Iran Top Commander Warns Trump | ట్రంప్‌ను వదిలిపెట్టే ప్రసక్తే లేదు: ఇరాన్ హెచ్చరిక.. ‘డోంట్ కేర్’ అన్న అమెరికా అధ్యక్షుడు

Iran Top Commander Warns Trump | త్రినేత్ర.న్యూస్ : ఇరాన్ సుప్రీం లీడర్ అయతుల్లా అలీ ఖమేనీ హత్య తర్వాత మధ్యప్రాచ్యం (Middle East) అట్టుడుకుతోంది. ఇరాన్, అమెరికా, ఇజ్రాయెల్ మధ్య జరుగుతున్న ఈ యుద్ధం రోజురోజుకూ తీవ్రరూపం దాల్చుతోంది. "మా నాయకుడిని చంపిన అమెరికా అధ్యక్షుడు డొనాల్డ్ ట్రంప్‌ను వదిలిపెట్టబోం" అని ఇరాన్ భద్రతా విభాగం అధిపతి అలీ లారిజానీ వార్నింగ్ ఇవ్వగా.. ఆ బెదిరింపులను ట్రంప్ తేలిగ్గా కొట్టిపారేశారు.

Iran Top Commander Warns Trump | మూల్యం చెల్లించుకోక తప్పదు: అలీ లారిజానీ

ఫిబ్రవరి 28న అమెరికా-ఇజ్రాయెల్ జరిపిన దాడుల్లో ఖమేనీ ప్రాణాలు కోల్పోయారు. ఈ దాడి తర్వాత ఇరాన్ అత్యున్నత నాయకుల్లో ఒకరిగా ఎదిగిన అలీ లారిజానీ (ఖమేనీకి ముఖ్య సలహాదారు) శనివారం ఇరాన్ ప్రభుత్వ టెలివిజన్‌తో మాట్లాడుతూ అమెరికాపై నిప్పులు చెరిగారు.

వెనిజులా తరహా కుట్ర

"వెనిజులాలో ఏం జరిగిందో ట్రంప్ రుచి చూశారు. ఇరాన్‌లో కూడా త్వరగా అలాగే చేయొచ్చని ఆయన అనుకున్నారు. కానీ ఇప్పుడు ఆయన ఇక్కడ ఇరుక్కుపోయారు" అని లారిజానీ ఎద్దేవా చేశారు.

1000 మంది బలి : "మేము ట్రంప్‌ను వదిలిపెట్టం. ఆయన చేసిన పనికి తగిన మూల్యం చెల్లించుకోవాలి. ఆయన మా నాయకుడిని చంపడమే కాకుండా 1,000 మందికి పైగా ఇరాన్ ప్రజలను బలితీసుకున్నారు. ఇది చిన్న విషయం కాదు" అని ఆయన స్పష్టం చేశారు.

తమపై దాడులకు సహకరిస్తే ఇరుగుపొరుగు దేశాలపైనా దాడి చేస్తామని, కొందరు అమెరికా సైనికులను కూడా ఇరాన్ బంధించిందని ఆయన సంచలన వ్యాఖ్యలు చేశారు.

'డోంట్ కేర్' అన్న డొనాల్డ్ ట్రంప్

లారిజానీ వ్యాఖ్యలపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. ఈ సందర్భంగా మాట్లాడుతూ, ఇరాన్ నాయకుల బెదిరింపులను తాను అస్సలు పట్టించుకోనని స్పష్టం చేశారు.

అసలు అతనెవరు?

"ఆయన (లారిజానీ) ఏం మాట్లాడుతున్నాడో నాకు అర్థం కావడం లేదు. అసలు అతను ఎవరో కూడా నాకు తెలియదు. అతను ఇప్పటికే ఓడిపోయాడు" అని ట్రంప్ కౌంటర్ ఇచ్చారు. ఇరాన్ నాయకులు బలహీనపడ్డారని ఎద్దేవా చేసిన ట్రంప్.. అమెరికా సైనిక దాడులు కొనసాగుతాయని, ఇరాన్ బేషరతుగా లొంగిపోవాల్సిందేనని తేల్చి చెప్పారు.

9వ రోజుకు యుద్ధం - పెరిగిన ఉద్రిక్తతలు

అమెరికా-ఇజ్రాయెల్ దాడులకు ప్రతిస్పందనగా ఇరాన్ కూడా గల్ఫ్ దేశాల్లోని అమెరికా సైనిక స్థావరాలపై క్షిపణులు, డ్రోన్లతో విరుచుకుపడుతోంది.

క్షమాపణలు చెప్పిన ఇరాన్ అధ్యక్షుడు

పర్షియన్ గల్ఫ్ దేశాలపై దాడులు జరగడం పట్ల ఇరాన్ అధ్యక్షుడు మసౌద్ పీజెష్కియాన్ తొలుత పొరుగు దేశాలకు క్షమాపణలు చెప్పారు. అయితే, ఆ తర్వాత తన వ్యాఖ్యలను వెనక్కి తీసుకుంటూ.. "మేము పొరుగు దేశాలపై దాడి చేయలేదు, కేవలం అమెరికా సైనిక స్థావరాలనే లక్ష్యంగా చేసుకున్నాం" అని వివరణ ఇచ్చారు. దీనిపై ట్రంప్ స్పందిస్తూ ఇరాన్‌ను "మిడిల్ ఈస్ట్ లూజర్" (loser of the Middle East) గా అభివర్ణించారు.

తాజా నివేదికల ప్రకారం, ఈ యుద్ధంలో ఇప్పటివరకు ఇరాన్‌లో 1,000 మందికి పైగా మరణించగా, ఇజ్రాయెల్‌లో పలువురు ప్రాణాలు కోల్పోయారు. ఆరుగురు అమెరికా సైనికులు కూడా మృతి చెందారు.

దౌత్యపరమైన ప్రయత్నాలు

యుద్ధాన్ని ఆపేందుకు ఖతార్, టర్కీ, ఈజిప్ట్, ఒమన్ వంటి దేశాలు మధ్యవర్తిత్వం వహించేందుకు ముందుకొచ్చాయి. అయితే, రాబోయే రోజుల్లో ఇరాన్‌పై దాడులు "తీవ్రంగా పెరుగుతాయి" అని అమెరికా రక్షణ కార్యదర్శి పీట్ హెగ్‌సెత్ ప్రకటించడం, ఇజ్రాయెల్ సైన్యం (IDF) కూడా కొత్తగా దాడులకు సిద్ధమవుతుండటంతో పరిస్థితులు మరింత ఆందోళనకరంగా మారాయి.