RTC Driver Ashok Job | రైతుల కోసం మాట్లాడిన ఆర్టీసీ డ్రైవర్‌ను తీసేశారా? అసలు నిజం బయటపెట్టిన మంత్రి పొన్నం ప్రభాకర్

RTC Driver Ashok Job | త్రినేత్ర.న్యూస్ : జగిత్యాల (Jagtial) బస్టాండ్‌లో రైతుల సమస్యలపై గొంతెత్తిన ఆర్టీసీ డ్రైవర్ అశోక్ (Driver Ashok) వ్యవహారం రాష్ట్రవ్యాప్తంగా హాట్ టాపిక్‌గా మారింది. రైతుల పక్షాన మాట్లాడినందుకు అతడిని ఉద్యోగంలోంచి తొలగించారంటూ సోషల్ మీడియాలో పెద్ద ఎత్తున వార్తలు వచ్చాయి. అయితే ఈ వార్తలపై రవాణా శాఖ మంత్రి పొన్నం ప్రభాకర్ (Ponnam Prabhakar) స్పందించారు. అశోక్‌ను ఉద్యోగంలోంచి తొలగించారని వస్తున్న వార్తల్లో ఎలాంటి నిజం లేదని, అవన్నీ కేవలం పుకార్లేనని స్పష్టం చేస్తూ ఆయన ఒక వీడియోను విడుదల చేశారు.

అతను ఆర్టీసీ ఉద్యోగి కాదు

"డ్రైవర్ అశోక్ ఆర్టీసీ (TSRTC) రెగ్యులర్ ఉద్యోగి కాదు. అతను నడిపేది ఆర్టీసీ అద్దె బస్సు (Hire Bus). ఆ బస్సుకు సంబంధించిన ప్రైవేట్ యాజమాన్యం దగ్గర అతడు పనిచేస్తున్నాడు. అయినప్పటికీ, ఆ బస్సు యజమానికి నేను, ఆర్టీసీ ఎండీ గారు స్వయంగా చెప్పాం.. అతన్ని ఉద్యోగంలోంచి తీసేయవద్దని గట్టిగా సూచించాం. రైతుల పక్షాన మాట్లాడినందుకు ఎవరినీ ఇబ్బంది పెట్టం. అశోక్ అన్న మాటలను మేము కూడా స్వాగతిస్తున్నాం" అని మంత్రి పొన్నం ప్రభాకర్ స్పష్టం చేశారు. ఈ విషయాన్ని ప్రతిపక్షాలు రాజకీయం చేయొద్దని ఆయన కోరారు.

ధాన్యం కొనుగోళ్లపై పూర్తి ఫోకస్

రాష్ట్రంలో ధాన్యం కొనుగోళ్ల (Grain Procurement) గురించి కూడా మంత్రి మాట్లాడారు. కేంద్ర ప్రభుత్వం వడ్ల కొనుగోళ్లలో నిర్లక్ష్యం వహిస్తోందని ఆయన విమర్శించారు. అయినప్పటికీ, రైతులకు ఇబ్బంది కలగకుండా, కొనుగోళ్లు సజావుగా సాగేందుకు రాష్ట్ర ప్రభుత్వం అన్ని చర్యలు తీసుకుంటోందని చెప్పారు. "దిగుబడి భారీగా పెరగడంతో కొనుగోలు కేంద్రాలను కూడా పెంచాం. లారీలు, గోదాముల కొరత లేకుండా చూస్తున్నాం. ఏ ఒక్క రైతూ నష్టపోకూడదన్నదే మా ప్రభుత్వ లక్ష్యం" అని మంత్రి పొన్నం భరోసా ఇచ్చారు. ఈ అంశంపై రాజకీయాలు పక్కనపెట్టి ప్రభుత్వానికి సహకరించాలని కోరారు.

జగిత్యాల లో రైతుల పక్షాన ప్రశ్నించిన అశోక్ అనే డ్రైవర్ ని తొలగించారని వస్తున్న వార్తలు పూర్తిగా అవాస్తవం..
అతను కేవలం ఆర్టీసీ హైర్ (కిరాయి)బస్సు డ్రైవర్.. ఆర్టీసీ ఉద్యోగి కాదు.
అయినప్పటికే అతన్ని ఉద్యోగం నుండి తొలగించవద్దని బస్సు యాజమాన్యానికి సూచించాం,
అశోక్ రైతుల పక్షాన… pic.twitter.com/frYRlVzbQ2

— Ponnam Prabhakar (@Ponnam_INC) May 26, 2026