Khamenei death celebrations | ఖమేనీ మృతితో రోడ్డుపై యువతి డ్యాన్స్.. అప్పట్లో కాలిపోతున్న ఖమేనీ ఫోటోతో సిగరెట్ వెలిగించి రచ్చ

Khamenei death celebrations | ఇరాన్ సుప్రీం లీడర్ అయతుల్లా అలీ ఖమేనీ మృతి ఇరాన్‌తో పాటు ప్రపంచవ్యాప్తంగా తీవ్ర సంచలనం సృష్టిస్తోంది. అమెరికా, ఇజ్రాయెల్ సంయుక్తంగా చేసిన భీకర దాడుల్లో ఖమేనీ మరణించినట్లు ఇరాన్ అధికారిక మీడియా కూడా నిర్ధారించింది. ఈ వార్తతో మధ్యప్రాచ్యంలో (Middle East) పరిస్థితులు ఉద్రిక్తంగా మారగా, కొందరు ఇరాన్ పౌరులు మాత్రం ఆయన మరణాన్ని బహిరంగంగా సెలబ్రేట్ చేసుకుంటున్నారు. ఇందులో ముఖ్యంగా ఒక యువతి చేసిన సంబరాలు ఇప్పుడు నెట్టింట తీవ్ర వైరల్‌గా మారాయి.

గతంలో పెను సంచలనం..

ఈ ఏడాది జనవరిలో ఓ యువతి ఇరాన్ సుప్రీం లీడర్ ఖమేనీ ఫోటోకు నిప్పుపెట్టి, ఆ మంటతో స్టైల్‌గా తన సిగరెట్‌ను వెలిగించుకున్న వీడియో సోషల్ మీడియాను షేక్ చేసింది. ఇరాన్ నాయకత్వంపై, అక్కడి అణచివేతపై నిరసనలకు ఈ వీడియో ఒక ప్రతీకగా (Symbol of Protest) నిలిచింది. ఇప్పుడు ఖమేనీ మరణవార్త తెలుసుకున్న ఆ యువతి మరోసారి తెరపైకి వచ్చింది.

సమాధి మీద డ్యాన్స్ చేస్తానన్నాను కదా!

ఎక్స్ ఖాతాలో 'మార్టిసియా ఆడమ్స్' (Morticia Addams) అనే పేరుతో ఉన్న ఈ యువతి, తాజాగా ఓ వీడియోను షేర్ చేసింది. ఖమేనీ మరణాన్ని సెలబ్రేట్ చేసుకుంటున్న ఒక పెద్ద గుంపుతో కలిసి ఆమె వీధుల్లో నడుస్తూ, బిగ్గరగా పాడుతూ, సంతోషంగా నృత్యం చేస్తున్నట్లు ఆ వీడియోలో ఉంది. ఈ వీడియోకు ఆమె.. "నీ సమాధి మీద డ్యాన్స్ చేస్తానని చెప్పాను కదా, గుర్తుందా?" (I said we'd dance on your grave, didn't I?) అంటూ సంచలన క్యాప్షన్ ఇచ్చింది. అంతేకాకుండా, 1979 ఇస్లామిక్ విప్లవంలో పదవీచ్యుతుడైన ఇరాన్ చివరి షా కుమారుడిని ఉద్దేశిస్తూ #KingRezaPahlavi అనే హ్యాష్‌ట్యాగ్‌ను జతచేసింది.

కెనడాలో ఉంటూ నిరసన జ్వాలలు..

గతంలో ఖమేనీ ఫోటోతో సిగరెట్ వెలిగించిన వీడియో ఇరాన్‌లోనే జరిగిందని చాలామంది భావించారు. కానీ రాయిటర్స్ (Reuters) చేసిన ఫ్యాక్ట్ చెక్‌లో అది కెనడాలోని ఒంటారియోలో ఉన్న ఓ బ్యాంక్ ముందు రికార్డ్ చేసినట్లు తేలింది. తాను జీవితంలో ఎక్కువ భాగం ఇరాన్‌లోనే గడిపానని, ప్రస్తుతం కెనడాలో ప్రవాస జీవితం గడుపుతున్నానని ఆమె అప్పట్లో ఒక ఇంటర్వ్యూలో వెల్లడించింది. తన కుటుంబం ఇంకా ఇరాన్‌లోనే ఉందన్నది ఆమె మాట.

ఇరాన్‌లో ఖమేనీ ఫోటోలను తగలబెట్టడం, మహిళలు పబ్లిక్‌గా ధూమపానం చేయడం తీవ్రమైన నేరంగా పరిగణిస్తారు. అయినప్పటికీ, ఇలాంటి ప్రతీకాత్మక నిరసనలు ఇరాన్ ప్రభుత్వ అణచివేతకు వ్యతిరేకంగా 'ఉమెన్, లైఫ్, ఫ్రీడమ్' (Woman, Life, Freedom) ఉద్యమానికి ఊపిరిపోశాయి. మహ్సా అమిని మరణం తర్వాత ఇరాన్ లో మొదలైన హిజాబ్ వ్యతిరేక ఆందోళనల స్ఫూర్తితో మహిళలు తమ గొంతును బలంగా వినిపిస్తున్నారు. ఇప్పుడు ఖమేనీ మరణంతో ఒకవైపు ఇరాన్ ప్రతీకార దాడులకు దిగుతుంటే, మరోవైపు దశాబ్దాల అణచివేత నుంచి విముక్తి లభిస్తుందన్న ఆశతో కొందరు ఇలా సంబరాలు చేసుకుంటుండటం ప్రపంచవ్యాప్తంగా చర్చనీయాంశంగా మారింది.

https://x.com/melianouss/status/2027858768046735563