కూల్‌కు వెళ్లిన తర్వాత ఉదయం 9 గంటలకు కిచెన్‌లోకి అడుగుపెడతారు.

"నేను ప్రతిరోజూ అన్ని పదార్థాలను తాజాగా తయారు చేస్తాను. మా వారు ప్రతి ఉదయం తాజా మాంసం, కూరగాయలు తీసుకొస్తారు. సహాయకురాలు కూరగాయలు కట్ చేయడం పూర్తి చేసిన తర్వాత, ఉదయం 9 నుంచి మధ్యాహ్నం 12 గంటల వరకు రుచిలో ఏమాత్రం రాజీ పడకుండా నేనే స్వయంగా కర్రీలు, రైస్, చపాతీలు వండుతాను" అని ఆమె వివరించారు. మధ్యాహ్నం 2 గంటలకల్లా ఆమె డెలివరీ బాయ్స్ నగరవ్యాప్తంగా ఆర్డర్లను పంపిణీ చేయడం ప్రారంభిస్తారు. భోజనం తర్వాత స్టార్టర్స్, బిర్యానీ, చికెన్ కర్రీలు, డెజర్ట్‌లతో కూడిన సాయంత్రం పార్టీ ఆర్డర్ల కోసం ఆమె మళ్లీ సిద్ధమవుతారు.

మటన్ బిర్యానీయే బెస్ట్ సెల్లర్

తాజా పదార్థాల వాడకం, నాణ్యత విషయంలో అంజుమ్ చూపిన నిబద్ధత వల్ల మౌత్ పబ్లిసిటీతోనే (Word-of-mouth) ఆమె వ్యాపారం వేగంగా విస్తరించింది. 2023 నాటికి ఆమె నెలవారీ ఆదాయం రూ. 1 లక్షకు చేరగా, మొత్తం 20,000కు పైగా ఆర్డర్లను విజయవంతంగా పూర్తి చేశారు. ప్రస్తుతం ఆమె కిచెన్ నుంచి రోజుకు సగటున 25 నుంచి 50 ఆర్డర్లు డెలివరీ అవుతున్నాయి. అందులో మటన్ దమ్ బిర్యానీ ఇప్పటికీ బెస్ట్ సెల్లర్‌గా కొనసాగుతోంది.